¹ Blatc caf đangz,Woa nhlic lanh stynz-mumh naih ah lanh nzauf nhlic nomz zan coong bux yaz, "quaix nây taih, yaz oix phunz mâyh phătc zuc phađ woax tauh maif phăngh munh sab stâyv woa đungx nomz womz sting. ² Gungh đi Hungh stix ninyh văngc nănh, bamh canz nyeenh mănh yâuc bynz nănh ayx pongz lauh tyu. ³ Stynz-munh êu Singx-lingh stăngc ênz yaz ninyh stâyz-phangz blănf, yămz woa yaz phătc ah lanh munh sab, zâyh ah tauh stengb hiv njaox stib, naih nhlic nomz pyây, săpc nomz joongz, naih ja pib Tênb-Hungh bux pong nănh nyăngz stynb. ⁴ Woax lanh munh sab zuz gwuyz quav stib njamđ. Nănh nongc njauz eng, cloon pou zâuz pec, cloon sămz nongc zoongz stynb, nănh nyăngz puf nzauf ah nomz sămz zan, zamđ pong ayx huđ văngc munh nyăngz tyu. ⁵ Nănh nyăngz pyây nyah ja ah nomz bux pinyx vâyv, woax nomz bux âyz gâyf six năngđ nâyx. BA-BI-LÔN, STENGV LUB, MAIC PHĂNGH MUNH NZIF, AYX HUĐ PONG NZÊUX GUNGH ĐI ⁶ Yaz mangc phătc woax lanh munh nzif, bynz samđ, six hopb Tênb-Hungh nyăngz đăngb zengh munh, naih njih mungc yămz Zâu Yê-su, bix zuc tayx woax đomc samđ, yaz mangc phătc tauh munh nzif, seenz njingc nzongf. ⁷ Stynz-munh naih yaz, “săngh laix mâyh bix nyâyh ganc? Yaz oix pob manyf woax tauh pongz lauh munh nzif, cloon nănh zâyh woax tauh stengb hiv, naih nhlic nomz pyây, săpc nomz joongz, cloon max zengx plongx yangh woax đomc bux, âyz gâyf phunz mâyh pâyz. ⁸ Mâyh phătc cah đangc woax tauh Stengb hiv, six nâyx zanyf max săngh nzof, max naih lauh nănh năngx tăng woa cotb tôz staox taih, ninyh nzac zuc mêtc tync. Năngx naih woax đomc munh săngh yămz nây nib mync, max zengx naih stiz nyăngz bux staox ănz săngh mengc tanz, stiz six numđ njingc, mangc phătc tauh stengb hiv, cah đangc săngh, nâyx zanyf tayc, zâyf năngx săngh. ⁹ Mâyh zuc nongc tongb manyh nzăngđ pâyz tuz manyh pec, nâyx tauh stengb hiv, naih nhlic nomz pyây, âyz gâyf six woax tauh munh nzif, stâyv woa nhlic nomz zoongz. ¹⁰ Lâyc six nhlic tauh Hungh, pyaz tauh tayc stutc nzuf, năngx naih ah tauh nâyx zanyf săngh, zâyf naih ah tauh taih cayx tauv, woax tauh Hungh taih, nănh cungb yămz tuz ah dlapc. ¹¹ Stengb hiv Cah đangc săngh, six nâyx zanyf max naih săngh six tah pêtz tauh Hungh, woax tauh Hungh, six songc cloon cah đangc woa nhlic tauh Hungh, six nănh songđ zuc ninyh nzac tayc nyăngz tync. ¹² Săpc nomz joongz, six woa săpc tauh Hungh max zengx tuz cun, six stiz tuz stipx lanyf cloon woax tauh stengb hiv ayx Hungh songc ah nomz săngx huđ. ¹³ Woa săpc tauh Hungh, căpx dlonf songc ah nomz stymz, stiz songđ jaoz lanyf phunz stengb hiv. ¹⁴ Stiz songđ cloon pa-jiz yungh panx zax, six pa-jiz yungh hingh nănh stiz, wâyc zuc nănh six ayx manf Côkz nyăngz Zâu, yâuc ayx manf Côkz nyăngz Hungh, Zâu êu woax đomc stâyb sây nzuf stymz nyâuđ, tuz sên taih cloon nănh panx tuz hingh stiz. ¹⁵ Stynz-munh coong bux yaz, “mâyh phătc lâyc tauh pongz lauh munh nzif stâyv lâyc muif nomz womz sting six pây tauv muif hungđ pec stingx, muif nomz côkz, Coong muif hungđ nyeenh mănh woac yămz nây bamh canz. ¹⁶ Mâyh phătc lâyc tauh stengb hiv săpc nomz joongz, songđ oix hănđ tauh pongz lauh munh nzif, stiz oix zeb tuz nănh stynb sangc blănf nzuf, yâuc zeb nănh stynb A nhlinc, năngx zoz tâuf pu yiuc nzuf. ¹⁷ Wâyc Tênb-Hungh cănh phunz naih săpc nomz joongz woax tauh stengb hiv, naih lanyf ayx âyz nănh nyăngz zux ix cun, songđ toix nzuf Zâu Tênb-Hungh coong nyăngz woac seetb taih. ¹⁸ Mâyh phătc lâyc tauh ya munh nzif, six Cun nây gungh đi munh ayx Hungh, cloon muif nomz muôngf lub quaix nyăngz Hungh woax tauh."