16 ¹ Yaz năngx numđ naih woac stingb coong yămz woa congx Hungh tync seetb taih bux êu woa nhlic tauh Stynz-munh coong, “Ninyh zef gôh! Zoz Tênb-Hungh hănđ stoif woa nhlic nomz staiz nanc zan taox nzac nib ninyh” ² Woa zeetx tauh Stynz-munh nzâyz nănh nyăngz zan ninyh taox nzac nib taih, naih tăpb stengb hiv yeenx, congx cloon nănh nyăngz hanyh woax đomc munh, songđ săngh sâyh munz nyuiv tuz caux stâuv. ³ Nyâyc tauh Stynz-munh ninyh taox nănh zan ănz nzac coiđ ninyh, womz songđ wav pênx samđ, cayx năngđ munh tayc samđ, yămz coiđ zuy njênf tayc stutx nzuf. ⁴ Tah stamz tauh Stynz-munh taox nănh zan nzac womz sting ninyh, womz songđ pênx samđ nzuf. ⁵ Yaz numđ cun coiđ womz woax tauh Stynz-munh coong, “Đăngb zengh woax tauh lex! Mâyh six tăng cah lof yămz, nâyx zanyf yămz woax tauh, Mâyh phađ laiv hungđ seenz tuz pengh stymz. ⁶ Wâyc mâyh ayx phunz đăngb zengh nyăngz munh, cloon stênx stengb nyăngz munh samđ dleof seetb taih woax tauh, nâyx zanyf seenz jic tuz phunz mâyh hopb nănh stiz nyăngz samđ gôh. ⁷ Yaz numđ naih woac tăng woa gongc hoomb bux coong, zâyf gôh, “Zâu Tênb-Hungh naih lokc jangx, tingc munh nyâuđ jaz nyăngz stoif năngđ nâyx, seenz zâyf pengh stymz gôh. ⁸ Tah stâyx tauh Stynz-munh taox nănh nyăngz zan nzac bah noib ninyh, bah noib tuz phepb ayx tâuf pu munh. ⁹ Bamh munh zuc tâuf pu glutc nzuf, stiz songđ yônx yâuc zaux pamf tauv Tênb-Hungh nyăngz bux, six naih lanyf ayx staiz nanc wâyb munh woax tauh, nănh stiz lauf max nyunc coi nyâuđ nhlimc stoif, phunb đangz lauf lov Tênb-Hungh nyăngz gwăngz-eng tync. ¹⁰ Tah ngâuf tauh stynz-munh taox nănh nyăngz zan ănz nzac stengb hiv tync ninyh, Stengb hiv nyăngz Côkz songđ nzămc mengh đikc, munh songđ zuc tăpc byeetc wâyc tanyđ munz. ¹¹ Max cun nănh stiz hănđ six săngh sâyh munz seetb ningz nyupc, stiz songđ yônx yâuc zaux tauv Tênb-Hungh, songđ wâyc nănh stiz zuc tanyđ munz, nănh stiz lauf max coi nyâuđ wănc stymz wynb đangz nhlimc stiz ayx huđ nyăngz stoif. ¹² Tah guc tauh Stynz-munh taox nănh nyăngz zan nzac Ơ-phơ-ratv coiđ ninyh, coiđ womz songđ gaib nzuf, wâyc coib jau phunz toongz phanx nyăngz Hungh stix yăngh. ¹³ Yaz năngx phătc naih pôz tauh manđ yotz cayx năngđ zeng mengz nâyx, tăng Côngz nzeetx, cloon stengb hiv nzeetx, năngx cloon za stênx-stengb nzeetx njaf nja seetb taih. ¹⁴ Woa pôz tauh manđ yotz, six manđ nyăngz pengz, stiz naih quênh ayx jix-caox njingc, stiz seetb ninyh lov bamh canz Hungh, hox nănh stiz căpx dlonf, zu tauv Tênb-Hungh ayx Zâu cun nyeenh mănh nyăngz noib lub tauv panx pengz. ¹⁵ Mungv bef! Yaz six ninyh cayx năngđ stac munh, poou phunz laiv lanh jâuz stymz buôngh leđ tuz nănh nyăngz gwuyz quav dlăngc woax tauh songđ naih pengh oonz, nănh max zuc blănf stynb yămz phunz munh phătc nănh numđ nyayz nyăngz tync. ¹⁶ Woax đomc Manđ yotz ninyh ênz muif tauh Hungh căpx dlonf yămz ah nomz tync, Hêpc-lu-woac hipđ ayx (Ha-ma-gê-đôn.) ¹⁷ Tah jeetb tauh Stynz-munh taox nănh zan nzac đamx gungh taih, yămz woa congx Hungh tync naih woac bux coong, “Songf nzof gôh! ¹⁸ Lênh dlih naih bungh bitc tâuf nzăpc-nzăpc têx, yâuc naih bah congz bletz clinyb-clinyb têx, gungh nib đănz toongf, tăng cah lof ah yađ naih bamh munh yămz nâyx nomz bamh canz woax zanyf, max zengx naih laiv hâyđ gungh nib tongf tuz nzongf năngđ nâyx hâyđ. ¹⁹ Woax nomz stengv songđ bengb ayx pôz phănc, manf Côkz nyăngz stâyz phangz stengv lub, bengb lunc nzuf, Wâyc zuc Tênb-Hungh săngx tauv Ba-bi-lôn ayx nyăngz Stoif, Nănh songđ phađ stiz hopb woax zan hănđ stoif nyăngz tyu. ²⁰ Muif nomz coiđ yâuc tyuv nzuf, muif nomz zoongz zâyc gaih nzuf. ²¹ Yâuc năngx naih pyoc lub tăng gungh tuih nzac taih bopb munh, muif nomz pyoc niđ cox naih 36 sanz, bamh munh songđ zaux Tênb-Hungh, wâyc nâyx đomc wănh nanc wâyb nănh stiz. Maic phăngh woax lanh munh sab zâyh stengb hiv