¹ Njâuv Zâu stăngc jêux pănh tuz ayx pungx goib nyăngz Munh nzof, six zuc zeen tingc, nongx gâyf zâyf năngx staix ninyh nzâyz đoouc lif gâyf nyăngz vănx tanz. ² Mungv gongx yaz Phao-lô bux nyâuh yâuf-pez nâyx đomc jau bef! Six coong nyâuh yâuf-pez năngx staix phunb đangz muf lêpc đoouc lif Gâyf ayx quaix catz nyăngz gâyf têx, Njâuv Zâu six max naih stuyh muc phunz nyâuh yâuf-pez gôh. ³ Yaz năngx bux woax đomc muif lanh Munh toonz tuz ayx quaix catz nyăngz gâyf woax đomc Munh, six zuc ayx âyz đoouc lif gâyf năngx nzuf. ⁴ Nyâuh yâuf-pez oix lêpc Đoouc-lif gâyf bix tuz cloon Tênb-Hungh hopđ nyâuđ nyăngz Munh lex! Nyâuh yâuf-pez zuc gâyh đutb Njâuv Zâu gôh, ayx Tênb-Hungh nyăngz Pôz tađ gôh. ⁵ Six pănh naih tync Mungc oix tuz pengh stymz, pănh six zuc nongc seenz stymz coouv Singx-lingh joomz nyâuđ zu. ⁶ Wâyc zuc pănh cloon Njâuv Zâu songc Mengc Săngh, Quaix catz max quaix catz nyăngz Gâyf max nongc seen, nongc seen quaix six zuc goib yangh lanh Stăngz lanh. ⁷ Nyâuh yâuf-pez tinyh tâu tyuv yoiz, laiv lanh tăng nyâuh yâuf-pez lêpc seenz Gâyf? ⁸ Jaf nyâuh yâuf-pez woax tauh max zâyf êu nyâuh yâuf-pez woax tauh đêh. ⁹ Six zuc năngđ cayx buôngh, ah tix nzu piny) ayx tuz ah coongh văn phutx nzuf. ¹⁰ Six yaz zeen tingc nyâuh yâuf-pez cloon yaz max naih pitc tyuh nyâuđ, Six sêu lunc nyâuh yâuf-pez woax tauh max cun laiv tauh songđ zuc tingc Stoif. ¹¹ Yâuf-pez lex! Six coong yaz năngx nzônh bux êu Munh ayx quaix catz nyăngz gâyf têx, Ha yaz săngh laix zâyf năngx zuc ayx peo? Six coong yaz năngđ nzônh têx! Yaz lănv săpc đăngc zax nyăngz gâyf songđ max naih laiv hungđ phunz Munh nzêmh. ¹² Jic tuz sêu nyâuh yâuf-pez lunc woax tauh, max zâyf cungb quaix catz nyăngz Gâyf cungv, ymz njynh cloon tix njync năngx nzuf. ¹³ Songx yâuf-pez lex! Tênb-Hungh êu nyâuh taih ayx pungx goib nyăngz Munh, six max tu dluyh stymz ninyh pamf Stoif, phunb đangz six zuc lanh Stăngz lanh, lanh Canyx bongc lanh. ¹⁴ Wâyc zuc Đoouc-lif Gâyf yeetx stong dlonf săngh ah tyuh coong, “six zuc lanh Stăngz lanh. Năngđ Stăngz pănh nyăngz stynb. ¹⁵ Six coong nyâuh yâuf-pez năngđ stanyđ hauđ lanh tăpc lanh, lanh naz lanh six zuc buôngh, nâyx tauh zuc pitc tauh hoiđ tayc stutc nzuf. ¹⁶ Yaz coong nyăngz âyz gâyf six năngđ nâyx, six zuc phunz Singx-lingh yeenv nyâuh yâuf-pez, năngx Gâyf âyz Stoif-munh nyăngz stymz nyâuđ cănh ayx. ¹⁷ Bamh munh nyăngz nyâuđ cloon Singx-lingh max tinyh zuc, Singx-lingh oix ayx nyăngz dlayc max toix Bamh munh nyăngz nyâuđ, nây iz hungđ pênx Yônz zaz, nyâuh nzof nzăngđ max hayh ayx. ¹⁸ Six coong Singx-lingh yeenv nyâuh yâuc-pez, nyâuh songđ max zuc yămz Đoouc-lif Gâyf cah đi. ¹⁹ Bamh Munh nyăngz stymz oix ayx nyăngz dlayc six năngđ nâyx, ayx max đăngb zengh, tinyh phanv ayx pongz lauh nyăngz dlayc. ²⁰ Paix miuc hanyh, pungx papz, lanh hănđ lanh, nzengz zax, panx zax, stâyx munz, six đunh nzengz ayx lub, phunz ayx sax peob. ²¹ Hănđ Munh hopb tyu bynz, căpx dlonf ayx huđ dlayc. nâyx đomc woac yaz bux nyâuh quaix nzof, six nâyx zanyf yaz năngx bux nyâuh yâuf-pez tymb, laiv lanh ayx nâyx đomc dlayc six max tuz stipx Tênb-Hungh nyăngz Côkz. ²² Six Singx-lingh stengb taih nyăngz dlayc six năngđ nâyx, phunz Munh naih nyâuđ hâuđ lênh Munh. Phunz Munh naih hônb-hiđ, naih pengh oonz, naih noic naih stymz Stăngz Munh. ²³ Ayx nyâuđ dlênc nyangc Munh. nâyx đomc dlayc Đoouc-lif Gâyf max Câmx. ²⁴ Seenz ayx Njâuv Zâu nyăngz Munh woax đomc, zoz nănh stiz bamh Munh ayx Stoif nyăngz oix tingz ănz săpc đăngc zax nzuf nzof gôh. ²⁵ Pănh coouv Singx lingh tuz săngh, songđ zuc phunz Singx-lingh yeenv. ²⁶ Năngx Gâyf zanyb lub, lanh zokb lanh. Lanh hănđ lanh.