¹ Simisoni ayendi kuGaza na kukamona mo mushondeli, ano nko kuyenda vakarare naye. ² VaGaza avavatantere, ''Simisoni mo anaya muno.'' VaGaza avakundurukida livango mukaholya-holya, avamutaterere matiku naghantje palivero lya shitata. Matiku naghantje avakumweneke. Avaghamba, ''Tumutatererenu dogoro mwi, ano ntani tumudipagha.'' ³ Simisoni arara mughuro dogoro pakatji kamatiku. Pakatji kamatiku arambuka nakudamuna livero lya shitata na ngundi dako mbiri. Alikoko mulivhu, makumba na navintje, akukambeke, nakuvitwara pawiru ya ndundu, kumeho ya Heburoni. ⁴ Kuruku yavino, Simisoni ayahoro mukamali ogho atungiro mu mukunda wa Soreki. Lidina lyendi ndje Delila. ⁵ Vapangeli va vaFilisiti avaya kwa mukamali, nakumutantera, ''Shongaghura Simisoni mukukenga nkondo dendi kuni dakarera, ano movino atwe ngatumudininepo, makura ngatuya mumange mukuya muhepeka. Viruwane vino, ano mwakehe uno wetu ngakupa 1,100 ya muwaya-waya wa siliveli.'' ⁶ Makura Delila atantere Simisoni, ''Nakanderere, ntantere ashi morwa nke wakarera ngoli nkondo, ntani weni mwakuvhura vakumange, vakudininepo?'' ⁷ Simisoni amutantere, ''Ntjene avamangita marughodi matano na maviri gha mateke ogho gha diro ku kukuta, makura nganidira nkondo nakufana yira kehe uno mukafumu.'' ⁸ Makura vapangeli va vaFilisiti avayitiri Delila marughodi ntambiri gha mateke ogho adiro ku kukuta, ano avamumangitako Simisoni. ⁹ Ngoli ghuye kwaholikire vakafumu mukaholya-holya, vakaliro munkonda yendi yimwe. Amutantere, '' VaFilisiti ovo vanakuyo kukoye, Simisoni!'' Ngoli ghuye andembaura marughodi yira wanda wa vyuma unakundamo kumundiro. Makura lihorameno lya nkondo dendi kapi danongonokire. ¹⁰ Makura Delila atantere Simisoni, ''Rupe runo mo wankonganga na kuntantera vipempa. Nakanderere, ntantere weni mwaku kudininapo.'' ¹¹ Amutantere, ''Ntjene ava mangita marughodi gha mape ogho vadira kuruwanita kuviruwana, nganikara kwato nkondo na kukufana na kehe muntu.'' ¹² Makura Delila aghupu marughodi gha mape na kumumangita ko, nakumutantera, ''Vafilisiti ovo vanakuyo kukoye, Simisoni!'' Vakafumu vakaliro mukutaterera vavo munkondwa. Ngoli Simisoni andemburaura marughodi mumaghoko mumaghoko ghendi yira wanda waudidi. ¹³ Delila atantere Simisoni, ''Dogoro ruvede rwakutika pani ngaunkonga na kuntantera vipempa. Ntantere weni mwakukudininapo.'' Simisoni amutantere, ''Ntje untunga vikoka vitano na viviri vya kumanga huki dande na wanda wakukutungita, nakushomamo shitungito mushikoka, ame kuvhura ngoli nifane yira kehe uno muntu.'' ¹⁴ Ano ghuye anarara Delila amutungu, Delila amutungu vikoka vyakumanga vitano na viviri vya kumanga huki dendi na wanda wa kutungita kumwe na kushomekema mo shitungito mushikoka, kumwe nakumutantera, ''VaFilisiti ovo vanakuyo kukoye, Simisoni!'' Arambuka arambuka muturo kumwe nakuyaghumuna wanda na shitungito muvikoka. ¹⁵ Delila amutantere, ''Weni ngoli mo ghu ghamba shi, 'Ame nakuhora,' Ove kuno kapi una kuntanterako lihorameno lyoye? Ove kuna nkongo rukando rutatu kumwe nakudira kuntantera omo danenepa nkondo doye.'' ¹⁶ Mayuva naghantje kwamutininikire unene na nkando dendi, ano ghuye kwamutininikre unene dogoro akuyuvhu yire afe. ¹⁷ Makura Simisoni aghamba navintje nakumutantera, ''Huki dakumutwe wande kapi vaditeta rumwe nakavemba, mukondashi ame nimuhungami wa Karunga kutundilira mulira lya vanane. Ntjeneshi mutwe wande ngavaghukurure, makura nkondo dande ngadi ntunda, nakupira nkondo mukukara kehe uno muntu.'' ¹⁸ Opo avikengire Delila ashi anamutantere ushiri kwanavintje, atumini mukukayita vapangeli va vaFilisiti, aghamba, ''Yiyenu ngoli, mukondashi ana ntantere navintje.'' Makura vapangeli va vaFilisiti avaya kukwendi, avamuyitiri siliveli oyo yakaro mumaghoko ghavo. ¹⁹ Amukumbwida arare turo pamatungi ghendi. Ayita mukafumu ayakurure vikoka vyendi vitano na viviri vya mu mutwe, ano nko kutameka kumuvhurapo, mukondashi nkondo dendi dinamutundu. ²⁰ Amutantere, ''VaFilisiti ovo vanakuyo koye, Simisoni!'' Arambuka mukurara kwendi na kughamba, ''Kunitundamo yira muvikando vyakuhupako na kukumangurura naumwande.'' Ngoli ghuye kapi aviyivire ashi Karunga antundupo pendi. ²¹ VaFilisiti avamukwata na kumutomaura mantjo ghendi. Avamughurumwita kuGaza na kumumanga navipandeko vya ngoporo. Avamutura atwange mundjugho yadorongo. ²² Ngoli huki dakumutwe wendi aditameke kukura kutunda opo vamukurulire. ²³ Vapangeli va vaFilisiti avakupongeke navantje mukudjamba ndjambo yayinene kwa Karunga wavo Dagoni, nakushamberera. Ava ghamba, ''Karunga wetu ana fundu Simisoni, munankore wetu, nakumutura mulipangero lyetu.'' ²⁴ Opo vamukengire vantu, ava fumadeke Karunga wavo, mukughamba, ''Karunga wetu ana kafunda munankore wetu nakumutapa kukwetu mudjonauli washirongo shetu, ogho adipagho vavangi vetu.'' ²⁵ Opo vadjobwanine, ava ghamba, ''Kayitenu Simisoni, ayatushepitepo.'' Ava kamuyita Simisoni atunde mudorondo nakuyavashepita. Avamurenke ayimane pakatji kangundi. ²⁶ Simisoni atantere mumati ogho amukwatiro kulighoko lyendi, ''Mpulitire nipapatere ngundi odo dakwato ndjugho, makura niyeyameneko.'' ²⁷ Ano ndjugho kwayulire vakafumu na vakamali. Vapangeli navantje va vaFilisiti navo mo vakalire. Kunkonda mbando kwakalireko vakafumu na vakamali paviha mayovi matatu, ovo vakengiliro omu anakuvadanena Simisoni. ²⁸ Simisoni akughu Karunga na kughamba, ''Hompa Karunga, mvhuruke! nakanderere mpameke ndoruno rwa kuhulilira, Karunga, makura nivyute rughoko rukando rumwe tupu mukuhanaura vaFilisite mukonda shi mantjo ghande maviri vaghupa.'' ²⁹ Simisoni akwata ngindi mbiri dapakatji odo dakwato ndjugho, nakuyeyemenako, lighoko lyendi lya rulyo kungundi yimwe, ano lya rumontjo kungundi ghunyayo. ³⁰ Simisoni aghamba, ''Ndenke nife na vaFilisiti!'' Akutonya na nkondo dendi ano ndjugho ayi mbandukiri vapangeli na vantu navantje ovo vakaliro mo. Ano vafimo ovo vaadipaghire opo afire vangi kupitakana ovo adipaghire ruvede ro ghuye muyumi. ³¹ Makura vaghuni vendi va vakafumu na navantje vamumundi wavashe avaghurumuka. Avaya mushimbi, mukumuvyuta na kukamuvhumbika pakatji kaZora na Eshitayoli mumayendo gha Manowa, vashe. Simisoni kwapangwire Israeli mwaka dimurongo mbiri.