¹ Muli nshila imo ine, mwe bakashi mulingile ukunakila ku balume benu. Mulekucita ici pakwebati nangula abaume bamo abatanakila ku cebo, limbi kuti basumina apakubule cebo, ukupitila mu mibele ya bakashi babo, ² pakumona imibele yakatina, kabili iya bukaele. ³ Mwileka ukuisamika kwenu kube ukwa kunse - ukuluka kwa mishishi, no kufwala ifya golide, nangula ukufwala ifyakutakisha. ⁴ Lelo, cicitilwe mu muntu wa makati ka mutima no busuma bwakubelelela ubwa mupashi wa kufuka kabili uwa mutalalila, uwaba uwa finisha ku menso yakwa Lesa. ⁵ Pantu ifi efyo abanakashi bashila abakale abalikusubila muli Lesa balikuiwamya, mukunakila ku balume babo. ⁶ Muli iyi nshila Sara alinakile Abrahamu no kumukuta shikulu wakwe. Nomba muli bana bakwe umfwa mwacita icabune kabili umfwa tamukotina ubwafya. ⁷ Mu musango umo wine, mwe balume mulingile mulekwikala na bakashi benu umwabelo kwishiba, pamo nga kucipe icitakosa, umwanakashi. Mulingile mulekubapela umucinshi nge mpyani shinenu shakusenamina kwa mweo. Mulekucita ifi pakwebati amapepo yenu yelakupelela. ⁸ Mukulelekesha, mwebo bonse, mube umutima umo, abankumbu, abatemwa bamunyinabo, aba mitima ya luse, kabili iya kupetama. ⁹ Mwilakubwekusesha ububi pa bubi, nangula insele pa nsele. Mukupusanako, mulekukonkanyapo ukulapala, pantu eco mwaitilwe, pakwebati mwinga pyana ipalo. ¹⁰ "Umuntu uukofwaya ukutemwa mweo, no kumona inshiku sha bune alingile alekukanya ululimi lwakwe ku bubi ne milomo yakwe ukukana landa ifya bucenjeshi. ¹¹ Lekeni afumeko kufya kubipa no kucita ifintu fya bune. Lekeni alekufwaya umutende no kuukonkelela ¹² Amenso yakwa Shikulu yamona abalungami na matwi yakwe yakutika amapepo yabo. Lelo icinso cakwa Shikulu calukila abo abacita ububifi." ¹³ Ninani uyo uwingamicita ububi umfwa mukoba abakucincilila ku kucita ifyabune? ¹⁴ Lelo nangu mwacula pa mulandu wa bulungami, muli abakupalwa. Mwitina ukutinya kwabo. Mwiba abakusakamikwa. ¹⁵ Lelo, shisheni Shikulu Kristu nu mitima yenu iya shila. Lyonse mulekuba abaipekanya ukulondolola kuli onse uwingepusha pe subilo mwakwata - ¹⁶ nangula cibe fyo, mubufuke no mucinshi. Mukwate kampingu wabune pakwebati balya bantu abasalula imweo yenu iya bune muli Kristu bengomfwe nsoni pantu bakolanda ifyakumisusha kubati muli bakacita wa bubi. ¹⁷ Cili fye bwino, nga caba ekukabila kwakwa Lesa, pakwebati mukoculila pakucita icabune ukucila ukucita ububi. ¹⁸ Kristu nao aliculile lino pa membu uwali umulungami aliculile fwebo, fwe bashili abalungami, pakwebati angatutwala kuli Lesa. Alipaiwe ku mubili, lelo alilengele uwa mweo mu Mupashi. ¹⁹ Mu Mupashi, alile no kushimikila ku mipashi iyaba nomba mu cifungo. ²⁰ Yalibulile icumfwila lintu ukuteka umutima kwakwa Lesa kwalikulolela mu nshiku shakwa Noa, mu nshiku sha kupangwa kwa cibwato, na Lesa ali puswishe fye abantu abamancepela - imweo cine konse konse - ku menshi. ²¹ Ici cali cishibilo ca lubatisho ulo ulupususha mwebo nomba - tepamo ngo kusamba kwa kufumya ifiko pa mubili, lelo ngo kulomba kampingu wabune kuli Lesa - ukupitila mukututubuka kwakwa Yesu Kristu. ²² Kristu ali ku kuboko kwa ku kulyo kwakwa Lesa. Alile mukati ka mulu. Ba Malaika, abansambu, na maka yalilingile ukumunakila.