¹ Mukushalikisha, mweba munyina bandi, mukoanga muli Shikulu. Nebo pakumilembela ifi fintu fimo fine nakabili kuli mwebo tecakucusha kuli nebo, kabili cakulemisunga bwino. ² Cenjeleni ku mbwa. Cenjeleni ku lyabo babomfi babubi. Cenjeleni ku bena kusembululwa. ³ Pantu nifwebo fwebena kusembululwa-fwebapepela mu mupashi wakwa Lesa, nokuitakishisha muli Kristu Yesu, ukwabulo kucetekela mufya mubili. ⁴ Nangu nifyo, nebo nemwine kutina cetekela mufya mubili. Umfwa umo akotontonkanya ati alicetekela muli bumubili, nebo kuti nacilapo. ⁵ Nalisembululwilwe pabushiku bwakulenga cine konse konse, ubwakubena Isreali, mu mukowa wakwa Benjamini, umu Hebere waba Hebere; umwalola amalango, umu Falise. ⁶ Umwabelo kucincila, naclicushishe ulukuta; umwabelo bulungami muma malango,ntakwete mulandu. ⁷ Nomba fyonse fintu fyali fyabunonshi kuli nebo, nalifitunga ukwebati fyafye pamulandu wakwa Kristu. ⁸ Kabili nomba, mpenda fyonse kuba ifyafye pa mulandu wa cuma icacilishapo icakwishiba Kristu Yesu Shikulu wandi. Pamulandu wakwe nalilufishe fyonse-kabili fitungo kube fyabusali-pakwebati nonke Kristu ⁹ no kusangwa muli ena, tekuikwatila bulungami ubwandi ubwakufuma muma malango, lelo ubwishila mukucetekela Kristu-ubulungami bwakufuma kuli Lesa ukupitila mukucetekela. ¹⁰ Kanshi noomba nkofwaya ukumwishiba na maka yakututubuka kwakwe ne senge lya kucula kwakwe, ukuba nga ena mumfwa yakwe, ¹¹ ukwebati ningomfwako ukututubuka ku bafwa. ¹² Tekweba ati nalipokelela ifi fintu,nangu ndi uwakupwililika libela, nomba nkokonkelela ukwebati cinonke pantu Kristu Yesu alinonkele nebo. ¹³ Mweba munyinane, nshikontontonkanya ati nebo ndipokele ici cintu. Lelo ncite cintu cimo: Ukulekulaba ku fyakunuma no kusupila fya kuntanshi, ¹⁴ nkonkelela ukulola kubuyo ne cimonwa ca bwite bwamumulu ubwakwa Lesa muli Kristu Yesu. ¹⁵ Fwebo bonse fwebakupwililika, natuntontonkanye muli ii nshila; kabili umfwa mwebo mwatontonkanya ifipuseneko pali fimbi, Lesa akamisololwele cicine. ¹⁶ Nangu cibe fyo, natwikale muli ico cine twapokele. ¹⁷ Beni abakumpashanya, mwebamunyinane. Lolekesheni abo abendela mu cipasho ico mwakwata muli fwebo. ¹⁸ Abengi bakoenda-abo nalikumyebapo libililibili, na nomba komyeba mwebo ne filamba-nga balwani bapalupanda lwakwa Kristu. ¹⁹ Impela yabo bonaushi. Umulungu wabo ninda shabo, ubukata bwabo bwaba mumusebanya wabo. Batontonkanya ifya pa calo. ²⁰ Lelo ubukaya bwesu bwaba mumulu, uko ukotukololela mulubushi, Shikulu Yesu Kristu. ²¹ Akalula mibili yesu iyasaluka ikabe ngo mubili wakwe uwabukata, umwabela kubomba kwa maka yakwe ku kulangisha fyonse fintu ku mwine.