¹ Mbunga yaIsraeli ayiruwana nka vyavidona mushikenga mantjo gha Karunga, ano kuvatapa mumaghoko ghavaFilisitei mwaka dimurongo ne. ² Mwakalire mukaffumu wamuZora, walira lyavaDana, walidina lya Manowa. Mugholikadi wendi kapi avhulire kukara marutu maviri ano makura kapi ayitire mona. ³ Muengeli waKarunga amonekere mukamali nakumutantera, ''Kenga shi, ove kapi wa karanga marutu maviri, kapi wayita mona, ngoli ngokara marutu maviri nakushampuruka mona wamumati. ⁴ Kutunda pano takamita nakunwashi vinyu ndi vinwa vya nkondo, na kehe vino vyanyato nakuvilyashi. ⁵ Kenga, ove ngokara marutu mari nakushampuruka mona wamumati. Kwato kavemba oko ngo ruwanita kumutwe wendi, Mukondashi mwanuke ngakara muhungami kutundilira mulira lyavawina, ano ghuye ngayatameka kuyoghora Israeli mumaghoko ghavaFilisiti.'' ⁶ Makura mukamali ayendi nakukatanterako nturaghumbo yendi, ''Muntu waKarunga anangwano, ano rumoneko rwendi yira rwa muengeli waKarunga rwakutjilita unene. Kapi namupura oko anatundiliri, nalidina lyendi kapi analintantere. ⁷ Ghuye kunantantere, 'Kenga! ove ngokara marutu maviri, nakushampuruka mona wamumati. Ano ngoli nashanwa vinyu ndipo vinwa vyankondo, na Kehe dino ndya odo vatwenyanga paveta ashi danyata nakudilyashi, mukondashi ogho mwanuke ngakara muhungami waKarunga kutundilira ruvede oro ana kara mulira lyoye dogoro liyuva lyamfa dendi.''' ⁸ Makura Manowa akanderere kwaKarunga nakughamba, ''Nane, Hompa, nakanderere renka muntu ogho watumine aye nka shimpe kukwetu ayaturonge ashi weni omo ngatumuruwana ogho mwanuke ngavashampuruka ntantani.'' ⁹ Karunga ayuvhu liywi lya Manowa, ano muengeli waKarunga aya kwamukamali nka waro ghuye anashungiri mulifuta. Ngoli Manowa vyendi kapi akalire naye. ¹⁰ Makura aduka wanguwangu nakukatantera nturaghumbo yendi, Kenga! mukafumu ana kamonekera - ndjeghunya ayiro kukwande liyuva linya!'' ¹¹ Manowa ashapuka nakukwama mukamali wendi. Opo ayatikire kogho mukafumu, aghamba, ''Ove mukafumu ogho ayaghambiro namukamali wande ndi?'' Mukafumu aghamba, ''Am.'' ¹² Makura Manowa aghamba, ''Ano ntjene nkango doye ngadikara ushiri. Weni omo ngadikara veta dogho mwanuke, naviruwana vyendi weni omo ngavikara?'' ¹³ Muengeli waKarunga atantere Manowa, ''Mukamali ghoye ana hepa kutakamita nawa kwanavintje ovyo namutantilire. ¹⁴ Nakuvhurashi anwe vinyu ndipo vinwa vyankondo ndi alye kehe vino vyakunyata. Ana hepa kulimburukwa kwanavintje namurawiri ovyongaruwana.'' ¹⁵ Manowa atantere muengeli waKarung, ''Nakanderere taterera kadidi, mukupako ruvede tukuwapayikireko shimpendje ghona.'' ¹⁶ Muengeli waKarunga atantere Manowa, ''Mpili nikare, kapi nilya ndya danu. Ngoli ntjeneshi mudiwapayikire ndjambo yakushwakerera, yidjamberenu kwa Karunga.'' (Manowa Kapi ayivire ashi ogho muengeli waKarunga.) ¹⁷ Manowa atantere muengeli waKarunga, ''Are lidina lyoye, makura atwe ngatukufumadeka opo ngaditikamo nkango doye?'' ¹⁸ Muengeli waKarunga amulimburura, ''Morwa nke una kupulira lidina lyande? lyakutetura!'' ¹⁹ Makura Manowa aghupu shimpendje ghona na mbuto ya ndjambo nakuvidjambera paliwe kwaKarunga. Aruwana vininke vyaliteturo vavo vaManowa na mukamali wendi kuna kukengera . ²⁰ Opo ghayeraghukire maraka ghamundiro muwiru ghatunde pashidjambero, muengeli waKarunga arondo ayendere mumaraka gha mundiro gha pashidjambero. Manowa Na mugholikadi wendi mukuvikenga vino ano nko kukuganda vatwe vipara vyavo mulivhu. ²¹ Muengeli waKarunga kapi amonikire nka kwa Manowa ndi kwaa mukamali wendi. Kutunda po Manowa mpo adimbwilire ashi oghunya muengeli muengeli waKarunga. ²² Manowa atantere mugholikadi wendi, ''Tunafu, mukondashi tuna mono Karunga!'' ²³ Ngoli mugholikadi wendi amutantere, ''Ntjeneshi Karunga kunashana kutudipagha, ndi kapi ana vhuru kutambura ndjambo yakushwakerera na ndjambo ya mbuto oyo tunamupa. Ndi kapi ana vhuru kutunegheda vininke navintje vino, nampiri ruvede runo ndi kapi antupulitiri kuyuvha vinya.'' ²⁴ Kuruku mukamali ashampuruka mona wamumati, amuruku lidina Simisoni. Mwanuke akuru ano Karunga amutungiki. ²⁵ Mpepo yaKarunga ayitameke kumuyendita muMahane Dana, pakatji ka Zora na Eshitaoli.