¹ Yaz phătc pitc tauh naih jab lub quaix nyăngz Stynz-munh yămz woa Gungh nzac taih, nănh zuz Gwuyz đao pec cayx năngđ vănx stâyz nâyx pêuz nănh, nănh nyăngz pyây yâuc đongx côngz cangx, mynb yâuc cayx năngđ bah noib, staux yâuc cayx năngđ tâuf njâuh nâyx. ² Nănh nyăngz puf nzauf ah zây stâub jeenz coib woa, byaoh staux zaiđ woa coiđ, staix staux zaiđ woa nib. ³ Nănh hamv stingb lub cayx năngđ njanh zongh haoh, nănh hamv songf, yâuc naih nhlic stingb bah congz bletz tauz nănh. ⁴ Nây nhlic đitb bah congz bletz tauz nănh blătc, yaz zaub puf cayx ta ja staox zoz, songđ naih woac coong seetb woa gungh taih, max nongc ja ayx lungđ, mâyh phanv nyâyh nây nhlic đitb bah congz âyz gâyf six lungđ". ⁵ Yaz phătc woax lanh Stynz-munh staux zaiđ woa coiđ, cloon woa nib, stungb saz blaoh puf staox gungh ninyh. ⁶ Nănh coong, “yaz tym stâyv quâyx săngh tauv banc stâyv banc đaic woax tauh nyăngz bux, "six zâyx Gungh, zâyx nib, zâyx coiđ, zâyx yămz womz cloon nib mync nyăngz zuy njiênf, woax tauh Stynz-munh nyunc woac coong, “năngx gâyv ngaih gôh! ⁷ Tauv bengc săngx huđ woa tah jeetb lanh Stynz-munh pyom blungh blex, Tênb-Hungh pinyx max phunz plongx yangh nyăngz dlayc, cuđ jeenx songđ tuz Tênb-Hungh payb phunz nănh nyăngz cumh pâuz munh Stênx stengb pâyz." ⁸ Yaz numđ woac stingb tăng cah zâyc Gungh bux yaz coong, “mâyh oix zuc ninyh zoz Stynz-munh stâuh woa coiđ cloon nib woax zây stâub nzâyz taih gôh! ⁹ Yaz ninyh tauv Stynz-munh nyăngz cah đangc jođ nănh, stynz-munh songđ phunz woax zây stâub jeenz yaz, bux yaz coong, “mâyh zoz bix nhlync gôh, mâyh naz tauv nyâuđ six numđ ymz lemb, mâyh nyăngz nzeetx yâuc numđ camz đămh cayx năngđ mâyf toongh nâyx. ¹⁰ Yaz zoz Stynz-munh woa puf woax zây stâub jeenz taih nhlync, yaz nyăngz nzeetx numđ camz cayx năngđ mâyf toongh, six yaz naz tauv nyâuđ njaf yâuc numđ ymz lemb. ¹¹ Yâuc năngx naih woac bux yaz coong, “mâyh zuc ninyh ayx stênx stengb coong quaix đangc woac, "nâyx đomc woac bux phunz đungx stingx munh, đungx nomz Côkz, đungx hungđ woac, cloon đungx tauh Hungh.