¹ Yaz oix coong nyăngz âyz Gâyf cloon nyâuh yâuf-pez six Năngđ nâyx, six oix stipx nzif Pha nyăngz jax dlaih woax tauh toonz, nănh nyăngv tauh năngx gunx woax zanyf six năngđ ah tauh ayx nâuh Munh. max cun muif hungđ jax dlaih đangz phanx săngh nănh nyăngz nzuf. ² Nănh nyăngv zax năngx gunx nyăngz săngx huđ, nănh songđ zuc mungv âyz cun nănh jax toongx woax đomc Munh nyăngz puf đi, zu tauv nănh lub taih pênx tanyb nênh nănh nyăngz Pha tingc taih nyăngz săngx huđ nănh nzăngđ tuz pungx goib stuyh stymz. ³ Pănh lauf năngđ ha, pănh năngx gunx woax dlih lauf zuc yămz cun đamx Gungh woax tauh manđ nyăngz puf đi zuc ayx nâuh., ⁴ Six tauv săngx huđ pong Zâu Tênb-Hungh paiđ nănh nyăngz toonz taih, Stengb stâyv yămz đoouc lif Gâyf cah đi woax tauh Munh Sab. ⁵ Zâu Tênb-Hungh phunz nănh nyăngz toonz taih suc yămz đoouc lif Gâyf cah đi nyăngz Munh phunb đangz lauf pênx Nănh nyăngz Sây yungf. ⁶ Wâyc zuc nyâuh yâuf-pez six pênx Tênb-Hungh nyăngz namh nyâuf, nănh songđ paiđ nănh toonz nyăngz Singx-lingh taih yămz pănh nyăngz nyâuđ njaf êu coong, “A-ba, “âyz gâyf six Pha!”* ⁷ Năngđ ha nyâuh yâuf-pez songđ max zâyf ayx nâuh nyăngz Munh nzof gôh, nyâuh six ayx Tênb-Hungh nyăngz toonz sab, Nănh songđ Sađ nănh nyăngz Pôz phunz nyâuh yâuf-pez. ⁸ Cah lof Noib nyâuh yâuf pez max zengx pâyz tuz Zâu Tênb-Hungh woax đomc Munh zuc ayx nâuh phunz za dlănh. ⁹ Six nâyx zanyf nyâuh yâuf-pez pâyz tuz Zâu Tênb-Hungh six seenz nyăngz, nzof Zâu Tênb-Hungh songđ pâyz tuz nyâuh yâuf-pez seenz toix nzongf, ha wâyc săngh laix nyâuh Yâuf-pez bix năngx phunb đangz ninyh congx cun đămx yâuh nyăngz manđ? Nănh max yongb max hayh stăngc pănh ayx laiv hungđ, ha nyâuh yâuf-pez zâyf năngx oix ninyh ayx nâuh phunz nănh tymb naz?” ¹⁰ Ha nyâuh yâuf-pez lauf năngx oix lif lêpc nănh nyăngz noib lav săngb, nyăngv zunb stêtz naz? ¹¹ Yaz songđ numđ stauh nzongf, Wâyc zuc yaz cungb woangb yaz ayx nyăngz cumh pâuz max seetb laiv hungđ. ¹² Songx yâuf-pez lex! wâyc zuc yaz songđ cayx năngđ nyâuh yâuf-pez nâyx, Yaz jođ nyâuh lauf zuc cayx năngđ yaz nâyx, wâyc zuc dliênh noib nyâuh cloon yaz seenz gongx nzongf. ¹³ Naih dlih nyâuh yâuf-pez lauf năngx săngx yaz taih tah yeetx hâyđ, Yaz nyăngz stynb taix benyc, six yaz lauf năngx taih lănv cub jeenx phunz nyâuh yâuf-pez mungv. ¹⁴ Six max cun yaz gumc hoiđ nyâuh yâuf-pez zâuđ nzongf, six nyâuh yâuf-pez yâuc max phătc yaz stanc, max nzêmh yaz, phunb đangz lauf stipx yaz năngđ stipx Tênb-Hungh nyăngz Stynz-Munh, yâuc stipx năngđ Njâuv Zâu nâyx. ¹⁵ Woax zanyf nyâuh yâuf-pez oonz loc nzongf, nâyx zanyf nyâuh yâuf-pez nyăngz oonz loc quaix laiv tix ninyh nzof weh? Yaz năngđ cănh hayh stăngc nyâuh yâuf-pez ayx tuz zanyx manyf têx, nyâuh songđ zuc ngwoai nyâuh nyăngz mâyc ngănh seetb taih phunz yaz gôh. ¹⁶ Wâyc zuc yaz coong seenz Gâyf bux nyâuh yâuf-pez, nâyx zanyf yaz bix pênx nyâuh yâuf-pez nyăngz yônz zaz mah?” ¹⁷ Woax đomc ya Munh nef, nănh stiz oix lov jau cloon nyâuh yâuf-pez ayx gongx, six nănh stiz nyâuđ max gongx, Nănh stiz oix jaf nyâuh yâuf-pez nzengz cloon yaz bix ninyh lêpc nănh stiz. ¹⁸ Joomz nyâuđ cloon Munh ayx gongx six hođ, tinyh phanv ayx phunz Munh tuz gongx, max zâyf cungb yaz cloon nyâuh yâuf-pez yămz nyăngz săngx huđ nzăngđ ayx. ¹⁹ Yaz Stăngz nyăngz Munh Sây lex! Yaz tanyđ munz wâyc stengb nyâuh, zu tauv Njâuv Zâu taih săngh hanyh yămz nyâuh yâuf-pez cah njaf. ²⁰ Yaz oix tuz cloon sây yămz nzăngđ hayh coi wănc nyâuh, nâyx zanyf yaz numđ stauh max pâyz cayx coong ayx laix. ²¹ Nyâuh woax đomc yâuf-pez oix yămz đoouc lif gâyf cah đi nyăngz Munh lex! nyâuh numđ đoouc lif gâyf bux nyâuh coong laix? ²² Canyx-Stâub ja coong, “Apv-ra-ham naih iz lanh toonz, naih ah lanh six nâuh Munh yungf taih, ah lanh six pungx goib nyăngz munh yungf taih. ²³ Apv-ra-ham nyăngz toonz ayx nâuh nyăngz Munh stengb taih six âyz tongb hungb nyăngz Munh. Pungx goib woax tauh Stengb taih six âyz Tênb-Hungh nyunc phunz nyăngz woac stengb taih. ²⁴ Nâyx đomc iz tauh toonz pănh songđ hayh nongc ayx woac pây, woax đomc iz tauh Munh sab pây iz hungđ nyunc woac. Naih ah tauh pây yămz Si-nai Zoongz Tênb-Hungh Njăpc taih nyăngz nyunc woac. Woax tauh ya Munh nzif bux six hipđ ayx A-ga, nyăngz Sây yungf taih six pây ayx nâuh nyăngz Munh. ²⁵ A-ga six pây yămz Si-nai zoongz I-yiêpv-tô Stâyz-phangz, pây tauv nâyx yeenh stâyv Yê-lu-sa-lem Stengv. njynh woax nomz stengv nyăngz yeetx stong pec stingx zuc ayx nâuh phunz đoouc lif gâyf. ²⁶ Yămz cah zâyc nyăngz Yê-lu-sa-lem six pungx goib, woax nomz Stengv six ayx pănh nyăngz Nzif. ²⁷ Wâyc zuc Canyx-Stâub ja Coong, “Yê-lu-Sa-lem Stengv lex! “Mâyh six ah tauh max zengx naih sây nyăngz Munh sab, “nyămh dlongh ayx nzungz numđ nyađ, “Wâyc zuc Munh Nzif zuc quanyf sây, “Six năngx đungx têx Munh Nzif naih langh. ²⁸ Songx yâuf-pez lex! nâyx zanyf nyâuh yâuf-pez săngh Tênb-Hungh nyăngz Namh-nyâuf. Songđ âyz Nănh nyunc nyăngz woac ayx năngđ I-sakv, cah lof nâyx. ²⁹ Tongb hungb Munh yungf taih woax tauh toonz ayx peo ănz âyz Singx-lingh yungf taih woax tauh toonz, tauv nâyx zanyf lauf ha. ³⁰ Six Canyx-stâub ja coong laix? “ayx nâuh woax tauh Nzif cloon sây zuc luiđ seetb ninyh! “Wâyc zuc ayx nâuh woax tauh ya Munh Nzif max naih phănc, “songc cloon pungx goib woax tauh ya Munh Nzif. ³¹ Songx yâuf-pez lex! năngđ ha pănh songđ max zâyf pênx ayx nâuh woax tauh ya Munh Nzif nyăngz Sây, pănh six ayx pungx goib woax tauh ya Munh Nzif nyăngz Sây.