¹ Mushirongo sha ndundu sha Efurayimu mwakalire mukafumu, ano lidina lyendi kwakalire Mika. ² Avamutantere vawina, ''Vincencere 1,100 vya siliveli ovyo vakaghupa, ovyo wa ghambire mukufinga, nayuvhire - Kenga kuno! Nakara na siliveli. Ovyo navakire.'' Vawina ava ghamba, ''Karunga akutungike, monande!'' ³ Avyuta vincencere 1,100 vya siliveli kwa vawina ano vawina avaghamba, ''Kuna kupongwera siliveli yino kwa Karunga, mukondashi monande wa mukafumu mukushonga aruwane na kutenda shintjwantjo sha shikugho. Ano ngoli, kuni vikuvyutidira.'' ⁴ Opo avivyutire vimaliva kwa vawina, vawina avaghupupo vincencere mafere maviri gha siliveli nakughatapa kuvashambuli vikugho ovo varuwanino mukushonga nakutenda shintjwantjo sha shikugho, na kukashitura mundjugho ya Mika. ⁵ Mukafumu Mika kwakalire mundjugho ya vikarunga vya vipempa nakuruwana lirwakani na ndjugho ya vikarunga, kumwe nakukumuna monendi wa mukafumu mukukara muruti wendi. ⁶ Mumayuva ogho kapi kwakalire ko hompa muIsraeli, ano kehe uno kwaruwanine ngoli kehe vino ovyo vinamuwapo mushikenga mantjo gha mwene. ⁷ MuBetelehemu ya Juda mwakalire ngoli mukafumu ghona, wa mulira lya Juda, ogho akaliro muLevi. Ghuye kwakalire atikitemo virughana vyendi. ⁸ Mukafumu atundumo muBetelehemu ya muJuda aye nde nakukawana livango lyakutunga. Ano muruyendo rwendi, aya pandjugho ya Mika mushirongo sha ndundu sha Efurayimu. ⁹ Mika amupura, ''Kuni oko una kutunda?'' Mukafumu amutantere, ''Ame muLevi wa muBetelehemu ya muJuda, ano ame kuna kuyenda nishane livango oko ngani katunga.'' ¹⁰ Mika aghamba kukwendi, ''Kara name, nakukakara kwande sha na muruti. Ame ngani kupa vincencere vya siliveli murongo mumwaka, marupando gha vyuma, na ndya doye.'' Makura muLevi angene mundjugho yendi. ¹¹ MuLevi kwavihafilire vyakutunga nogho mukafumu, ano mukafumu ghona akara ngoli kwa Mika yira ghumwe wa vana vendi va vakafumu. ¹² Mika apongora muLevi mukuruwana viruwana vyakupongoka, ano mukafumu ghona akara ngoli muruti wendi, nakukara mundjugho yaMika. ¹³ Ano Mika aghamba, ''Weno nayiva ashi Karunga nganduwanena vya viwa. Mukonda yaghuno muLevi ogho ana karo muruti wande.''