¹ چینو که پادشاهی آسمون مثل صاحاوباغی هستو که خروس خون زی وِدررَه تا سی تاکِستونش کارگر روز مِز بِگره. ² هو وا اونوتوافُق کرد،که روزی یَ دینارسی کاریشون مین تاکستون بِشون.وُ اونون رَد کرد رَه مین تاکِستون. ³ نزدیکا ساعت نُه دوواره رَه بیرون وُ یَ عهده این مین میدون شهر بیکار واستادِن بی دی. ⁴ وِ اونو هم گو ایشا هم برین مین تاکستان موُ و هرچی مِزِتون بووه ، وِتون ایوم . ⁵ پَ اونوهم رَهدِن ، نزدیک ساعت دوازده و سه هم رَه وِدر وُ چونو کِرد. ⁶ نزدیک ساعت پنج بعدازظهردوواره رَه وِدر وُ یَ چند نفری که بیکار واستادن بی دید. زِ اونو پُرسی سیچه تموم روزن ایچو بیکار واستادینه؟ ⁷ جواو دادن چینوکه هیچکس ایمانه سی مِز نَگرِد.وِ اونوهم گُو ایشا هم برین مین تاکِستونِ مو کار بُکنین. ⁸ دم غُرویی صاحاو تاکستون وِ مُواشِرش گُو،جار کارگرا بِزن وُ زِ آخریشون شروع بُکن مِز به تا وِ اولیشون. ⁹ کارگرایی که تقریبا ساعت پنج اِوین بی سرکارهَر کی یَ دینار اِستید. ¹⁰ چینو که نوبت وِ اینو رسی بی که جلوتر اِز همه اِوین بی ، گِمون ایکردن که بیشتر اِز بقیه ایستونن، اما هریکی اِز اونوهم یَ دینارگِردِن. ¹¹ تا مِزشون اِستِین، شروع کردن وِ شکایت کِردن، وصاحاو باغ گُودن: ¹² اینو که آخر اِوین،فقط یَ ساعت کار کِردن وُ تو اونون وا ایما که کل روزِن زیر تَش اَفتو زحمت کشیدیم،براور کردی؟ ¹³ هُو هم ری کرد وِ یکیشون گُود:رفیق مو وِ تو ظلمی نکِردُم ،مَر قِرارمون یَ دینار نَبی؟ ¹⁴ پَ حق خُوتن بِستون وبَرو، مُو ایخوم وِ ای آخری هم مثل تو مِز بوم. ¹⁵ مَر حق ناروم هرچی دلوم ایخو وا پیلا خُوم بُکُنوم؟ تیهء دیدَنه دستِ دل وازی مون ناری؟ ¹⁶ پَ آخریا اولی اِیبون و اَولیا آخر. ¹⁷ وقتی که عیسی هی ایرَه اورشلیم،مین رَه دوازده شاگردش کِشی یَ کناری وُ وِشون گُو: ¹⁸ هَمی حالا ایرُم اورشلیم ،مین اوچو پسر انسانن وِ گَپُون کاهنا وُ علما دینی تسلیمش ایکُنن ، اونو سی هُو حکم مَرگش ایبرن. ¹⁹ وِ قومون اَجنوی اِیِن تا داوریش بُکنن وُ شلاق بُخوره وُ وِ صلیب کشیه وُوه،اما مین روز سوم ایویریسته. ²⁰ اوسو دا کُرگَلِ زِبدی وا دوتا کُرش اِوی تی عیسی وُ جلوش زونی زی،وُ زِ هو خواست که آرمونِش برآورده بُکنه، ²¹ عیسی پُرسی: آرمونِت چنه؟گُو مستجاو بُکن که ای دوتا کُر مو مین پادشاهیت، یکی وِ طرف راستت وُیکی وِ طرف چپت بِنشینه. ²² عیسی مین جواوش گو:ایشا نُونین چه ایخوین! ایشا ایترین اِز جامی که مو وِ هَمی زِیی سَر ایکِشوم،سر بِکشین؟ جوواو دادن:ها ایتریم. ²³ عیسی گُو:شکی نی که اِز جام مو ایترین سَر بِکشین،اما بدونین که نشستن وِ طرف راست و چپ مومین اِختیار مو نیست تا هون وِ کسی بَخشوم، ای جایگاهو اِز کَسونی هِستو که پدرُم سیشون آماده کرده. ²⁴ چینو که ده تا شاگرد دی اِز ای اتفاقو آگا وُوین سر او دوتا گُوو غِضو کِردن. ²⁵ عیسی جارِشون زی وگُود: ایشا ایدونین که حاکِمون بقیه قومون سَر اونو سَروری ایکُنن وُ گَپیَلِشون وِشون دستور اِیِن. ²⁶ اما میون ایشا اینو نَبوه،هرکی میون ایشا ایخوهه گَپ وُوه،وا خادم ایشا وُوه. ²⁷ وُ هر کی اِز ایشاایخوهه اوّل وُوه وا غُلوم ایشا وُوه. ²⁸ هاموطور که پسر انسان نَوید تا وِش خدمت بُکنن،چینو که اِوی تا خدمت بُکنه وُ جونِشن سی باها آزادی مین رَه خیلیا بِنه. ²⁹ اوسو که عیسی وُ شاگرداش اِز اَریحا ایزِین وِدرعدهء زیادی وَستِن وِ دینداشون. ³⁰ یَ طِرَفِ رَه دوتا میرهء کور نِشَستن بی،تا اَشنیدِن عیسی اِز اوچو هی رَد ایبو،قال ومَنقال کِردن،گُودن:سَرورمون،وُی کُر داوود،وِ ایما رحم کن! ³¹ جمعیت جِلوشون گِردن وُ اِزشون ایخواستن ،که ساکت وُون، اما اونو بیشتر قال ومنقال کردن،وگُودن:سرورمون ، وُی کُر داوود،وِ ایما رَحم کن.! ³² عیسی واستا،وُاو دوتان بُنگ کردوُ پرسی: چه ایخوُین سی ایشا بُکُنوم؟ ³³ جواو دادن، سرورمون ایخویم تیامون بُگُشی.! ³⁴ عیسی دِل سُوزونه دست ناد سَر تیاشون وُ هامو دِمون بیناییشون وَرگَشت وُ وَستِن وِ دینداش.