¹ Tah ngâuf lanh Stynz-munh pyom blungh blex, naih ah nomz stingz tau tăng gungh tuih nzac nib taih. Woax nomz stingz tau tu stipx ja zâyh nongc coib đôz nzongf nyăngz cotb. ² Woax nomz stingz tau coib woax nomz cotb đôz songđ naih tâuf sâuv staox taih năngđ tâuf đauc lub, woa tâuf sâuv đayv staox gungh stymz ninyh tăng bah noib nzămc mengh. ³ Tăng woa cotb tâuf sâuv staox taih naih ah đomc jengz đekx lunc pong nib mync, nănh stiz tuz stăpb congz nyăngz lanyf. ⁴ Nănh stiz max naih gâyf ayx hoiđ nib mync njăngx lauđ mađ mengz, nănh stiz cungb tuz lanyf hoiđ max naih Tênb-Hungh nyăngz maiđ houđ ănz pyây nyah nyăngz munh. ⁵ Stiz max tuz lanyf hoiđ munh tayc, cungb wâyb nănh stiz caux pyaz lav, nâyx đomc jengz đekx tăpc munh munz seetb, munz nyuiv cayx năngđ stăpb congz tăpc munz nâyx. ⁶ Woa pyaz lav cah njaf, woax đomc munh seenz oix lov jau tayc, six max hayh tayc, wâyc zuc tayc nyăngz jau năngx pyeenv gâyh stiz côz nzongf. ⁷ Woax đomc jengz đekx, yâuc phătc năngđ zoongz maf ninyh panx zax, stiz nyăngz pyây năngđ munh đongx sămz mouc đunb wăngh, mynb yâuc cayx năngđ munh mynb. ⁸ Stiz nyăngz đongz yâuc năngđ munh nzif đongz, nyah yâuc năngđ njanh zongh nyah. ⁹ Stiz nyăngz cah lapc năngđ njab zapz pongz nâyx, stiz nyăngz đatz beb taih năngđ zoongz maf sex ninyh panx zax bix buib nâyx. ¹⁰ Stiz yâuc naih tây năngđ săpb congz tây nâyx, hayh tănx munh, nâyx đomc jengz đekx tây naih njaiz hoiđ munh plaz lav cah njaf. ¹¹ Nănh stiz naih ah tauh Hungh six Stynz-munh, Hipc-lu, woac hipđ ayx A-ba-đôn, Hi-lapc, woac six hipđ ayx A-bô-li-ôn, nănh cun woax nomz staiz nanc Cotb. ¹² Tah yeetx hungđ staiz nanc quaix nzuf, cah đangz năngx naih iz hungđ staiz nanc năngx seetb taih. ¹³ Tah guc lanh stynz-munh pyom blungh blex, naih woac stingb seetb woa Tênb-Hungh nyăngz gongc hoomb pyâyz nomz sămz joongz taih. ¹⁴ Coong bux nzauf blungh blex woa tah guc woax tauh Stynz-munh Coong, “zay phunz woa pyâyz lanh Stynz-munh zuc stayb yămz woa ơ-phơ-ratv coiđ lub. ¹⁵ Nâyx đomc pyâyz lanh stynz-munh zuc stayb njâuh ănz nây zu tauv bengc săngx huđ, noib lav nyăngv, nănh stiz tuz zay pungx ninyh tayx bamh munh pôz phănc ah phănc yămz nây nib mync. ¹⁶ Yaz numđ coong zâyh maf woax đomc pengz naih 200. 000. 000. lanh munh. ¹⁷ Yaz phătc nâyx đomc hynđ yangh nyăngz dlayc six năngđ nâyx, zâyh maf nyăngz pengz yâuc naih njab zapz pongz nănh stiz cah lapc njaox stib cayx năngđ yangh wuôngh tâuf, mengz buđ, nzeetx yâuc cayx năngđ njanh zongh nzeetx, stiz nja tâuf seetb nzeetx taih yâuc naih tâuf sâuv njămx mengz cayx năngđ wuôngh tâuf nâyx. ¹⁸ Pôz phănc nyeenh mănh ah phănc zuc tayx tayc wâyc nâyx đomc maf nyăngz nzeetx nja seetb taih nyăngz wuôngh tâuf sâuv. ¹⁹ Woax đomc maf nyăngz jab six yămz nănh stiz nyăngz nzeetx cloon tây, nănh stiz nyăngz tây cayx năngđ nangz nâyx, yâuc naih pyây hayh nongc hoiđ munh. ²⁰ Năngx yăngc woax đomc max zuc nâyx đomc staiz nanc hoiđ nyăngz munh, yâuc max nyunc coi nyâuđ quanyf nănh stiz ayx nyăngz stoif, nănh stiz lauf max nyunc quanyf congx manđ paix miuc hanyh, nănh stiz nongc sămz, nongc nyanh, nongc njăngx, nongc njauz, jâux ayx miuc hanyh nongc paix, six max hayh yăngh, max hayh mangc, max hayh mungv lungđ nyăngz manđ hanyh. ²¹ Nănh stiz lauf max nyunc coi nyâuđ quanyf stiz ayx stac, ayx pongz lauh, ayx papz tayx munh nyăngz stoif