¹ Yeso təfu da nucin gəri da kunu Jerico. ² Na nən ɗagai dləgun gəri ma Zakka. Aci dəgəm chachpa arajo baci bərəɗ ke. ³ Aci a makau daiki Yeso nən tai, amman a dəmu daiki bai gaɗa aci gwavgwən. ⁴ Se aci vəri na rawa da gayin gəri a waka ayawu gaɗa aci daiki Yeso a nuta nən. ⁵ Lakwtu wara Yeso de i riwu tən, aci dai ki dusku da rami ci maya, "Zakka, a fuwen i ɗa kaɗe kaɗe atəro gusku na fuwa i wunduwa ci." ⁶ Se aci da fuwe kaɗe kaɗe daɗa da gənya ci na pərɗai. ⁷ Lakwtu wara ndawa mak ika kasu tən, akshi da jib ngurngur, maya, "Aci jin gəri i wunduwa baci aipu." ⁸ Zakka da tli da rami Məgənyi , "Aiki, Məgənyi, na bar na reta ləman ga i ndak tluwa, in na zalumtə nən tawan ke nən, na ngumu dici zəgər fuɗu." ⁹ Yeso da rami ci maya, "Gusku raa dengara i wunduwa ci, gaɗa aci cham wun Ibrahim. ¹⁰ Atəro Wun Gənən dew da maki zam dari ndawa wara ɗayinakshi." ¹¹ Akshi kəma bitku tənu, aci da ramikshi, dlamikshi rama i kunu gənawa gaɗa aci a damtu nye Urushalim, akshi a kuraram garva Səku gaza gawa bai da paken gara kususku. ¹² Aci maya wate, "Nən ɗagai baci ankal ju i kunu fak lardə tiwu da gənyi garva i aɗa daku guda katai. ¹³ Aci da ɗaure guma da kunu gabayayin gəri, da barik shi pam guma guma da ramikshi maya, "A dlamina asək se na kateu." ¹⁴ Amman nda gəri da kuru na aci se da wane ndawa iri gəri, maya, "Jancu nənan gu da dlami garva i aɗa ja bai." ¹⁵ Lakwtu wara aci kate tən, harr aci da gənna garvau, aci da rami i guzaɓcin gəri wara aci barik shi dagwdau nda ɗaurek ci akshi gaɗa da zəgi sukuna nawan akshi bau darik asək gu. ¹⁶ Kə sukur dani i kəma gəri, da rami ci maya, Məgənyi, pam guma ci iwe na pam guma wam. ¹⁷ Baci garvau da rami ci maya, "Use gabayi bəlan. Gaɗa ka dlam na jirewa i kunu be rap, ga dlaɓa naci baci garva i aɗak be gawa. ¹⁸ Masirin gu danai da ram maya, pam ci, Məgənyi iwe pam vaɗ wam. ¹⁹ Baci garvau da rami ci maya, "Ka dlama naci baci gaeva iɗak ɗa marmamin vaɗ." ²⁰ Dama danai, maya, Məgənyi,Sotai pam ci, wara nanpadu bəlan i kunu kare ga, ²¹ atəro na kalu ci , gaɗa kəmu miya ci təta. Kama na be wara kampa bai,ka karam be wara ka zəgəm bai. ²² Baci garvau da rami ci maya, "Dayrik təlam ci na kagalatə na ci, ci munafuk guzuɓ, ka zəga du kəmu miya ga təta, na ma be wara nan pa bai, na karmə be wara na zəgəm bai. ²³ Wate gaɗa gəmo ka pa dagwda ga i kunu baitalmani bai, gaɗa lakwtu wara na kate nən nan gu du go sukuna? ²⁴ Baci garvau da rami ndawa wara dar'i a riwu, "A gənina na pam dari gəri, kwa bar di nən wara na pam guma. ²⁵ Akshi da rami maya, məgənyi aci na pam gumau." ²⁶ Na rame kun, nən tawan ke wara na be nən nda bari ci gawa amman nən wara na atə bai nda gənyi na be wara na atu. ²⁷ Amman ndawa wara ancha yu bitku, anchu na dlama garva bai i aɗak shi, anna na akshi i ritku kwa rəbəna akshi i kəma ga. ²⁸ Lakwtu wara aci ram bitku mak, aci dayin gəri i kəma, dayin gəri fak i Urushalima. ²⁹ Dlaɓən gara wara aci de i damtau Betfaji na Baitanya, i ɗa guguyak wara nda ɗauro ma Zaitun, aci da wanyi bukuraucin gəri shirin. ³⁰ "Ade kunu ɗa tiwu. Kwa təfa nən kwa bi matkam kwara wara ngalte nda gayi bai. A fətkina kwa ni da aci." ³¹ Akshi jayi kun nən, kwa fətkau gaɗa gəmo, A ramina ma "Məgənyi wane ja." ³² Ndawa wara nda wanak shi dayi da be matkam kwarau kakə wara Yeso ramik shi. ³³ Akshi a fətka matkam kwaro tən, baci matkam kwarau da ramikshi maya, "Kwa fətka matkam kwarau gaɗa gəmo?" ³⁴ Akshi maya, "Məgənyi ancu." ³⁵ Akshi dandi Yeso, akshi da pərci na karek shi iɗa matkam kwarau, dampən na Yeso i aɗau. ³⁶ Akshi aya tən, akshi da sərmi karek shi i aɗak duvu. ³⁷ Aci a zaden gəri i damtuk fuwayi da guguyak Zaitun, pukuraucin mak da jib pərɗai na ma aɗa Səku na wura i dusku kə wana ajab wara akshi ikau. ³⁸ Maya, Barka kasaktən gara iɗak Dəgəm wara deu i kunuk dləgun Məgənyi! Salam a kunu dəsku na saksakta na kərmai tlapar. ³⁹ Farisaucin gu jigaɓ da rami ci maya, "Maləm, a gəryi iɗa pukuraucin ci." ⁴⁰ Yeso da wurik shi maya, "Na rame kun, in bitku mak bəzamu nakshi nən, guguyayin a gərna nakshi." ⁴¹ Lakwtu wara Yeso de i damtuk ɗa gu, aci da pi saurai i aɗa ɗa gu. ⁴² Maya, da kwa zəga na gafa təku nən, ko kun yaea, be wara anidi kun salm! Amman gususku akshi dəpsə du da daa kun. ⁴³ Atəro yuwan gu ani iri kəm, lakwtu wara makurarin kun a ləma na garu i aɗakshi da vaikəna kun, da jikti da baka tawanke. ⁴⁴ Akshi a jiba karan kun da wayi na kuni gagai na mamu kun cham. Akshi a bəza ko guguyak gayi bai iɗa gayi gaɗa kwa sanutə bai lakwtu wara Səku anci da ɗauri kun. ⁴⁵ Yeso da təfu i susu magita da jib rakan nda dəbəɗ kare. ⁴⁶ A ramek shi maya, Da tarna, "Wunduwa ga a dlaɓa wunduwa magita, amman kwa məstədi vuk ndak pashi." ⁴⁷ Wate Yeso a gugze ndawa fatawanke i kunu susu magita. Dəgəm Farisaucin na ndak taran na nda təfe kəmak ndawa anci da təkə na aci, ⁴⁸ amman akshi ba duvu dlamo bai, gaɗa ndawa mak a kərəmta gəri tlapar.