¹ Eico,mweba munyinane batemwikwa mwebo mfuluka , mwe nsansa ne chilongwe candi,muli iine inshila tukoiminina ndi muli Shikulu, mwebatemwikwa banandi. ² Nkopapata na Yuodia, kabili nkopapata kuli Suntuki, mube abakwikatana muli Shikulu. ³ Ee, nkolomba, we munandi wine wine, ulekwafwa aba banakashi aba bombele pamo nandi mukubile mbila insuma, pamo pene na Klemate nabambi ababombfi banandi abo amashina yabo yaliba mwibuku lya mweo. ⁴ Sekeleleni muli Shikulu. Nakabili nkoeba ati, Sekeleleni. ⁵ Lekeni icongwe cenu cishibikwe kubantu bonse.Shikulu ali mupepi. ⁶ Mwisakamikwa nangu kamo. Lelo, muli fyonse fye ukupitila mukupepa no kupapata pamo no kutotela, lekeni ifyakulomba fyenu fishibikwe kuli Lesa, ⁷ no mutende wakwa Lesa, uwacilamo kukwiluka konse, walekulinde mitima na matontonkanyo yenu muli Kristu Yesu. ⁸ Icakulekeleshako, mwebamunyinane, fyonse ifya cin,fyonse ifya mucinshi, fyonse ifintu ifya mulinganya, fyonse ifya kusanguluka, fyonse ifintu ifya kuyemba, fyonse ifintu fyakuyana ukushimika, umfwa kube fya bune sana, umfwa kuli ifintu ifyakutasha, pali ifi epo mulekutontonkanya. ⁹ Ifintu ifyo mwasambilile no kupokelela no kufyumfwa , nokumona muli nebo, mulekucita ifi fintu, na Lesa uwa mutende alekuba nenu. ¹⁰ Nkosekelelela sana muli Shikulu nomba pantu mwafukulula ukunsakamana. Icine cine mwalinsakamana, nomba tapali apakweba ati mwingangafwa. ¹¹ Ntakolonda fi pantu ndi mukubulwa. Pantu uwaikushiwa muli fyonse. ¹² Nalishiba ukuba umubusu, kabili nalishiba no kukwata ifingi. Munshila shonse na muli fyonse fye nalisambilile inkama yakulishiwa bwino no kuba ne nsala, nangu ukukwata ifingi nangu mukukabila. ¹³ Ndikwete amaka yakucita fyonse ukupitila muli uyo uukonkoselesha. ¹⁴ Nomba mwalicitile bwino pakuba ababwampano ukuba nandi mumacushi yamponene. ¹⁵ Mwebena Filipi mwalishiba ati mukutendeka kwa mbila insuma ulo nafumine ku Makedonia, takwali ulukuta nangu lumo ulwangafwile mufya kupela na mukupokelela kanofye mwebo mweka. ¹⁶ Nolo nali ku Tesalonika, mwalitumine ubwafwilisho ukucila pamuku umo. ¹⁷ Tekweba ati ndafwaya fye ifya bupe. lelo, ndafwaisha ifisabo ifikoilundulula kuli mwebo kukumanisha. ¹⁸ Awe nalipokelela fyonse, no kucilapo. Ndikwete ifyo napelwe ifisuma nomba apo nalipokelela kuli Epafroditi ifintu ifyo mwantumine. Ifya cena icakununkila bune, icelambo ilya kupokelelwa kabili ilya kutemuna Lesa. ¹⁹ Awe Lesa wandi akamipela fyonse ifyo mukabila umwabelo bucindami bwakwe mubukata muli Kristu Yesu. ²⁰ Nomba kuli Lesa kabili Shifwe kube ubukata umuyayaya umuyayaya. Amen. ²¹ Poshenipo abamushilo bakwa Lesa muli Kristu Yesu. Aba bwananyina abo ndi nabo bakomiposha. ²² Abantu bamushilo abakwa kuno bakomiposha, nakucilisha aba mu ng'anda yakwa Kaisare. ²³ Ukusanaminwa kwakwa Shikulu Yesu Kristu kube no mupashi wenu.