17 ¹ Blătc cah đangz, Woa nhlic tauh stynz-mumh naih ah tauh puf nzauf nhlic nomz zan coong bux yaz, "Quaix nây taih, yaz oix phunz mâyh mangc naih manyh yangh lub woax tauh maic phăngh nyăngz munh sab zuc stâyv woa đungx nomz womz sting woax tauh munh sab zuc phađ năngđ laix. ² Gungh đi hungh stix ninyh văngc nănh, bamh canz nyeenh mănh yâuc bynz nănh ayx pongz lauh tyu. ³ Stynz-munh êu Singx lingh ênz yaz ninyh woa stâyz phangz blănf, yămz woa yaz phătc ah lanh munh sab, zâyh ah tauh stengb hiv njaox stib, naih nhlic nomz pyây, săpc nomz joongz, yâuc naih đăngc ja pib tauv Tênb-Hungh nyăngz bux pong nănh nyăngz stynb. ⁴ Woax lanh munh sab zuz gwuyz quav stib njamđ. Nănh nongc njauz zâuz eng, cloon poou zâuz pec, cloon sămz nongc zoongz stynb, nănh nyăngz puf nzauf ah nomz sămz zan, zamđ pong ayx tih stanv nyăngz tyu. ⁵ Nănh nyăngz pyây nyah ja ah nomz bux pinyx, woax nomz bux âyz gâyf six năngđ nâyx. BA-BI-LÔN, STENGV LUB, MAIC PHĂNGH NYĂNGZ MUNH SAB, AYX HUĐ PONG NZÊUX NÂY GUNGH ĐI ⁶ Yaz mangc phătc woax lanh munh sab bynz samđ, six bynz hopb Tênb-Hungh nyăngz đăngb zengh munh nyăngz samđ, naih njih mungc yămz Zâu Yê-su, bix zuc tayx woax đomc munh nyăngz samđ, yaz mangc phătc lanh munh sab, seenz njingc nzongf. ⁷ Stynz-munh naic yaz, “Săngh laix mâyh bix nyâyh ganc? Yaz oix pob manyf woax tauh pongz lauh munh sab, cloon nănh zâyh woax tauh stengb hiv, naih nhlic nomz pyây, săpc nomz joongz, cloon max zengx plongx yangh woax đomc bux, âyz gâyf phunz mâyh pâyz. ⁸ Mâyh phătc cah đangc woax tauh stengb hiv, six nâyx zanyf nănh max naih nzof, max naih lauh nănh năngx tăng woa đic ngokc cotb seetb taih, ninyh nzac zuc mêtc nyăngz tync. Năngx naih woax đomc munh săngh yămz nây nib mync, max zengx naih nănh stiz nyăngz bux staox ănz săngh mengc tanz woax đomc munh, stiz six numđ njingc, mangc phătc woax tauh stengb hiv, cah đangc săngh, nâyx zanyf tayc, blătc nây quaix đangz nănh zâyf năngx hynđ seetb taih woax tauh. ⁹ Mâyh zuc nongc tongb manyh nzăngđ pâyz tuz manyh pec, nâyx tauh stengb hiv, naih nhlic nomz pyây, âyz gâyf six woax tauh munh sab, stâyv woa nhlic nomz zoongz zâyc. ¹⁰ Lâyc six nhlic tauh hungh, pyaz tauh tayc stutc nzuf, năngx naih ah tauh nâyx zanyf săngh, zâyf naih ah tauh taih cayx tauv, woax tauh hungh taih tauv nănh cungb yămz tuz ah dlapc. ¹¹ Stengb hiv cah đangc noib năngx săngh, six nâyx zanyf max naih six woa tah pêtz woax tauh hungh, woax tauh hungh, six songc cloon cah đangc woa nhlic tauh hungh, nănh stiz songđ ninyh nzac zuc tayc nyăngz tync. ¹² Săpc nomz joongz, six woa săpc tauh Hungh max zengx tuz cun, six nănh stiz tuz stipx lanyf cloon woax tauh stengb hiv ayx hungh songc ah nomz săngx huđ. ¹³ Woa săpc tauh Hungh, căpx dlonf songc ah nomz stymz, nănh stiz songđ jaoz lanyf phunz tauh stengb hiv. ¹⁴ Nănh stiz songđ cloon pa-jiz yungh panx zax, six pa-jiz yungh panx tuz hingh nănh stiz, wâyc zuc nănh six ayx manf Côkz nyăngz Zâu, yâuc ayx manf Côkz nyăngz Hungh, Zâu êu woax đomc stâyb sây buz nzuf stymz nyâuđ, tuz sên taih cloon nănh ninyh panx tuz hingh nănh stiz. ¹⁵ Stynz-munh coong bux yaz, “Mâyh phătc lâyc tauh ayx pongz lauh munh sab stâyv lâyc muif nomz womz sting six pây tauv muif hungđ pec stingx, muif nomz côkz, Coong muif hungđ nyeenh mănh nyăngz woac yămz nây bamh canz. ¹⁶ Mâyh phătc lâyc tauh stengb hiv săpc nomz joongz, songđ oix hănđ lâyc tauh ayx pongz lauh munh sab, stiz songđ oix zeb tuz nănh stynb sangc blănf nzuf, yâuc zeb nănh stynb A nhlync, năngx zoz tâuf pu nănh yiuc nzuf. ¹⁷ Wâyc zuc Tênb-Hungh cănh phunz naih săpc nomz joongz woax tauh stengb hiv, naih lanyf ayx âyz nănh nyăngz zux ix, songđ toix nzuf Zâu Tênb-Hungh coong nyăngz woac seetb taih. ¹⁸ Mâyh phătc lâyc tauh ya munh sab, six cun nây gungh đi munh ayx hungh, cloon muif nomz stengv lub quaix nyăngz hungh woax tauh." Ba-bi-lôn stengv zuc mêtc