¹ Aci ke da ramik i kunu gǝnawa kame kullum akshi da dlam magita fatawanke gǝshak shi da tatla bai. ² aci maya, "li ɗa ɗagai na baci kagala ɗagai wara a kaluk Sǝku bai, a lawan martapa ndawa ke bai. ³ Na gudugum ɗagai a ɗa tǝngu. wara atu a jibe nye i ri gǝri, atu a rame ci maya. 'A latayu ba nazǝgi dǝvu wara na bi na adalta darik makur ga nai.' ⁴ Sukwakwin gara aci ancu lata gara bai, amman dakugu, ⁵ se de rami i kuni gǝshi gǝri, 'ka gaɗe na Sǝku bi yaye, na martapatak ndawe ke bai. ⁶ Se mǝgǝnyi da ram maya "A kǝmi na be wara ba ci kagala wara na jirewa bai a ramau. ⁷ Gususku kasau Sǝku a ngumuk ndawa wa aci cikɗakshi bai wara a dlame ci adan dǝvǝɗ na afa i ɗak be wara kakshi? Aci a ngǝstan gǝri i ri latakshi? ⁸ Na rame kun aci a dlama dikshi bik jirewa kaɗe kaɗe. Amman lakwtu wara wǝn gǝnǝn de nin, a tasayi na jirewa bi i kunuk duniya?" ⁹ Zam aci da dlam rama na gǝnawa i ndawa wara akshi a muwak gagzhin ndawa ¹⁰ "Ndawa ɗagai shirin da tufa i kunuk sǝsu magita gaɗa akshi da dlam magita-gayi nǝn Farisa gayi ke baci gǝnyi arajo. ¹¹ Se nǝn Farisau da tle dayi da dlam magita i ɗak be wara ke aɗa gǝri. 'Kakasǝku, na godeti ci. gaɗa iyu ka ki gagǝzhin ndawa a mbamba, ko nda buka adalta. Ko ndak tapai, ko ka kǝ ba ci ganyi arajo tǝku. ¹² Magi tawanke na dlamak asham zǝgǝr shirin. Na dik zakka da kunuk mak be wara na bau.' ¹³ Amman ba ci gǝnyi arajo tǝn dayi pǝdǝm dǝma sukta aɗa gǝri i dǝsku bai, se da jǝb kǝma adla gǝri, aramau maya, 'Kakasǝku, a dlama a ni kanjino, iyu ba ci aipu." ¹⁴ Na rame kun, maran gu kata i wǝnduwa gǝri ga tǝptak ka ki waro gayu bai, gaɗa dik nǝn wara sukta aɗa gǝri, nda kaci na aci i di ɗa, amman duk nǝn ware a sǝna aɗa gǝri nda sukta na aci. ¹⁵ Se ndawau ani na kulaɓaɓin shi gaɗa aci da lintakshi, pukuraucin gǝri ika kasu tunu, akshi da garnyi ɗakshi. ¹⁶ Amman Yeso da ɗaure akshi i ri gǝri, da ramikshi maya. "Aivina mamu gangamin dani i ri ga. kwa daptakshi bai. Ai garve sǝku kǝ zadakshi. ¹⁷ Na rame kun jirewa, duk nǝn wara gǝnu garva sǝku ka kǝ mayim gamgam binǝn. lalle aci a tafu bai." ¹⁸ Baci garva dagai da jaya ci maya, "Malǝm ba ci mugurum, na dlama gǝmo nabi aro wara go dadigiri?" ¹⁹ Yeso da rami ci maya, "ka daura yu ba ci mugurum gaɗa gǝmo? Na baci mugurum bai se sǝku rugǝri. ²⁰ Aturo ka zǝga na linok gu ka dlama tapi bai, ka tǝka nangaiwa bai, Ka dlama kǝra bai, ka dlama wudak ngadar bai. a saksakeci afǝk ci na mii ci." ²¹ Se ba ci garvau da ram maya. "Jandu taku na ciriptudu tun lakwtu " ii mapǝndi." ²² Yeso kǝmǝ kasan tuni, da rami ci maya. "Gaze cin be getak. Dolle ka ɗǝɓdina lǝman ci mak, ka ɓǝri di ndak tluwa, ka bina lǝman wam i dǝsku-ka kate ka ɗi ga yu. ²³ Amman ba ci garvau kǝma kasǝn tunu. Se da dlaɓan gǝri na gǝshi aiwa tlapar, gaɗa aci baci bǝrǝɗ tlapar. ²⁴ Se Yeso, ika gǝshi gǝri dlǝmatǝn gara tǝnu, da rami ci maya. "A dlaɓa tǝta ndak bǝrǝɗ da tafi i kunu garva sǝku! ²⁵ A dlaɓan gara na ramaa i dlǝgǝmau da tǝfi da tǝn alibǝram. i ɗak baci bǝrǝɗ da tǝfi i kunu garva Sǝku." ²⁶ Ndawa wara kǝma rama tunu se akshi da ram maya, "In de kasan nin abi raa nin tai? ²⁷ Yeso da Wuri maya, "Be ware rǝma na awayu gǝnǝn a dlaman gara i ri sǝku." ²⁸ Se Bitrus da ram maya, "To so tai ja bǝzu na lǝman ja dǝgi na ci." ²⁹ Yeso da ramik shi maya. "Jirewa, na rame kun na nǝn ware aiva wǝnduwe gǝri bai ko ama gǝri ko yaganaucin gǝri, ko afǝk gǝri na mii gǝri, ko kutli gǝri gaɗa garva Sǝku. ³⁰ sannan da buka na nuba gǝri gawa i kunu duniya tǝku na aro wara go dadigiri i duniya mi ni." ³¹ Daku wara aci cacpǝ guma ayawo shirin gu, da ramik shi maya. "Sotai, wa tǝke rakan i nye Urushalima, be wara nda tarni iɗak wǝn gǝnǝn mak da amik nabaucin a dlama nakshi tabbas. ³² Atǝro nda barna aci i ndawa mara zǝga Sǝku bai, nda dlami ci muwa, nda ba ri ci bone nda tǝkwi ci nanuk. ³³ Akshi a dlame ci guzapunak aci a tǝkna aci a dǝk yǝwan ma kwan ke a tlayin gǝri." ³⁴ Amman akshi sanuti ko gayi da kunak be wara aci ramikshi bai, gaɗa nda dǝbsa na ramau da rikshi akshi sanutu be wara aci a ramik shi bai ³⁵ Aci de i dantau Jeriko tunu, se so tai zǝgǝɗ ɗaga da mbasu i baka dǝvu atka wili, ³⁶ aci kama algi a nuta tunu, se aci da jayakshi ma awakatan tam. ³⁷ Akshi da rami ci ma a nuta nǝn Yeso kǝ Nazarat ³⁸ Se zǝgǝɗ gu da tlatle wura gǝri na awayau maya, "Yeso, Wǝn Dauda, a dlama ni kajino." ³⁹ Se ndawa a kǝma da gaɓɗa ci ma da bǝzaman gǝri. Amman da sukci wura tlapar i dǝsku maya, "Wǝn Dauda, a dlama ni kanjino." ⁴⁰ Se Yeso dar'i, da ɗawi ndani na aci i ri gǝri. Dlǝgǝɗ gu de i damtu tunu, se Yeso da jaya ci, ⁴¹ "Kan cu na dlami ci tam?" Aci da ram ma "Mǝgǝnyi, nanci na dlam lawan." ⁴² Yeso da rami ci maya "A dlam lawan. Barik jirewa ci ngatu na ci." ⁴³ Aci da bǝna lawan i miyak da, aci da ɗǝgǝna Yeso, a dlama saksakta i Sǝku Ndai ke kasǝn tǝn, Se algi mak dajiɓ ma aɗa sǝku.