¹ Nyâuh yâuc-pez yămz Ga-la-ti nyăngz Munh oongx lex! laiv lanh ayx papz jaf nyâuh yâuf-pez nyâyh longđ? Yaz coong Manyf Njâuv Zâu Yê-su Tayc yămz săpc đăngc zax nyăngz jau phunz năngđ nyâuh cănh tuz mâyc phătc woa nâyx. ² Yaz oix nongc nyâuh yâuf-pez bux yaz ah hungđ, Nyâuh stipx Singx-lingh six wâyc lif đoouc-lif mah six? max zâyf đêh! Nyâuh tuz stipx Singx-lingh six nyâuh tuz numđ Cub jeenx. ³ Nyâuh yâuf-pez seenz oongx gôh! Quef coonz nyâuh coouv Njâuv Zâu nyăngz Singx-lingh ayx cumh pâuz, six nâyx zanyf nyâuh nongc bamh Munh nyăngz zux ix ayx tuz săngh laiv hungđ max? ⁴ Nyâuh songđ tăng laiv tanyđ zâuđ nanc đungx six max săngh nongc zâyf max? Yaz mungc six max woangb đêh! ⁵ Tênb-Hungh Sađ Singx-lingh phunz nyâuh yâuf-pez đungx yâuc yămz nyâuh yâuf-pez mungh tongx ayx jix caox njingc nyăngz dlayc six wâyc nyâuh yâuf-pez âyz Đoouc-lif ayx mah six nyâuh numđ yâuc nyunc zeen? ⁶ Nyâyh mangc geh! Apv-ra-ham zeen Tênb-Hungh, Zâu songđ stunx Apv-ra-ham cloon nănh hopđ nyâuđ. ⁷ Nyâuh yâuf-pez six zuc pâyz tuz naih seenz stymz six seenz zâyf Apv-ra-ham nyăngz Sây stunz. ⁸ Canyx-Stâub phunz pâyz đangc Tênb-Hungh oix phunz max zâyf Yiu-thai Munh zeen nănh, tuz cloon nănh hopđ nyâuđ, Canyx-Stâub songđ ja cuđ jeenx bux phunz Apv-ra-ham coong, “Gungh Đi Munh wâyc mâyh songđ tuz Tênb-Hungh sađ Pôz phunz. ⁹ Six coong laiv lanh zeen songđ tuz pôz năngđ Apv-ra-ham, wâyc zuc nănh stiz naih njih mungc tync. ¹⁰ Tinyh phanv coouv đoouc lif Gâyf nyăngz munh songđ zuc zaux, wâyc zuc Canyx-Stâub coong, “Laiv lanh max âyz nzuf Đoouc-lif Gâyf Stâub ayx woax tauh songđ zuc zaux.” ¹¹ Năngđ nâyx phătc tuz Manyf âyz Zâu Tênb-Hungh Mangc, max naih laiv lanh coouv đoouc lif Gâyf bix tuz cloon Zâu Tênb-Hungh hopđ nyâuđ, Wâyc zuc Canyx-Stâub ja coong, “Laiv lanh pengh stymz coouv seenz stymz six tuz săngh. ¹² Six Đoouc-lif Gâyf max pangc Seenz stymz ayx coonz. Wâyc zuc Canyx-stâub coong, “laiv lanh âyz Đoouc-lif Gâyf woax tauh songđ tuz săngh. ¹³ Đouoc-lif gâyf phunz pănh zuc zaux, six Njâuv Zâu suc pănh gâyh đutb đoouc lif Gâyf. Wâyc zuc Canyx-Stâub ja lănv coong, “laiv lanh zuc đyux woa njăngx songđ zuc zaux. ¹⁴ Njâuv Zâu Yê-su ayx năngđ nâyx wâyc phunz max zâyf Yiu-thai nănh stiz songđ tuz cloon Zâu Tênb-Hungh sađ Pôz phunz, năngđ Zâu sađ Pôz phunz Apv-ra-ham nâyx, năngđ nâyx wâyc phunz zeen Njâuv Zâu songđ tuz stipx Tênb-Hungh nyunc phunz nyăngz Singx-lingh. ¹⁵ Songx yâuf-pez lex! pănh zuc nyâyh âyz Tongb hungb bamh Munh nyăngz dlayc. Six coong năngđ naih iz pôz lanh njăpc săngh nyunc woac. laiv lanh yâuc max hayh pâu max hayh quanyf. ¹⁶ Tênb-Hungh nyunc woac phunz Apv-ra-ham cloon nănh nyăngz sây-stunz, “Coong sây stunz woax zâux woac six max zâyf coong tauv yeetx stong Munh đungx sây stunz, nănh nuz tauv woax tauh sây stunz six Njâuv Zâu. ¹⁷ Yaz oix coong nyăngz âyz Gâyf six năngđ nâyx, Tênb-Hungh njăpc săngh nyunc woac yâuc âyz nyunc woac ayx. Quaix đangz stâyx pez stamx săpc nyăngv. Tênb-Hungh njăpc Đooub-lif Gâyf taih, Six Đoouc-lif Gâyf max hayh phunz woax đomc nyunc woac tuih mah six max săngh nongc. ¹⁸ Six coong zuc Coouv Đoouc-lif Gâyf nzăngđ tuz stipx Tênb-Hungh sađ phunz nyăngz jax dlaih têx, songđ max zâuđ coouv nyunc woac, Six wâyc zuc Zâu Tênb-Hungh bêc sađ pôz phunz Apv-ra-ham đungx nzof gôh. ¹⁹ Ha Njăpc đoouc lif Gâyf taih nyăngz âyz Gâyf six lungđ? đoouc lif Gâyf njăpf taih wâyc phunz pamf Stoif nyăngz Munh. Zu oix stipx Tênb-Hungh nyunc phunz nyăngz woac woax tauh Apv-ra-ham nyăngz sây stunz taih tauv. six stynz-Munh jaoz phunz Mô-sê săngh tauh mungh tongx Munh njăpc Đoouc-lif Gâyf taih phunz songx Munh. ²⁰ Ayx mungh tongx Munh max zâyf cungb stăngc ah phanx cungv Six Tênb-Hungh pênx ah tauh. ²¹ Năngđ ha, đoouc lif Gâyf cloon Tênb-Hungh nyunc nyăngz woac max tinyh zuc mah? max zâyf đêh! Six coong đoouc lif Gâyf phunz Munh naih Mengc săngh, Munh songđ hayh Coouv đoouc lif Gâyf tuz cloon Tênb-Hungh hopđ nyâuđ. ²² Six Canyx-Stâub phunz njynh nây Gungh đi Munh tuz phătc Munh zuc Stoif stayb, phunz laiv lanh zeen coouv Njâuv Zâu songđ hayh tuz stipx nyunc phunz nyăngz woac. ²³ Cah đangc seenz stymz taih tauv, pănh tinyh đoih zuc đoouc lif Gâyf stayb cangđ pănh năngđ Stoif-Munh nâyx, zu tauv Seenz stymz hynđ yangh seetb taih. ²⁴ Coong njingc ninyh, đoouc lif Gâyf six săngh ah tauh quanz yeenv pănh ninyh tauv Njâuv Zâu. pănh songđ tuz cloon Tênb-Hungh hopđ nyâuđ yămz nănh nyăngz cah đangc. ²⁵ Nâyx zanyf, seenz stymz taih tauv, pănh songđ max zuc đoouc lif Gâyf cun pănh. ²⁶ Nyâuh yâuf-pez wâyc zeen Njâuv Zâu nyăngz seenz stymz songđ tuz ayx Tênb-Hungh nyăngz namh-nyâuf. ²⁷ Nyâuh yâuf-pez ayx quaix womz nyăngz Gâyf songđ tuz cloon Njâuv Zâu songc Mengc Săngh, songđ zoongz zuz nănh nyăngz stynb. ²⁸ Wâyc năngđ nâyx Yiu-thai Munh mah six Hi-lapc Munh yâuc max phân biêtc, Munh Nzif mah six Munh pha. Ayx nâuh mah six pungx goib, yâuc max phân biêtc, pănh tinyh đoih tinyh năngđ. ²⁹ Six coong nyâuh yâuf-pez tuz pênx Njâuv Zâu nyăngz Munh, nyâuh songđ săngh Apv-ra-ham nyăngz Sây stunz, songđ tuz stipx Tênb-Hungh nyunc phunz Apv-ra-ham nyăngz Pôz.