¹ Kuruku yamayuva ghamangi, muruvede rwakuyangura rukokotwa, Simisoni aghupu shimpendje ghona mukuyenda akadingure mugholikadi wendi. Aghamba kwanaumwendi, ''Nashana kuyenda munkondwa ya mugholikadi wande.'' Ngoli vashe vamukamali kapi vamupulitire mukuyenda mo. ² Vashe vamukamali avaghamba, ''Ame naghayalire shi wamunyenga, mbyo namutapa kwamuholi ghoye. Mughunyendi wamukadona amupito muuwa, nakuvhura shi ndi? Ghupa mulivango lyendi.'' ³ Simisoni avatantere, ''Ruvede runo kunikara mupili ndjo kuhamena kuvaFilisiti opo nivayuvhita tjutju.'' ⁴ Simisoni ayendi nakukakwata vambwawa mafere matatu ano avamanga vaviri vaviri pamwe, mushira na mushira. Makura nko kughupa mini nakudimangerera pakatji kadimushira vanamanga pamwe. ⁵ Opo atulire kwa kehe mini mundiro, arenke vambwawa vayende mumafuva gha mbuto gha vaFilisiti, ano vambwawa kwasholire ndambo da mbuto na mumafuva ogho vadira kukesha, kumwe navikunino vya mandjembere navi vya maghuywe. ⁶ VaFilisiti avapura, ''Are anaviruwano vino?'' Avavatantere, ''Simisoni, tamweyi ya vaTimuni ovyo anaviruwanene vino mukondashi vaTimuni vaghupa mugholikadi waSimisoni nakumutapa kwa muholi wendi.'' Makura vaFilisiti avayendi nakukamushora mukamali kumwe navashe. ⁷ Simisoni avatantere, ''Ntjeneshi mbyo munaruwana vyo, name kuna kumuvyuta rughoko, ano opo nganimana kuvimuruwana, ame ngani shayeka.'' ⁸ Makura avatetaghura ruha na ruha, mbunda na matungi, mulidipagho lya linene. Makura aghurumuka ayende nakukatunga mulikwina lya liwe lya Etamu. ⁹ Makura vaFilisiti avaya na kuwapayika vita muJuda mukuyatura vakavita vavo muLehi. ¹⁰ Vakafumu vavaJuda avatanta, ''Morwa nke muna kutuhomwena?'' Vavo avaghamba, ''Atwe kuna kumuhomona mposhi tukwate Simiyoni, nakumuruwana yira momo anaturuwana.'' ¹¹ Makura vakafumu vaJuda mayovi matatu avaghurumuka kulikwina lya liwa lya Etamu, nakukatantera Simisoni, ''Kapi wayiva ashi vaFilisiti mbo vatupangerango ndi? Vinke ngoli ovyo ghuna turuwanene vya ngoweyo?'' Simisoni avatantere, ''Mbyovyo vanduwana, ano name mbyo navivaruwana.'' ¹² Avatantere Simisoni, ''Atwe kunaya tuyakumange na kukakutapa mumaghoko gha vaFilisiti.'' Simisoni avatantere, ''Ghanenu shi kapi mundipagha naumwenu.'' ¹³ Avamutantere, ''Hawe, atwe kutukumanga tupu na marughodi na kukakutapa mumaghoko ghavo. Atwe kuna kukutwenyidira shi kapi tukudipagha.'' Makura avamumanga na marughodi gha mape na kumughupamo muliwe. ¹⁴ Opo vayatikire ku Lehi, vaFilisiti avaya na kuyiyira mukugwanekera naye. Makura mpepo yaKarunga ayiya papendi na nkondo. Marughodi ogho akaliro mumaghoko ghendi kwakalire yira mushoni ghuna kupyo, kumwe nakuwako kumaghoko ghendi. ¹⁵ Simisoni arwanita na shifupa sharupanda rwa dongi rwa ruteke, kwarughupire na kudipaghitako vakafumu mayovi. ¹⁶ Simisoni aghamba, ''Nashifupa sha rupanda rwa dongi, kwapongayikire ndambo na ndambo, nashifupa sha rupanda rwa dongi kuna dipagha vakafumu mayovi.'' ¹⁷ Opo amanine Simisoni kughamba, avhukuma shifupa sha rupanda, ano aliruku livango olyo Ramata Lehi. ¹⁸ Simisoni alimukwata linota unene ano nko kutakumina kwa Karunga nakughamba, ''Ove unatapa lifundo lya linene kwa mupikaghoye. Ngoli kuvhura nife kulinota ngoweyo nakuwera mumaghoko ghovo vadira kuruwana vya vamba ndi?'' ¹⁹ Karunga ayashameke likwina palivango olyo lya Lehi ano mema kuna kupoposha. Opo anwine, nkondo dendi adivyukirimo na monyo wendi ntani unakuya mo. Makura aliruku lidina olyo livango Eni Hakore, ano nelino liyuva mpolili pa Lehi. ²⁰ Simisoni kwapangwire Israeli mumayuva gha vaFilisiti mwaka dimurongo mbiri.