¹ Eco talusheni fyonse ifya bubi, ubucenjeshi bonse, bu bubimunda, akalumwa, no lwambo lonse. ² Ngo tunya utwafyalwa nomba, fwaisheni umukaka wakusanguluka uwaku mupashi, pakweba ati muli wena mwebo mukule mwipusukilo, ³ umfwa mwalisonda ukweba ati Shikulu wa nkumbu. ⁴ Iseni kuli ena uyo uuli libwe lya mweo ilyo ilyasulilwe ku bantu, lelo ilyo lilisalilwe na Lesa nge lya kucindama kuli ena. ⁵ Nemwe bene muli kubati mabwe ya mweo aya kulwa ukuba ingánda ya bumupashi pakuba bushimapepo bwa mushilo ubutula amalambo ya bumupashi aya pokelelwa kuli Lesa ukupitila muli Yesu Kristu. ⁶ Mwilembo mwabe ifi: "Moneni, Nkobika mu Sione ilibwe lyapa cifutu, ilyasalwa kabili ilya kucindama. Uyo onse uwatetekela muli ena takalengwe nsoni." ⁷ Ubucindami, ninshi, ni kuli mwebo mweba kotetekela. Lelo kuli abo abatatetekela, Ilibwe ilya sulilwe na bakakula, "Ilibwe ilyo bakakula basulile elya ishile kuba umutwe wapa cifutu," ⁸ kabili, "Libwe lya kuipununako kabili "libwe ilibalenga ukuwa." Balaipununa pantu tabanakila icebo, ico basontelwe ukubomba. ⁹ Lelo mwebo muli lupwa ulwasalwa, bushimapepo bwa bufumu, uluko lwa mushilo, abantu abo Lesa aikwatila, pakweba ati mwebo mulondolole ificitwa fya bune ifya wa mikutile ukumifumya mu mfifi no kumingisha mu lubuto lwa cipesha mano. ¹⁰ Mwe bashali abantu pa nshita imo, lelo nomba mwebo muli bantu bakwa Lesa. Mweba tapokelele luse, lelo nomba mwebo mulipokelele uluse. ¹¹ Mwebatemwikwa, Nkomikoselesha nga beni kabili abalebeshi ukufuma kufyakukabila fya mubili, ifyo ifilwishanya ne mweo wenu. ¹² ukwenda kwenu pa bena fyalo kube ukwa mucinshi, pakwebati ulo bamipontela kubati ni bancita tubi, bengaba inte shenu ku ficitwa fyenu ifyabune no kupela ubukata kuli Lesa pa bushiku ubo akamoneka. ¹³ Mube abakunakila ku cipope conse ica buntunse pamulandu wakwa Shikulu. Nakileni naku mfumu nge yapulamo ¹⁴ na kubalashi, abo abatumwa mukukanda incitatubi no kutasha abo bonse abacita ifyabune. ¹⁵ Pantu uku ekufwaya kwakwa Lesa, pakweba ati mukucite fyabune mwebo mutalalike ukulanda kwa bututu ukwa bantu abakubula mano. ¹⁶ Nga bantu abantungwa, mwibomfya ubuntungwa bwenu nge cakufisamamo mukucito bubi, lelo beni nga babomfi bakwa Lesa. ¹⁷ Cindikeni abantu bonse. Temweni aba bwananyina. Tineni Lesa. Cindikeni imfumu. ¹⁸ Mwe babomfi, beni abakunakila kuli ba cibinda benu no mucinshi onse. Beni abakunakila tekuli ba cibinda fye ababune na ba mutembo fye beka, lelo na kubapondama bene. ¹⁹ Ico cili icalinga ukutasha umfwa pamulandu ali na kampingu wakwa Lesa, umuntu ashipikisha ifya bulanda ulo akocula mukufyengwa. ²⁰ Ico kutashiwa nshi umfwa wa bembuka elo nomba washipikisha ulo ukotitikishiwa? Lelo umfwa walicitile icabune elo nomba ukocula ulo uko kandwa, ici nacilinga ukutasha ukufuma kuli Lesa. ²¹ Pantu ni kuli ici cine eco mwebo mwaitilweko, pantu Kristu nao aliculile pali mwebo. Alishile icilangilo kuli mwebo ku kukonka mu ntampulo shakwe. ²² "Tacitilepo lubembu, nangula conse ica bucenjeshi ukusangwa mukanwa kakwe." ²³ Ulo atukilwe, ena tatukene, lelo aipele umwine kuli uyo uupingula mu bulungami. ²⁴ Ena umwine alisendele membu shenu mu mubili wakwe pa cimuti pakweba ati fwebo tutaluke ku lubembu no kwikalila ubulungami. Na mu filaso fyakwe mwebo mwaliposhiwa. ²⁵ Mwebo bonse mwalilubantike kubati ni mpanga, lelo nomba mulibwelele kuli kacema na kangalila wa myeo yenu.