1
وقتی که عیسی ای حرفاهُون تموم کِرد،اِز جلیل زی وِدر، اُو بال آو اُردُن اِوِی مین منطقهء یهودیه.
2
مَردمون زیادی وِ دینداش وَستن وِرَه وُ هُو هَم هاموچو اونون شِفا دا.
3
فَریسیا اِوین تَیش تا هُون آزمایش بُکنن، اونو پُرسین، ایبوه میرِه،زینهء خوشِن وِ هر علتی طلاق به؟
4
عیسی مین جُواوِشون گُو ،مَر نَخُوندینه که خالق جهان زِ روز اول اونون مِردوزن آفرید،
5
وُ گو: سی هَم چینو،میره بُو وداشِن وا ترک بُکنه وُ وِ زینه خوش بِپیونده، وُ هاردو یَ تَن ایبوِن؟
6
سی هم چینو، زِ اوسو وِ بعد اونو دی دو نیستن، چینو که یَ تَن ایبوِن . پَ هَر چی خدا وَصل کرده ،آدمی جداش نَکنه.
7
وِش گُودن، پَ سیچه موسی فَرمون دا میره طلاق نامه ای بِده و دست زینه وُ وِلش کنه؟
8
وِشون گُود موسی وِ خاطر سنگدلی ایشا ای اجازه یون دا که زینه تونن طلاق بِدین، ولی زِ اول ایطور نَبی.
9
وِ ایشا ایگوم ،هرکی زینه خوشن بغیراز خیانت مین زناشویی طلاق به وُ یَ زینه ای دیه بستونه، زنا کرده.
10
شاگردا وِش گُودن: پَ اَیر پیا در قِوال زینه ایطوره،پَ اصلا زینه نَستونه بهتره!
11
عیسی گُو: همه نَترن ای کِلومون قِول بُکنن، مَیَر اونو که وِشون داده وُویه.
12
چینو که بعضی خواجه ین، چونکه زِ مین کُم داشون چونو زاده وُوینه؛ بعضیا وِ دست مردم خواجه وُوینه؛ بعضیام وِ خاطِر پادشاهی آسمون رِی ازدواج تیه اِیبَندِن.هرکی ایتره یون قَوول بُکنه ،بِلین چینووُوه.
13
اُسو مردم بَچیل اِوردن تی عیسی تا دست بِنه قَدِشون وُدعا بُکنه.اما شاگردا مَردمِن سَرزِنِشت کردن.
14
عیسی گُود: بِلین بَچیَل بیان تی مُو وُ جِلوشون نَگِرین، چینو که پادشاهی آسمون زِ ای کَسونه.
15
پَ دست ناد قَدشون وُ زِ اوچو رَه.
16
یَ روز یَ میره ای اِوی تی عیسی وُوِش گُو: استاد، چه کارنیکویی انجام بُوم تا زنده ای ابدی داشته بُوُم؟
17
جوواو دا: سی چه دربارهء کار نیکو زِ مو سوال ایکُونی؟ تِنا یکی هِست که نیکوه. اَیر ایخوی وِ زنده ای ابدی رَه پیدا بُکنی،وا حُکم هُن اَنجُوم بی .
18
او پیا پرسی: چه حُکمایی؟عیسی گُو: قتل نَکن، زنا نکن،دزدی نکن، گواهی دُرُو نَیه،
19
وِ بُوت و دات احترام بِنه،وِ هُمسات مثل خوت محبت بُکن.
20
او جِونو گُو: همهء ای فرمونا اَنجوم ایوم؛ دی چه کم دارُم؟
21
عیسی جواو دا: ایر ایخوی کامل وُوی، برو هرچی داری بفروشُ وِ فَقیرا به که مین آسمون گنج داری. اوسو بیو مون پیرُوی بُکن.
22
جِوُن چینو که یُون فَهمی ،حالش گِرده وُوی، وُ زِ اوچو رَه،چینوکه مالومِنال زیادی داشت.
23
اوسو عیسی وِ شاگردا خوش گُود: آمین وِ ایشا ایگُوم، که رَه جُستنِ مالدار وِ پادشاهی آسمون خیلی سخته.
24
باز مُحکم ایگوم که رَد وُوین شتر اِز سیلا سیزَن راحتتره تا رَه بُردن آدمِ مالدار وِ پادشاهی خدا.
25
شاگردا وا شنییَنِ ای حَرفها خیلی شوکه وُوین وُ گودِن، پَ کی ایتره نجات پیدا کنه؟
26
عیسی تیه دُوُد وِشون وُ گُود یُو سی آدمی غیر ممکنه اما سی خدا همه چی ممکنه.
27
پطرس گُو ،همی حالا هم ایما همه چینه وِل کردیمه وُ زِ تو هی اطاعت ایکنیم. چه چی نِصیوِمون ایبو؟
28
عیسی وِشون گو،آمین وِایشا ایگوم او زمونی که مین جهان نو که پسر انسان سر تخت،پیروزمندانه بنشینه،ایشا که اِز مو اطاعت کردین، سر دوازده تا تخت اِینِشینین،وُ سَر دوازده تا قوم اسرائیل داوری ایکونین.
29
وُ هر کی وِ خاطر نوم مو ، هُونه یا گُو یا دِیی یا بُو یا دا یا بَچیَل یا مِلکاشن وِل کِرده بُوه،صد بِراوَر ایجوره و زنده ای ابدی وِ دست ایاره.
30
اُوسو خیلیا که اوّلن آخر ایبون، و آخریا اول.