¹ Se Yeso da rami pukaraucingəri ma, katanas, bik ɗawau wa dlam aipu ani, amman wadarre i nən warra biwu ani da rigəri. ² Arəmudi bəlan, ngalko nda takwshi vənyi i wəra warrau, nda vərki na aci i kun madlarram, da miya aci da ɗawi ko gayi da kunu mamu gangamin təku da dagami. ³ A ankaltina aɗakun pa! Yaganaci dlamici bike nin, a dlamici gabaɗ, dlamiici tubi nin, a tupti dici. ⁴ Ko aci dlamici bike zəgər gatkasa i gafa gayi, aci ramici zəgər gatkatkasa ma, 'Na tubi!' nin, dolle ka tuti dici!'" ⁵ Se muwanaucingu da rami məgenyigu ma, "A sukunyi ja iman ja!" ⁶ Se Məgənyi da ramma, Imankun bata na ayawa mustad nən, kwa dəmu na rame marəm waka təku ma, "A pici nakum, ka kumi nakəm i kunu madlarram nin,' a dlama dikun nakwana. ⁷ To nən tai kunakun, na gabayi warra a dlameci puɗa ko dawa tumamkin, kateu da pata nin a rameci bi ma, 'Kaɗe a mbashi ka cii abən? ⁸ Baci wənduwau a rame ci bai ma, 'Dugo a sapərrata bee naci, ka dlam ɗamara, ka dlamanai guzapəna, harr se na damu tau na sau. Se da kugu dəgo kaci ka shi? ⁹ Acu a dlama sambarrka i gabayu bai, ko gaɗa dlamna be mi nda ɗawaaci da dlami gu? ¹⁰ Kun camkasən, kwa dlama na bee warra nda ɗawukun kwa dlami nin, kwa dəmu na ramau ma, 'ai ja gabayayin jaɓ, atərro ja dlamu wana warra kamatu ja dlami rrugara.'" ¹¹ Gafo ɗagai Yeso aye Urrushalima tənu, se da dəvu mi a gadavak Samarriya na Galili. ¹² Aca təka təfe ɗa pata ɗagi tənu, se aci da tase agurrdadəmamin ɗagai guma. Akshi da rrə'yi pəɗəm na aci, ¹³ se da sukci wurakshi dəsku, a ramau ma, "Yeso, Məgənyi, a kəmi kanjino ja." ¹⁴ Yeso ikakshi tənu, se da ramikshi ma, "Ada kwa tatki aɗakun i perissaucin." Akshi a təka rakan i nya tənu se dacelti nakshi. ¹⁵ Gayi da kunakshi ikau aci ngatungəri tin, se da məstai da akau, na wura marəm a saksakta Səku. ¹⁶ Da gutki i damtu zəgər Yeso, da dlamici sambarrka. Aci nən Samarriya. ¹⁷ Se Yeso da jayi algu, ma, "Nda cəltu hdawa guma bai? Arawan kuɗkuvdau? ¹⁸ Go jəgab wara kateu da bari sakərrta i Kakasəku, banda magərafcin təku? ¹⁹ Aci da rami warrau ma, "Atlu, ka yi bici. Imanci dlamu naci akəlappiya." ²⁰ Gafo ɗagai, Parrisaucin da jayi Yeso ma, "Garva Səku ani fatawan? Se Yeso da wuri ma, "Kwa dəmu sanuta ni garva Səku na dabai. ²¹ Ko nda ramaobai ma, 'Sotai! ko 'Sitai!' Gaɗa garva Səku a witakun." ²² Se da rami pukurraucingəri ma, "Lakwtu aye ni, mi kwa ye pətkən lawan gayi da kunu yuwan gawa kə wəngənən, amman kwa lawnau bai." ²³ Ndawa aye ramekun ma, 'Aiki ritiu!' ko 'Aiki ritku! Amman kwa vəra bai ko kwa rawi ɗəgau. ²⁴ Atərro ni Wəngənən adlaɓa i kun yiwan gəri ka wiɗa mi a ɓidla i dəsku da baka gayi i nye baka dama. ²⁵ Amman Səkurr, dolle aci da shi bone bee gawa, ndak zaman təku ke da kurna aci. ²⁶ Ka mi wakatu i zaman Nuhu, kasən ke a wakata i kun lakwtu ni Wəngənən. ²⁷ Ndawa jəb tak ta, na sak sa, ke a zəba, a baru kutlikshi i zəba, harr gafa mi Nuhu təfi kunu sawu am, se so ganjau danai danci nakshi mak. ²⁸ Kal kal kakə zaman lutu ke, ndawa a təka ta, na sa, a masa a ɗəbət, a zəgəm, a ləma. ²⁹ Amman lakwtu warra bəzu kunuk ɗa sadom, aka da vəgai da dsku da cinakshi mak. ³⁰ "A dlaɓa kasən ke, gafa mi nda tatku pakayi Wəngənən. ³¹ I gafogu, kwaiva nən mi a ɗak sau da fuwine ɗa bai, i ngwa karregəri da kunu wəduwau, kasən ke, Ke kaiva nən mi a pata da katai i wənduwa bai. ³² A tanina ama Lutu ba! ³³ Tike mi a maka cərəpta arrogəri nin, a bukadu, amman tike mi buku arrogəri gaɗaga, aye ra du. ³⁴ Na remekun, i dəvɗgu, nən shirin aye dlaɓe ɗa rakai gayi. Nda ma na gayi, ndaivi na gayi. ³⁵ Amatin shirin aye naya i ɗagayi. Ndaye ma na gayi, ndaivi na gayi. ³⁶ [Gaamsak shirin ke adlaɓa a pata, nda ma na gayi, ndaivi na gayi.]" ³⁷ Se pukurraucingu da jayaci ma, "Bitku a dlaɓa a rawan, Məgənyi?" Se Yeso da ramikshi ma, "Ri warra guvu a riwu , ai dishaucin ke a cacpa i ɗagayi."