¹ Simisoni aghurumuka kuTimuna, ano oko akamonako mukamali, ghumwe wa vana-kadona vavaFilisiti. ² Opo akavyukire, atantere vashe na vawina, ''Nakakenga mukamali muTimuna, ghumwe wa vana-kadona vavaFilisiti. Renkenu mukamungupire akare mukamali wande.'' ³ Vashe na vawina avamutantere, ''Kwato nka mukamali mukatji kavana valikoro lyoye, ndi mukatji kavantu vetu ndi? Vinke ngoli ghuyendera ghukaghupe mugholikadi wamuFilisiti ava vadira kuruwana vyavamba?'' Simisoni atantere vashe, ''Kamungupirenu, mbyevishi opo namukenge, ana ndjendi kumutjima.'' ⁴ Ngoli vashe na vawina kapi vaviyivilire ashi vino vininke kuna kutunda kwa Karunga, mukondashi kwashanine kutulitapo vita kumwe na vaFilisiti (mbyevishi shirugho sho vaFilisiti kuna kupangera Israeli). ⁵ Makura Simisoni aghurumuka kuTimuna na vashe na vawina, ano avayatiki pashitata shavindjembere shamuTimuna. Ano nko kukenga, ghumwe wavanyime ghona ana kughurumuko na kumughonena. ⁶ Mpepo yaKarunga kadidi tupu ayimuyere, ano nko kumupapanyime naghureru yira mo vapapaghuranga kampendje, ano kwato ovyo vyakaliro mumaghoko ghendi. Ngoli kapi akavitantilire vashe na vawina ovyo akaruwanine. ⁷ Ayendi nakukaghamba nogho mukamali, ano opo akamukengire, amuyendi Simisoni kumutjima. ⁸ Opo apitire tupu mayuva gha ngandi mukukavyuka ko ayamukware, ashenduka mukukakenga ghughoredi wa nyime. Ano, nko kukakenga, munakara linkiti lya mpuka ano ghushi ghuna kara murutu rwa nyime oro ashuvirepo. ⁹ Aghuparapo ghushi nalighoko lyendi nakutwikira ndjira yendi, ghuye mukulya na kuyenda. Opo ayatikire kuvashe na vawina, atapa ko ghumwe kukwavo, ano vavo avali. Ngoli ghuye kapi avatantilire oko anaughupu ushi ashi kwakalire rutu rwa nyime ogho vashuvire. ¹⁰ Vashe vaSimisoni avaghurumuka oko akalire mukamali, ano Simisoni atura shiito nkoko, mukondashi yino ndjo mpo yavanuke vavakafumu. ¹¹ Valikoro lyamukamali tupu vavikenga, avakamuyitira vaholi vavo vayakare naye. ¹² Simisoni avatantere, ''Renkenu tanko nimutantere litambu. Ntjeneshi ghumwe wenu aliwane nakuntantera lilimbururomumayuva ntambiri ghashipito, nganimupa marughodi ghamakeshe dimurongo ntatu narupando rwa vyuma dimurongo ntatu. ¹³ Ngoli ntjene kapi muntantera lilimbururo, makura anwe muna hepa kumpa marughodi gha makeshe dimurongo ntatu narupando rwa vyuma dimurongo ntatu.'' Vavo avamutantere, ''Tutantere litambu lyoye, makura tuliyuve.'' ¹⁴ Ghuye avatantere, ''Vyatundo muvilya kwakaramo vininke vyakulya; vyatundo munkondo kwakaramo vininke vyautovali.'' ¹⁵ Muliyuva lyaune avatantere mugholikadi waSimisoni, ''Kashongaghure nturaumbo yoye mposhi akatutantere lilimbururo kulitambu, ndi kuvhura tukushorere na ndjugho yavasho. Nani ve kunaturekere mukuyatutura muruhepo?'' ¹⁶ Mugholikadi waSimisoni atameke kulira kumeho yendi, aghamba, ''Navintje ovyo unaruwana wanyenga! Kapi wahora. Ghunatantere litambu kuvantu vande vamwe, ngoli kapi unantantere lilimbururo.'' Simisoni amutantere, ''Kenga shi, ntjeneshi kapi natantere vavava ndi vanane, kuvhura nitantere ve ndi?'' ¹⁷ Ano ghuye kwakalire mumayuva ntambiri ogho akaliro shipito. Muliyuva lya untambiri amutantere lilimbururo mukondashi kwamutininikire unene. Ghuye akatantera lilimbururo kuvalikoro lya vantu vendi. ¹⁸ Kumeho liyuva likatoke muliyuva lyauntambiri vakafumu vamushitata avamutantere, ''Vinke vyavitovali unene vyapito ushi? Vinke vyankondo unene vyapito nyime?'' ¹⁹ Makura mpepo yaKarunga kadidi tupu ayiya paSimisoni na nkondo. Simisoni aghurumuka kuAshikeloni nakukadipagha vantu vavo dimurongo ntatu. Aghupu vidwata vyavo vyavo, nakuvitapa vidwata vyavo kuvantu ovo vafwatuliro litambu. Aghuhwama ugara, akanduka kumundi wavashe. ²⁰ Mugholikadi waSimisoni avamutapa kwamuholi wendi wamunene.