¹ Yaz năngx numđ naih woac stingb coong yămz woa congx toongh seetb taih bux êu woa nhlic lanh Stynz-munh coong, “ninyh zef gôh! Zoz Tênb-Hungh hănđ stoif woa nhlic nomz staiz nanc zan taox nzac nib ninyh” ² Woa tah yeetx lanh Stynz-munh nzâyz nănh nyăngz zan ninyh taox nzac nib taih, naih tăpb stengb hiv yeenx, congx cloon nănh nyăngz hanyh woax đomc munh, songđ săngh sâyh munz nyuiv tuz caux stâuv. ³ Tah nyâyc tauh Stynz-munh ninyh taox nănh zan ănz nzac coiđ ninyh, womz songđ wav pênx samđ, cayx năngđ munh tayc samđ, yămz coiđ zuy njênf tayc stutx nzuf. ⁴ Tah stamz lanh Stynz-munh taox nănh zan nzac womz sting ninyh, womz songđ pênx samđ nzuf. ⁵ Yaz numđ cun coiđ womz woax lanh Stynz-munh coong, “Đăngb zengh woax tauh lex! Mâyh six tăng cah lof yămz, nâyx zanyf yămz woax tauh, mâyh tingc laiv hungđ seenz pengh stymz. ⁶ Wâyc stiz ayx mâyh nyăngz đăngb zengh munh, cloon stênx stengb samđ dleof seetb taih, nâyx zanyf seenz jic tuz phunz stiz hopb samđ gôh. ⁷ Yaz numđ naih woac tăng woa gongc hoomb bux coong, zâyf gôh, “Zâu Tênb-Hungh naih lokc jangx, tingc munh nyâuđ jaz nyăngz stoif năngđ nâyx, seenz zâyf pengh stymz gôh. ⁸ Tah stâyx lanh Stynz-munh taox nănh nyăngz zan nzac bah noib ninyh, bah noib tuz phepb pu munh. ⁹ Bamh munh zuc tâuf pu glutc nzuf, stiz songđ yônx zaux pamf tauv Tênb-Hungh bux, six naih lanyf ayx staiz nanc wâyb munh woax tauh, stiz max coi nyâuđ nhlimc stoif, phunb đangz lauf lov Tênb-Hungh nyăngz Gwăngz-eng tync. ¹⁰ Tah ngâuf lanh stynz-munh taox nănh nyăngz zan ănz nzac stengb hiv tync ninyh, Stengb hiv nyăngz Côkz songđ nzămc mengh đikc, munh songđ tăpc byeetc wâyc tanyđ munz. ¹¹ Max cun stiz hănđ six săngh sâyh munz seetb ningz nyupc, stiz yônx zaux tauv Tênb-Hungh, wâyc stiz zuc tanyđ munz, stiz lauf max coi nyâuđ wynb đangz nhlimc ayx of nyăngz stoif. ¹² Tah guc lanh Stynz-munh taox nănh nyăngz zan nzac Ơ-phơ-ratv coiđ ninyh, coiđ songđ gaib nzuf, wâyc coib jau bênc phunz toongz phanx Hungh stix yăngh. ¹³ Yaz phătc naih pôz tauh manđ yotz cayx năngđ zeng mengz, tăng Côngz nzeetx, cloon stengb hiv nzeetx, năngx cloon za stênx-stengb nzeetx njaf nja seetb taih. ¹⁴ Woa pôz tauh manđ yotz, six Manđ nyăngz pengz, stiz naih quênh ayx jix-caox njingc, stiz seetb ninyh lov bamh canz Hungh, hox nănh stiz căpx dlonf, zu tauv Tênb-Hungh cun nyeenh mănh nyăngz noib lub panx pengz. ¹⁵ Mungv bef! Yaz six ninyh cayx năngđ stac munh, poou phunz laiv lanh jâuz stymz buôngh lif nănh Gwuyz quav tuz gongx, woax tauh songđ naih oonz loc, nănh max zuc blănf stynb phunz munh phătc numđ nyayz nyăngz tync. ¹⁶ Manđ yotz ninyh ênz dlonf muif tauh Hungh yămz ah nomz tync, Hêpc-lu-woac hipđ ayx (Ha-ma-gê-đôn.) ¹⁷ Tah jeetb lanh Stynz-munh taox nănh zan nzac đamx gungh taih, yămz woa congx Hungh tync naih woac Coong, “songf gôh! ¹⁸ Lênh dlih naih bungh bitc tâuf nzăpc-nzăpc têx, yâuc naih bah cong bletz clinyb-clinyb têx, gungh nib đănz toongf, tăng cah lof ah yađ naih bamh munh yămz nâyx nomz bamh canz, max zengx naih laiv hâyđ Gungh nib tongf tuz nzongf năngđ nâyx hâyđ. ¹⁹ Woax nomz stengv songđ bengb ayx pôz phănc, manf Côkz stâyz phangz stengv lub, bengb lunc nzuf, Wâyc zuc Tênb-Hungh săngx tauv Ba-bi-lôn ayx Stoif, nănh phađ stiz hopb woax zan hănđ stoif tyu. ²⁰ Muif nomz coiđ yâuc tyuv nzuf, muif nomz zoongz zâyc gaih nzuf. ²¹ Yâuc năngx naih pyoc lub tăng gungh tuih nzac taih bopb munh, muif nomz pyoc niđ naih cox 36 sanz, bamh munh songđ zaux Tênb-Hungh, wâyc nâyx đomc wănh nanc wâyb nănh stiz.