¹ Ano vakafumu vavaIsraeli kwatulire litwenyidiro pa Mizipa, ''Kwato umwe wetu ngatapo monendi wamukadona akware muBenyameni.'' ² Makura mbunga ayiyendi kuBeteli na kukashungira kumeho ya Karunga dogoro ngurova, naliywi lyalinene mukulira ngudu. ³ Avayiyiri, ''Morwa nke , Karunga wa Israeli, vina kushorokere vino ku vaIsraeli, ashi lira lyetu limwe ngalidongonokepo pamayuva ghano?'' ⁴ Liyuva lyakukwamako mbunga ayishapuka murughundja nakudika shidjambero mpopo nakudjamberapo ndjambo yakushwakerera na ndjambo ya mbili. ⁵ Mbunga ya Israeli ayighamba, ''Rudi munke rwa Israeli oro runadiro kuya mukuyaponga kwa Karunga?'' Mukondashi vavo kwakutulire litwenyidiro lyalinene lyakuhamene kwa kehe uno ogho ngadiro kuya kwa Karunga pa Mizipa. Avaghamba, ''Ghuye ana hepa kumudipagha.'' ⁶ Mbunga ya Israeli ayikara muruguvo mukondashi vaghuni vavo vaBenyameni. Avaghamba, ''Namuntji rudi rumwe vanaruteteko muIsraeli. ⁷ Are ogho ngavatapero vakamali kwavo ovo vahupo po, kutunda opo twatura litwenyidiro kwa Karunga ashi atwe kapi ngatu pulitira kehe uno wavo akware vana vetu vavakadona?'' ⁸ Avaghamba, '' Rudi munke rwa vaIsraeli oro runadiro kuya kwa Karunga pa Mizipa?'' Avawaneke ashi kwato umwe anayo mukuya ponga kutundilira kuGileyada. ⁹ Mukondashi opo vatulire mbunga yiponge nawa, hawe, kwato umwe wamutungimo wa muJabeshi ya muGileyada ogho akaliropo. ¹⁰ Lipongo alitumu alitumu vakafumu gha mapenda mayovi murongo na vaviri na marawiro mukuyenda nakukahomona vatungimo vaJabeshi ya muGileyada na rufuro rwa ghutwe, rambangako vakamali na vanuke. ¹¹ ''Kaviruwanenu vino: Kehe mukafumu na kehe mukamali ogho ayivo mukafumu mukurara naye munahepa kukaruwanita nkondo denu mukuvadjonaura po.'' ¹² Vakafumu avakawana ovo vatungo muJabeshi ya muGileyada vakadona mafere mane ovo vadiro kuyiva vakafumu mukurara navo, ano nko kuvashimba vavatware kuntanda paShilo muKanana. ¹³ Lipongo nalintje alitumu mbudi nakutantera vambunga ya Benyameni ovo vakaliro paliwe lya Rimoni ashi vavo kuna kuvadjambera ndjambo yambili. ¹⁴ VaBenyameni avakavyuka ndoro ruvede nakuyavapa vakamali va mu Jabesshi ya muGileyada, ngoli kapi vakalire vakamali vavangi kukwavo mukugwaneka navantje. ¹⁵ Mbunga kwakalire narughambo kovyo vyashorokiliro vaBenyameni, mukondashi Karunga kwaruwanine ligaghununo mumarudi gha vaIsraeli. ¹⁶ Makura vamipititi valipongo avaghamba, ''Weni mo tuwanena vakamali ku vaBenyameni ovo vanahupoko, kutunda opo vakamali vavaBenyameni twavadipagha?'' ¹⁷ Avaghamba, ''Morwa kuna hepa kukara ghupingwa kuvaparukimo vavaBenyameni, makura rudi ngarudire kudjonauka muIsraeli. ¹⁸ Atwe nakuvhurashi kuvapa vakamali vakutunda muvana vetu vavakadona, mukondashi mbunga ya Israeli kwatura litwenyidiro, 'Lifingiliro kwa kehe uno anakutapo mukamali ku vaBenyameni.'''' ¹⁹ Ano avaghamba, ''Twayiva ashi shipito sha Karunga shakarango kehe uno mwaka pa Shilo ( Oyo yakaro kuumboyera wa Beteli, kuupumeyuva washitaura shayendo kutunda Beteli dogoro Shekemu, nakuUcuma waLebona).'' ²⁰ Avanangwiri vakafumu vavaBenyameni, mukuvatantera, ''Yendenu nakukabata mukaholya-holya mukukataterera muvikunino vya mandjembere. ²¹ Mukakengere ruvede oro vayanga vakadona va muShilo varupuke vakadane, makura mukabubukemo muvikunino vya mandjembere nakukakwata mukaghupe kehe uno mukamali povo vakadona va muShilo, makura mukavyuke kushirongo sha Benyameni. ²² Opo ngavaya vasha vavo ndi vakuru vavo vavakafumu vayatutangulite, atwe ngatuvatantera, 'Tuneghedenu uwa! Vashuvenu tupu mukondashi atwe kapi twavapa vakamali mwakehe uno mukafumu ruvede rwa vita. Kapi mwadjona, shirugho osho mwadira kutapavana venu vavakadona kukwavo. ²³ Mbunga ya Benyameni ayiviruwana ngoweyo. Avaghupu shivaro shavakamali ovo vashanine muvakadona ovo vadanino nakuvatwara mukukara vakamali vavo. Avayendi nakukavyuka kulivango lyaupingwa wavo. Avakatungurura vitata ghona vyavo nakukatunga mo. ²⁴ Makura mbunga ya Israeli ayitundupo palivango olyo nakuyenda kumandi. kehe uno kurudi rwendi nakulira lyendi, ano kehe uno kughupingwa wa mwene. ²⁵ Mumayuva ogho kapi mwakalire hompa mu Israeli. Kehe uno kwaruwanine ovyo vinhungamo mumantjo gha mwene.