¹ Mumayuva ogho kapi mwakalire hompa muIsraeli. Rudi rwa vana vaDona vavo kuna kushana-shana livango lya kutunga, kutunda mumayuva ogho vavo kapi vawanine ko kehe uno upingwa mukatji kamarudi gha vaIsraeli. ² Mbunga yaDona ayitumu vakafumu vatano muZora na muEshitayoli, vakanongonone shirongo mukuyenda parupadi, nakukashishana-shana. Avatantere, ''Yendunu nakukashana-shana shirongo.'' Avaya mushirongo sha ndundu sha Efurayimu, kundjugho ya Mika, nakukarara mpopo matiku. ³ Opo vatikire pepi na ndjugho ya Mika, avadimburura rughambito rwa musheshu-ghona wa MuLevi. Makura avayimana nakumupura, ''Are akuyito ko kuno? Vinke waruwananga mo mulivango lino? Morwa nke unayakarere kuno?'' ⁴ Avatantere, ''Ovino mbyo anduwanena Mika: Ghuye kwa nkumuna nikare nimuruti wendi.'' ⁵ Avaghamba kwendi, ''Tunakanderere shana mapukururo kwa Karunga, mposhi tuyivilite ntjene runo ruyendo tunakuyenda ngarututompoka.'' ⁶ Muruti avatantere, ''Yendenu mumpora. Karunga kwamupititira mundjira yenu oyo munakuyenda.'' ⁷ Makura vakafumu vatano avatundupo nakuyenda kuLayishi, nakukamona ashi vantu parukire mulikungu, yira momo vatunga vaSidoni, mulikungo nakupira vitjakangana. Kapi kwakalire umwe wakuvhura kuvafunda ndi kuvahepeka kehe muno murupe mushirongo. Vavo kwatungire ure na vaSidoni ano vavo kapi vakalire nalikuyuvho na kehe uno. ⁸ Vavo avakavyuka kurudi rwavo muZora na muEshitayoli. Likoro lyavo alikavapura, ''Vinke vitundwamo vyenu?'' ⁹ Avaghamba, ''Yiyenu! Tuyendenu tukavahomone! Tunakashikenga shirongo ano nka shiwa unene. Kwato ovyo munakuruwana ndi? Twasha kurangenu kuhomona shirongo. ¹⁰ Opo muyenda, ngamuyatika pa vantu ovo vaghayarango ashi vavo mulikungo vakara, ano shirongo shinene! Karunga kwashimupa - livango lyakudira kuhepa kehe shino mushirongo.'' ¹¹ Vakafumu mafere ntayimwe vamurudi rwa Dana, vanakuwapayikiro navirwito mukurwa vita, avatundu muZora na muEshitayoli. ¹² Avayendi nakukatomekera ntanda pa Kiriyata Jeyarimu, muJuda. Ovino mbyo vyarenkitiro vantu valitwenye olyo livango Mahane Dana nelino liyuva, olyo lyakarero, kuutokero wa Kiriyata Jeyarimu. ¹³ Avatundu opo vayende kushirongo sha Efurayimu nakuyatika pa ndjugho ya Mika. ¹⁴ Makura vakafumu vatano ovo vayendiro vakanongonone shirongo sha Layishi avatantere valikoro lyavo, ''Munayivashi mundjugho muno mpolili mo lirwakani, vakarunga vakuvambeka mundjugho, vakarunga vavipempa vakushonga, na vakarunga vavipempa vavambayika vikugho? Tokorenu ngoli shi weni mo turuwana.'' ¹⁵ Makura avavyuka momo kundjugho ya musheshu ghona wa muLevi, pa ndjugho ya Mika, ava mumorora. ¹⁶ Ano vaDana mafere ntayimwe, vanakuwapayikiro kurwa na virwito mukurwa vita, avyimana pamangeneno kulivero. ¹⁷ Vakafumu ovo vayendiro vakanongonone shirongo avangene mo nakukaghupa vakarunga vakushonga, lirwakani, vakarunga vakupamparera mundjugho, na vakarunga vakuvambayika vikugho, kuno ghuye muruti ana yimana palivero lyamuyashamena kumwe na vakafumu mafere ntayimwe vanakuwapayikiro mukurwa vita. ¹⁸ Opo vangenine mundjugho ya Mika nakughupa vakarunga vakushonga, lirwakani, vakarunga vakupamparera mundjugho, na vakarunga vakuvambayikavikugho, muruti avatantere, ''Vinke ovyo munakuruwana?'' ¹⁹ Vavo avamutantere, ''Mwena! Tura lighoko lyoye kukanwa koye nakutukwama, nakukara kwetu sha na muruti. Vina wapere kukara ve muruti wa ndjugho ya muntu umwe, ndi ukare muruti wa rudi na lira lya muIsraeli?'' ²⁰ Mutjima wa muruti aghukara unahafa. Aghupu lirwakani, vakaruga vamundjugho, na vakarunga vakushonga, ano nko kuyenda noyo mbunga. ²¹ Makura avapiruka nakukayenda, avatura vanuke vavadidi, vimuna vyavo novyo vawekire kumeho yavo. ²² Opo vakunapire kadidi tupu na ndjugho ya Mika, vakafumu ovo vakaliro mumandjugho pepi na ndjugho ya Mika avavayita navantje, nakushupura vakaDana. ²³ Avayiyiri vakaDana, ano vavo avapiruka nakutantera Mika, ''Morwa nke munayitiri pamwe?'' ²⁴ Avaghamba, ''Munakavaka vakarunga ovo naruwana, munakaghupa muruti wande, nakukatwara. Vinke nka ovyo munantjuviripo? Morwa nke munakumpulira, 'Vinke vinakundjughotero?'' ²⁵ Mbunga yaDana ayimutantere, ''Kapi tunakukushanena ashi tukuyuvhe kuna kughamba kehe vino, ndi kuvhura vakuhomone vakafumu vamwe vaugara unene, ano ove na likoro lyoye kuvhura kumudipagha.'' ²⁶ Makura mbunga ya Dana ayiyendi na ndjira yavo. Opo avakengire Mika ashi nkondo unene kukwendi, apiruka nakukavyuka kundjugho yendi. ²⁷ Mbunga yaDana kwaghupire ovyo aruwanine Mika, kuturako nka waro muruti wendi, ano avaya kuLayishi, kuvantu ovo vakaliro mumpora na mulikungo kumwe na kuvahomona na marufuro ghamatwe nakushora shitata. ²⁸ Kwato umwe atupukiro po mukonda shasho kwakalire ure na Sidoni, ano vavo kapi vakalire namakuyuvho na kehe uno. Shasho kwakalire mumukunda pepi na Beti Rehobo. VaDana avatungu shitata kumwe nakutunga mo. ²⁹ Avashiruku shitata lidina Dana, lidina Dana lyanyakulyavo, ogho akaliro mona Israeli wa mukafumu. Ngoli lidina lya shitata olyo lyakaliro Layishi. ³⁰ Mbunga ya Dana avakutuliri karunga wakushonga. Jonatani mona Gerishomi wamukafumu, Gerishomi mona Mosesi wa mukafumu, ghuye navana vendi vavakafumu avakara varuti varudi rwa Dana dogoro kumayuva ghaghipika mushirongo. ³¹ Makura mpo kavatongamenanga karunga wakushonga wa Mika ogho aruwanino rwaro ruvede oro yayo ndjugho yaKarunga yinakara pa Shilo.