¹ Pa-jiz yungh tutb tauv nhlic woax nomz yeenx, Tênb-toongh stingđ njâuh cox ah phanx săngx huđ nâyx. ² Yaz yâuc phătc stâuđ Tênb-Hungh woa cah đangc woax đomc nhlic lanh Stynz-munh, tuz stipx nhlic nomz blungh blex. ³ Naih pitc lanh stynz-munh nzauf sămz hungb wăn taih stâuđ woa gongc hoomb cah đangc, nănh tuz stipx đungx stynz hungb, Zoz cloon Tênb-Hungh nyăngz đăngb zengh munh clo Zâu woac pu tipb woa hungb wăn tăpx ănz woa sămz gongc hoomb. ⁴ Hungb tâuf sâuv cloon đăngb zengh munh clo Zâu woac, songđ tăng stynz-munh puf đayv tauv Tênb-Hungh cah đangc. ⁵ Stynz-munh tăng woa gongc hoomb zoz tâuf taih pu ănz woax hungb quanyf nzac nib ninyh, songđ naih bungh bitc tâuf nzăpc nzăpc têx, bah congz pletz clinyb-clinyb têx, nib yâuc đănz tongf. ⁶ Woa nhlic lanh Stynz-munh nzauf nhlic nomz blungh blex songđ cayx pyom. ⁷ Zeetx lanh Stynz-munh pyom blungh blex, naih bungc zanđ pyoc cloon tâuf, zanđ cloon samđ tăng gungh tuih nzac nib taih, pôz phănc ah phănc nib zuc tâuf pu, pôz phănc ah phănc njăngx lauđ mađ mengz zuc pu sac nzuf. ⁸ Tah nyâyc lanh Stynz-munh pyom blungh blex, naih cayx năngđ tâuf pu zoongz zâyc lub bomf nzac coiđ ninyh, pôz phănc coiđ womz ah phănc wav pênx samđ. ⁹ Yămz coiđ nyăngz muif hungđ, pôz phănc ah phănc zuc tayc, Đangđ cloon bayh pôz phănc ah phănc zuc quaiz nzuf. ¹⁰ Tah stamz lanh Stynz-munh pyom blungh blex, naih cayx năngđ tâuf pu stingz tau lub tăng Gungh tuih nzac nib taih, pôz phănc ah phănc tuih nzac coiđ quangc cloon wăngx jeenz womz . ¹¹ Woax nomz stingz tau bux hipđ ayx ( Yangh-miuz.) pôz phănc womz ah phănc wav pênx ymz. naih munh đungx tayc wâyc hopb zuc woax đomc womz ymz. ¹² Tah stâyx lanh Stynz-munh pyom blungh blex, pôz phănc bah noib lav cloon stingz tau, bah noib zax cloon bah nzămc, pôz phănc ah phănc quaiz max gwăngz. ¹³ Yaz mangc phătc ah saz clang lub đayv woa gungh stymz haoh, yaz numđ Coong, “stauh gôh! stauh gôh! staux gôh! Yămz bamh canz nyeenh mănh cayx zuc pongh zâuđ gôh, wâyc năngx naih woa pôz lanh Stynz-munh cayx pyom blungh blêx tymb naz!.