¹ Umfwa muli ukukonkomesha muli Kristu, umfwa mube ukunkumba ukuli konse ukukoletwa no kutemwa, Umfwa muli senge ilili lyonse mu mupashi,umfwa muli inkumbu ishili shonse ne congwe, ² nolu lengeni ukusekelela kwandi kwisushiwemo pakuba no mutima umo, ukukwata ukutemwa kumo, abakwikatana mu mupashi,kabili abakukwata ipange limo. ³ Mwicita nangu cimo mukuisakamana nangu ku matutumuko. Lelo mubufuke mulinge bambi ukuba abakumucila. ⁴ Lekeni umo no mubiye alolekeshe tepafyafye ekafye, lelo na pafya banenu. ⁵ Kwateni umutima uyu uwali muli Kristu Yesu, ⁶ ena, nangu aliko mu cimpasho cakwa Lesa, taitungile ukulingana na Lesa kubati cintu cakwikatilako. ⁷ Lelo, ailengele ukuba uwafye, ukubula icimpasho ca mubomfi, kabili afyelwe mu cimpasho ca buntunse.Kabili ukusangwa mu cimpasho ca muntu, ⁸ Aliicefeshe umwine no kuba uwacumfwila ukufika nakumfwa, awe ukufika na ku mfwa yapa cakupindama! ⁹ Eico nakabili Lesa alimusasabike no kumupele ne shina ilyacila pa mashina yonse, ¹⁰ ekwebati mwishina lyakwa Yesu lyonse ikufi likafukama, mu mulu na pano isonde na panshi ye sonde. ¹¹ Kabili ululimi lonse lukososa ukwebati Yesu Kristu ni Shikulu, ku bukata ubwa kwa Lesa Shifwe. ¹² Eco nolu , mwebatemwikwa bandi, kubati fintu munakila inshita yonse, tepakubapo kwandi kwine lelo kucilapo fye nelyo ntali na mwebo, bombeleni ipusukilo lyenu no mwenso no kututuma. ¹³ Pantu ni Lesa eukobomba muli mwebo muli fyonse mukufwaya na mukubomba kubusuma bwakwe bwine. ¹⁴ Mulekucita fyonse ukwabula ukuilishanya no ku ngwinta ¹⁵ Ukwebati mube abakupetama kabili abakupwililika, abana bakwa Lesa abakubula ubulema mukati ka bwikashi bwankulo ya bupondamishi no bucenjeshi, Umo mubengeshima kubati lubuto lwapano isonde. ¹⁶ Ikatisheni icebo ca mweo pakwebati pa bushiku bwakwa Kristu nkese kuitakuitakisha ukwebati nshalikubutuka apafye nangu ukucucutikila apafye. ¹⁷ Nangufye ningapelwa nge cabupe pe lambo na pa bupyungishi bwa citetekelo cenu, ndi wa nsansa nokusangalala na mwebo bonse. ¹⁸ mu musango umo wine na mwebo mube abasansa no kusekelela pamo nanebo. ¹⁹ Lelo ndi ne subilo muli Shikulu Yesu ukumitumina Timote bwangu, pakwebati nanebo ningakoseleshiwa ulo naishiba ifintu pali mwebo. ²⁰ Pant ntakwete uwakuba kubati nio, uwakusakamana icine cine pali webo. ²¹ Pantu bonse bakofwaya ifyakubasekesha abene, te fya kwa Yesu Kristu iyoo. ²² Lelo mwalishiba ukulinga kwakwe, pantu ngo mwana na wishi, eco alibombele pamo na nebo mu mbila insuma. ²³ Eco ndi nkofwaya ukumutuma bwangu, umfwa mbonefye fiintu ifyo fyaba kuli nebo. ²⁴ Eco ndi uwacilumba muli Shikulu ukwebati na nebo nkoisa bwangu . ²⁵ Lelo nkocimona icayana ukutuma Epafroditi kuli mwebo nakabili. Ni munyinane kabili umubomfi munandi kabili cita cinandi, kabili ni nkombe yenu no mubomfi mufya kukabila kwandi. ²⁶ Pantu ena ali uwakusakamikwa, kabili alikufuluka ukuba nenu bonse, pantu mwalyumfwile ukulwala kwakwe. ²⁷ Ne cacine alilwele mupepi fye ne mfwa. Lelo Lesa alimubelele uluse, kabili tepalwakwefye eka, lelo na nebo wine capamo, ukwebati niba uwakubika ubulanda pa bulanda bubiye. ²⁸ Eco caba icakukukabila ukwebati inkomutuma, pakwebati ulo mukamumona na kabilli mukasekelele, kabili nanebo kuti naba uwacepelwa no bulanda. ²⁹ Eico mupokeleleni Epaphroditis muli Shikulu no kusekelela konse. Cindikeni abantu abakubati ni ena. ³⁰ Pantu nipa mulimo wakwa Krisitu ukwebati alifikile mupepi ne mfwa. Apele umweo wakwe mukayofi ukwebati apwilishishe icalikubulila mu mulimo wenu kuli nebo.