¹ I kun yuwananingu ne Yahaha baci baptisma deu, a wazək i pata yahudaucin, a ramau ma, ² "A dlma tubi, gaɗa garva Səku dengara damtau." ³ Sutku aci ne warra nabi Ishaya dlamu rama ii aɗa gəri, maya, "Wura ɗagai aa aura a pata, a ramau ma 'a dlamina sapərra dəvu Məgənyi, kwa ɗimi dəvuGəri tərr.'" ⁴ Yahai taɗu kacum kə yaɗ dləgəmau, na bik tawas akau kə rəvək i aku gəri, ta gəri nin angwam na zhabuwa pata. ⁵ Se ndak Urrushalima na kə Yahudiya, na kǝ lardadin baka miya anku Urrdun mak, da jəb vərayi i rigəri. ⁶ Da dlamikshi baptisma i kun anku Urrdun, i lakwtu mi aksha dlama tubi da aipapinshi. ⁷ Amman aci iika Parisaucin naa Sadukiyaucin gaawa ani ri gəri gaaɗa nda dlamikshi baptisma tin, se da ramikshi ma, "Kun nda haal mbikɗaɗin ndak sərka, gabɗu kun nən tai maa kwa rawi da miya shiitan mii aye ni ? ⁸ A dlamina mbasu mii a tatkau ma kwa dlamu na tubi jirewa. ⁹ Kun ke kwa rama bai ii gəshakun ma, ' Afək ja nən Ibrrahim.' Gaɗa kasən naa rame kun, Səku naa kərrmai kə tlatli kutlai ii Ibrrahim da kunu guguyayin təku. ¹⁰ Nda mpa naa gawa ii tǝka guvu wakain sǝrram. Waka tawanke waarra 'yawu biinǝn nda karma du, nda vərkədu ii kunu aka. ¹¹ Naa dlame kun baptisma naa aam ii nye tuubi, amman baci ni da ku ga ɗəka naa iyu ii kǝrmai, mii ko soono gəri ngum na bata bai na lənci. Aci aye dlame kun baptisma naa Nənuwa Səku, zam naa aka. ¹² Fǝna tlarya geri aa ami gǝri, aa tlarya naa rafiwau da kunu alkama, a kasa na ri ɗəkau sarral, da bəri na alkamau da pǝdu ii kunu gadlai gəri. Amman a baka na rafiwau naa aka waarra nda dumu tək gu bai." ¹³ Se Yeso da nai da larrdi Galili, da yi anku Urrdun ii ri Yahai gaaɗa da dlamici baptisma. ¹⁴ Amman Yahai anci da dapci na aci, da ramu maa; "Iyu mii na makau ka dlama nai baptisma nǝn ci?" ¹⁵ Yeso da ngumi, da ramici maa, "Abzhi da dlaɓi kasənu gusku, gaaɗa kalkal ii wa gaaɗa wa jǝbki adalta mak." Se Yahai da dlamu dii ci baptisma. ¹⁶ Aku nda dlamdici baptismau, Yeso da vəre kərrat da kun aamgu, se dəsku da rəpci ci,. Daiki Nənwa Səku a fuwayi ka tataru, da fuwai i ɗaGəri. ¹⁷ Se so adərr wura, vəre da dəsku a ramau ma, "Sutku ne wən ntuganai, gəshi ga parrak na aci."