¹ Mumayuva ngogho, mwamo shimpe mwato hompa muIsraeli, kwakalire mukafumu, wa muLevi, ogho atungiro kumavango gha ure kushirongo sha ndundu sha Efurayimu. Ghuye aghupu mukamali, shihora sha muBetelehemu ya muJuda. ² Ngoli shihora shendi kapi shakalire naushili mumwendi, ashimushuvu nakuvyuka kundjugho yavashe muBetelehemu ya muJuda. Akakara mo mwedi ne. ³ Makura nturaumbo yendi ashapuka na kumushupura mukukakukwambera akavyuke. Ghuye kwakalire namukareli wendi, na vidongi viviriAmutwara mundjugho yavashe. Opo vamukengire vashe vamukadona, avahafa. ⁴ Tamweyi yendi, vashe vamukadona, avamukukwambere mukukara mayuva matatu. Avali na kunwa, nakukara matiku momo. ⁵ Muliyuva lyaune avarambuka muruvindwira nakuwapayika ayende, ngoli vashe vamukadona avatantere tamweyi yavo, ''Kukoreke na shitaghu sha mboroto,ntani ngoli uyenda.'' ⁶ Makura muuviri wavo avashungiri valye na kunwa kumwe. Makura vashe vamukadona avaghamba, ''Nakanderere rara matiku momo unashanene nakuhafa.'' ⁷ Opo ashapukire muLevi ashi ndi ayende, vashe vamukamali ghona avakukwambere akare, makura apirura lighano lyendi na kurara matiku momo nka. ⁸ Muliyuva lyautano arambuka muruvindwira ayende, ngoli vashe vamukadona avaghamba, ''Kukoreke nakutaterera dogoro shitenguko.'' Makura muuviri wavo avalyi muyusha. ⁹ Opo vashapukire mukuyenda muLevi na shihora shendi na mukareli wendi, tamweyi yendi, vashe vamukadona avamutantere, ''Kenga, ngoweyo liyuva kuna kukumanita litoke. Nakanderere kara shimpe matiku ghano na kuhafa. Ngaumeneke ngoli kurambuka yona nakuvyuka kumundi.'' ¹⁰ Ngoli muLevi kapi ashanine kukara mo matiku nka. Ashapuka nakuyenda. Ayendi avyukilire kuJebusi (yayo ndjo Jerusalemu). Ghuye kwakalire navipuna vyakurondita vidongi viviri - ano nashihora shendi akalire. ¹¹ Opo vatikire pepi na Jebusi, liyuva linashana kukatoka, ano mukareli atantere muhona wendi, ''Tuyende, tuyapuke kushitata sha vaJebusi nakukarara mo matiku.'' ¹² Muhona wendi amutantere, ''Kapi tuyapukira mo mushitata sha vantundwavirongo ovo vadiro kuhamena kumbunga ya Israeli. Kutuyenda kuGibeya.'' ¹³ MuLevi atantere musheshu ghona wendi wa mukafumu, ''Yiya, tuyende ngoli kulivango limwe paghanya, nakukarara matiku muGibeya ndi muRama.'' ¹⁴ Makura avayendi, ano liyuva alitoko tupu vatika pepi na Gibeya, mushirongo sha vaBenyameni. ¹⁵ Avayapukiri mo vakarare matiku muGibeya. Avayendi nakushungira paliharango lya shitata, ngoli kwato umwe ogho avaghupiro mukukavatura mundjugho yendi mukukarara mo matiku. ¹⁶ Ngoli mukafumu wamukurupe atundiliri kuviruwana vyendi vya mulifuva ngurova oyo. Ghuye wantundiliro ya shirongo sha ndundu sha Efurayimu, ano ghuye kwayakalire tupu karugho ghona muGibeya. Ngoli vantu ovo vatungiro mo mulivango omo kwakalire vaBenyameni. ¹⁷ Akankura mantjo ghendi ano akenge varuyendo ndjira muliharango lyashitata. Mukafumu wamukurupe aghamba, ''Kuni munakuyenda? Kuni muna kutunda?'' ¹⁸ MuLevi amutantere, ''Atwe kuna kutunda kuBetelehemu ya muJuda tuyende kumavango gha ure gha shirongo sha ndundu sha Efurayimu, oko nko natunda. Kwayenda kuBetelehemu ya muJuda , ano kuna kuyenda kundjugho yaKarunga, ngoli panderepo umwe ogho anangupo antware mundjugho yendi.'' ¹⁹ Tunakara namushoni wakulyita vidongi vyetu, ano mpoyili mboroto na vinyu yande na mukareli ghoye wa mukamali oghuno, ano nka noghuno mumati mukareli ghoye. Kwato ovyo tunahepa.'' ²⁰ Mukafumu wamukurupe avamorora, ''Mpora yikare nanwe!Kuvhura nikamupakere mbili kwanavintje ovyo munahepa. Shashinenepo mwasharara matiku muliharango.'' ²¹ Makura mukafumu apitura muLevi mundjugho yendi nakukapa ndya vidongi. Avavakushu kumpadi davo na kulya na kunwa. ²² Ndavahokwera mukuhafita dimutjima davo, vakafumu vamwe vamushitata, vakafumu vavakorokotji, avakundurukida ndjugho avatameke kutoghona kulivero. Avatantere mukafumu wa mukurupe, mwenya ndjugho, avaghamba, ''Rupwita mukafumu ogho anayo mundjugho yoye, mposhi tumuyive.'' ²³ Mukafumu, mwenya ndjugho, avarupukiri nakuvatantera, ''Hawe, vaghuni vande, nakanderere mwasha ruwana ndjo yangoweyo! Mbyevishi mukafumu uno mugenda wa mundjugho yande, mwasha ruwana udona wa ngoweyo! ²⁴ Kenga, monande wamukadona vadira kuguma rumwe nashihora shendi mo muno. Renkenu nivarupwite. Karenu navo nakuruwana kehe vino navo kehe vino munashana. Ngoli mwasha ruwana kehe vino vininke vyavidona koghuno mukafumu!'' ²⁵ Ngoli vakafumu kapi vamutegherelire, makura mukafumu amushakana shihora shendi nakumurupwita. Avamurarere kunkondo nakumuhepeka matiku naghantje, ano muruvindwira avamushuvu ayende. ²⁶ Muruvindwira mukamali akaya nakuyawera palivero lyandjugho yogho mukafumu oko akalire muhona wendi, ano nko kurara nkoko dogoro alipumu. ²⁷ Muhona wendi opo arambukire ngurangura nakuharura livero ano ayende akatwikire ndjira yendi yendi. Nko kukenga shihora shendi shinarar palivero, ano maghoko ghendi kuvikuravero. ²⁸ MuLevi amutantere, ''Shapuka. Tuyendeko.'' Ngoli kwato nalilimbururo. Amutura pashidong, nakuyenda na mukafumu kumundi. ²⁹ Opo ayatikire muLevi kundjugho yendi, aghupu mbere, nakukwata shihora shendi, ano nko kumutaghura, mukatji lihuru na lihuru, mumaruha murongo na maviri, ano nko kutuma maruha kehe kuno mwayendo Israeli. ³⁰ Navantje ovo vakakengiro vino avakaghamba, ''Vininke vya ngoweyo kapi vyashoroka rumwe ndi tuvikenge kutunda liyuva olyo mbunga ya Israeli yatunda mushirongo sha Egipute dogoro nolino liyuva. Ghayerenuko! Tupenuko maghano! Tutanterenuko ashi weni omo turuwana!''