1
Ja ɓuru da rikshi tǝnu, ja jǝb rakan i kun sawu aam, ja ɗǝmi dǝvu nye marǝm ɗa Kos, ɗa tlanu se marǝm ɗa Rradusa, da sǝn se marǝm ɗa Batarra.
2
Ja ba suwa aam mi a nye Fosiya tǝnu, se ja tǝfi kunu, ja jǝb rakan.
3
Ja duguri jigam kun aam Kuburrus tǝnu, se jaivi na atu i madlawai, ja bari naja i dǝvu Suriya, ja fǝwi i marǝm ɗaTaya gaɗa sawu aam gu a wǝrrta kakǝra gara i riwu.
4
Lakwtu ja bau pukuraucin tenu, se ja mbashi i riwu kǝ yiwan gatkasa. Pukuraucin gu da rami Bulus da ri Nǝnwa Sǝku maya; aci da ɗaɗa zǝgǝr gǝri i Urrushalima bai.
5
Aku ja dlamu yiwan gawa tǝnu, se ja ci kǝma na rakan. Akshi mak; na amatinshi na mamukshi da gurvi ja i dǝvu harr aku marǝm ɗagu. Se ja pi kufaja, ja dlam magita, ja dlam anya i gatuja.
6
Se ja tǝfǝ naja i sawu aam, akshi da kalakcinakshi wǝnduwa.
7
Ja damu na buwau da ɗak Taya tǝnu, ja zadai i ɗa Talamayas. I ritnǝu, ja ndǝmi yaganacin nda ɗǝga Yeso, ja zǝdapi rikshi kǝ yiwan gayi.
8
Ɗatlanu ja tli ja yi naja i ɗa Kaisarriya.Ja tǝfi wǝnduwa Filibus, baci wazeǝk rama herr, gayi da kun gatkasau, se ja mbashi na aci.
9
Warrau na dabapkin huɗu mi zǝga gǝmsǝk bai a wenduwa gǝri, akshindak rama bee mi aye wakata.
10
Ja mbasi riwu kǝ yiwan rap tǝnu, nabi ɗagai baci dlugun Agabus deu da Yahudiya.
11
Danai i rikshi, da mi bik tawas aku Bulus, da taushi na amigǝri na zǝgǝr gǝri, da ramma, "Nǝnwa Sǝku ram maya, 'Kasau yahudaucin kun Urrushalima aye tawas na baci bi tawas tǝku, da da bari na aci i ami ndawa mi zǝga Kakasǝku bai.'"
12
Ja kǝma bayangu tǝnu, ja na ndawa mi a mbasu a riwu mak , ja bari kanadi Bulus da daa i Urrushalima bai.
13
Se Bulus da ngumu ma; "Kwa dlama sau gaɗa gǝmo, kwa aɗan kwa kǝtli daa gǝshi ganai? Iyu rro ga sapǝrratak gaɗa tawas jaɓ bai, amman harr na mutu i Urrushalima, gaɗa dlugun Mǝgǝnyi Yeso."
14
Bulus kurna nzǝma warra nda dlameci tǝnu, se jaivi na aɗangu ja ramma, "Aivi kǝlete Mǝgǝnyi da dlami(Bee mi Mǝgǝnyi ancu tǝnu, da dlaɓa)"
15
Da ku lakwtu, ja ngwi na jakakinja, jayi naja i Urrushalima.
16
Pukuraucin ɗagai jǝgap da Kaisarriya da ɗǝgi na ja. Akshi deu i ɗagayi na warrau ɗagai baci dlugun Manaso, nǝn Kuburus, gayi da kun ndawa mi tubatu sǝkurr, mi jaye mbasu na aci.
17
Ja zada Urrushalima tǝnu, yaganaucingu da gǝnyi na ja na arawi gǝshi.
18
Se ɗatlanu, Bulus dayi na ja i ri Yakubu, na ndawa gazgarauci mak a riwu.
19
Da ku aci ndǝmu na akshi tǝnu , se da barikshi labargu gayi-gayi, bee mi Kakasǝku dlamu i witak ndak duniya(al'umai) da ri wana mi aca tǝka dlamau.
20
Lakwtu mi akshi kǝma kasau tǝnu, se akshi da sǝkarrci Kakasǝku, da ramici ma, "Aiki , yagana, ndawa dubu nawan baru jirewa(dlam iman/kasaktunakshi), ke gwiɗshi dlam na aniya ɗǝga dumaya kalkal.
21
Ke nda dlamdikshi rama a ɗaci bi, ma; ka gugzau i yahudaucin mi dambasu a kun al'umai da dameta bai na nabi Musa. Ka gugzekshi ma da wuda mamukshi gamsak bai, ke da ɗǝga gamana aada bai.
22
Wa dlam gǝmo? Taɓas, akshi a kǝmudu ma ka deu
23
Gaɗa kasǝn, a dlam bee warra ja rameci gususku. Ja na gamsak huɗu mi ta yinɗa.
24
Aji na ndau kwa viyi na aɗakun(aibakun) na kakshi, ka ngumi dikshi bee warra akshi tǝku, gaɗa sǝka aɗakshi. Gaɗa tike da zǝgǝdu ma bee warra nda ramu i aɗacigu papiya. Akshi a zǝgǝdu ma, ci cam baci ɗǝga dumaya.
25
Amman i ɗak al'umai warra dlam na iman, ja tarrnudikkshi saktu ma, akshi da dlama pǝɗǝm na bee warra nda bari garamcin bai, na dǝdǝm, na magvan(guvu) , na maka amatin.
26
Se Bulus da ngwi ndau, ɗatlanu, da viyi na aɗagǝri(aipugǝri) na kakkshi, da yi kun lǝma wenduwa Kakasǝku, da dlam rama i ɗa gafa viya aɗakshi(apukshi) , da dlam bari gaɗa viya apu tike da kunakshi.
27
Lakwtu mi yiwan gatkasau gaza rap i dama tǝnu, se yahudaucin ɗagai da Asiya daiki Bulus i kun Wǝnduwa Sǝku, se akshi da da tlatli ankal ndiwa, da jǝbna aci.
28
Akshi da jǝb kurwa ma, "Ndak Israila a banatAna ja. Ai nǝnangu ne baci gugza bee mi a gabaniya na ndawa, na dumaya, harr na Wǝnduwa Sǝku tǝku; i rawanke. Banda kasǝn, harr dena Helinaucin i kun Wǝnduwa Sǝku tǝku, dlǝmtu na riwu warra goaipu ."
29
Gaɗa akshi ika Tarrofimas nǝn Asiya i ɗagayi na Bulus i kun marǝm ɗa, akshi a tumangu ma Bulus gu deu na aci i kun Wǝnduwa Sǝkugu.
30
Se alkal marǝm ɗa gu mak da tlingara, ndawa da vǝgai i ɗa Bulus. Akshi da vagǝ na aci, da kun Wǝnduwa Sǝku gu. Na tasǝna bai se nda cimna miya sǝsasingu.
31
Akshi ancu tǝk na aci tǝnu, se labar gu da zaji na marǝm askarabacin ma Urrushalima mak a kun tlatli ankal.
32
Na sǝkwakwiya bai se dangwi askarrabaucin na zhigwamcin da rawi i ri algu. Ndau ika marǝm askarrabaucingu na nda aɗagǝri tin, se davi na gubǝɗ Bulus gu.
33
Marǝm askarrabaucingu da nai da jǝb Bulus da ɗawi nda takwshi na aci na sar'a shirin. Se da dlam jaya ma, acu tai, ke dlamu tam.
34
Ndau jǝgab i kun algu a kurwa bee ɗagai, jǝgab a kurwa bee daama. Marǝm askarrabaucingu dǝma yakinta bee wambai gaɗa gawa rurau tǝnu, se da ɗawi nda nina Bulus i ngwapate askarrabaucin.
35
Nda zade jigam miya ngwapategu tǝnu, se askarrabaucin da sukci na Bulus gaɗa gawak shitan/dlimatu gǝshi/tliri kǝ ndiwa.
Se algi ndiwa da jǝb ɗǝgau a kurwa ma, "A tǝka na aci"
37
Nda dlam na damtu tǝfa na aci ngwapate askarrabaucingu, se Bulus da rami marǝm askarrabaucingu ma, "Na ramici bee ɗagi bi? Marrem askarrabaucingu da ramma, " Ka kǝmu miya Helinaucin bi?"
38
Ci gu, ci nǝn Masarr warra yuwan akau tlatla ankal ndiwa, harr da ngwi ndak tagǝdlawa dubu gumu huɗu dayi kun fanfarya pata?"
39
Bulus da ramma, " Iyu nǝn yahudaucin da marǝm ɗa Tarrsus i larrdi Kilikiya. Iyu matkam marǝm ɗa mi gazǝgayak. Na wilici, aivayu na dam rama in ndau."
40
Marǝm askarrabaucin gu bardici dǝvu tǝnu, Se Bulus darr'yi ɗak jigam ngwapategu, da dlam ɗǝvara na amigǝri i gǝrre ndau. Da dlamikshi rama na miya yahudaucin, da ramma,