18 ¹ Yaz phătc nâyx đomc blătc quaix đangz, yaz năngx phătc pitc tauh Stynz-munh tăng Tênb-toongh seetb taih, woax tauh munh naih quênh lub nzongf, yâuc naih gwăngz-eng syux nzêux nây bamh canz. ² Nănh nongc stingb hamv coong, “Ba-bi-lôn stengv lex! plupc lakb! plupc lakb zef gôh! Nâyx zanyf six pênx stanyv manđ, cloon stanb nzangh yămz nyăngz tync, yâuc naih cloon muif hungđ manđ yotz yămz lâyc, năngx naih đungx hungđ stengb hauđ, cloon naih wâyx nyăngz đuz noc taih dlonf yămz lâyc. ³ Nănh plupc lakb nzuf, wâyc zuc manf Côkz munh oix ninyh tac nănh hopb Tênb-Hungh hănđ stoif nyăngz tih stanv nyăngz tyu, songđ zuc plupc lakb, wâyc bamh canz hungh stix oix ninyh văngc nănh, gungh đi stanyb âyx munh oix păngc nănh tuz puv quâyx." ⁴ Yaz năngx numđ naih woac stingb tăng Tênb-toongh coong nzac taih, yaz nyăngz pec stingx lex! Tyuv ninyh gâyh lâyc nomz Ba-bi-lôn, stengv, phunz nyâuh max zuc tac cloon nănh stiz ayx stoif. songđ phunz nyâuh max zâuđ cloon stiz pongh zuc dlauc wâyb. ⁵ Wâyc zuc stiz ayx stoif lub đuiz njăngb toongz gungh, wâyc zuc Tênb-Hungh max nyâuđ cob nănh stiz ayx pamf nyăngz stoif. ⁶ Nănh ayx laix phunz nyâuh, nyâuh nyămh dlongh ayx clao iz yămc toiv phunz nănh stiz. Năngđ stiz ayx ănz nyâuh nâyx, Seenz zuc zanđ tyu năngx jetz iz yămc toiv phunz stiz, cayx năngđ stiz zanđ phunz pitc lanh nâyx. ⁷ Nănh stiz cănh zanyb stiz numđ lub, yâuc cănh âyz stiz stymz nyâuđ nyâyh ayx muif hungđ, Six zuc ayx clao phunz stiz zuc tanyđ đungx hungđ dlauc wâyb, năngđ stiz ayx ănz nyâuh woax hungđ, nănh nyăngz stymz nyâuđ nyâyh coong, "Yaz six ayx hungh stix stâyv woa hungh tync, "Yâuc max zâyf munh nzif qua, yaz max pâyz numđ stauh six lungđ. ⁸ Tauv naih ah noib, nănh six zuc staiz nanc tuih nzac nănh cah zâyc taih, phunz nănh zuc tayc, zuc tanyđ nyâuđ sab pungx stingb haoh, wâyc nănh six zuc tâuf pu, wâyc zuc Zâu six Tênb-Hungh, naih lanyf lub quaix stămđ nănh woax tauh." ⁹ Bamh canz Hungh stix yâuc ninyh văngc nănh, mungc nănh tuz puv quâyx woax đomc munh, tuz phătc pu nănh woax đomc tâuf sâuv pumh staox taih, stiz songđ tinyh đoih pungx stingb haoh, nănh stiz numđ mâux, yâuc numđ stâyb, wâyc nănh zuc tayc. ¹⁰ Nănh stix numđ cumh nzav, stâuđ woa côz côz nga mangc, phătc nănh zuc dlauc wâyb, stiz songđ hamv coong, “Stauh gôh, Seenz tayv mâyh numđ stauh gôh! naih manyh yangh pu quâyx Ba-bi-lôn stengv lex! ah zanyf săngx huđ gungh mâyh bêc zuc phađ nzof. ¹¹ Gungh đi stanyb âyx munh numđ stâyb nănh, songđ yônx mengc haoh, wâyc zuc blătc nây staox ninyh max naih mănv ninyh zoz nănh stiz nyăngz huv. ¹² Nănh stiz nyăngz huv, six sămz cloon nyanh, cloon munh nzif nongc zoongz stynb nyăngz njauz poou zâuz, đôc buyx, stib njamđ, poix, poix stib longz, cah sangz đangz, nongc jangf nyah, cloon njăngx, nongc njab, nongc tongh, zâyx taih nyăngz muif hungđ. ¹³ (Cuyx njăngx, phan-sen-cen, ô liu yâuh,) (cah sangz đangz, tungh cuđ tyu, văn, blauh zayz, yungh ngoongh, maf, maf sex, ayx nâuh munh, cloon munh nyăngz mengc hoonh. ¹⁴ Woax đomc stanyb âyx munh coong, “Ba-bi-lôn lex! mâyh nyăngz stymz oix nongc quai vâyc woax đomc jac nzuf nzof gôh, muif hungđ saix nyăngz jax toongx, cloon manyh yangh songđ gaih nzuf, blătc nây ninyh mâyh songđ max naih nâyx đomc nzof gôh. ¹⁵ Nănh stiz mungc lâyc tauh munh sab, ayx stanyb âyx maif maic bix tuz puv quâyx, nănh stiz seenz numđ cumh nzav nănh pongh zuc dlauc wâyb, stiz songđ pyeenv gâyh yămz côz côz ha, numđ stauh yônx mengc pungx stingb haoh. ¹⁶ Stiz hamv coong, “Seenz numđ stauh lâyc nomz stengv lub gôh! zuz đôc buyx, stib njamđ, stib longz, yâuc nongc sămz, nongc poou zâuz saix nzâyz taih nongc zoongz stynb eng nzăpc nzăpc têx. ¹⁷ Cungb ah zanyf gungh, yeetx stong puv quâyx zuc mêtc quaiz nzuf, đangđ quanz, cloon đangđ nâuh, cloon yămz đangđ njaf nyăngz zeb munh, năngx cloon yeetx stong munh yămz coiđ lov nhlync woax đomc munh, stâuđ gâyh côz côz ha mangc Ba-bi-lôn. ¹⁸ Nănh stiz mangc phătc tâuf sâuv tăng woa nomz stengv pumh staox taih, stiz hamv haoh coong, “Max zengx naih laiv nomz stengv lub tuz năngđ lâyc nomz stengv lub." ¹⁹ Nănh stiz songđ maob nib bungb plauf ănz pyây, hamv haoh yônx mengc coong, “Seenz numđ stauh lâyc nomz stengv lub gôh! muif lanh naih đangđ, naih bayh quaix coiđ, cloon mungc lâyc nomz stengv, bix tuz puv quâyx woax đomc munh, ah zanyf gungh yâuc zuc mêtc nzuf pênx njăngv huđ. ²⁰ Tênb-toongh lex! seetb jab nyađ gôh, Tênb-Hungh nyăngz pec stingx cloon woax đomc cumh pâuz munh, năngx cloon stênx stengb! pungx stymz nyađ gôh wâyc Tênb-Hungh stăngc nyâuh phađ lâyc nomz stengv clao yônz phunz nyâuh nzof!" ²¹ Năngx naih ah tauh Stynz-munh naih jab nzongf pâuh ah nomz njauz pyây cayx năngđ njauz mac nâyx, quanyf ănz nzac coiđ ninyh, nănh coong, “Ba-bi-lôn stengv lub lex! Mâyh six năngđ nomz njauz mac nâyx zuc quanyf nzac coiđ ninyh, max naih mănv năngx hayh lov tuz pongh mâyh. ²² Blătc nây max naih mănv tuz numđ mâyh ayx nzungz, pyom blungh blex, quetb lanyh njămh, blătc nây staox ninyh mâyh max naih laiv lanh munh ayx stangc yoiz, stâyv quâyx max naih mănv tuz numđ mâyh mah njauz mac buib. ²³ Tăng nây staox ninyh yămz mâyh lâyc cah njaf songđ max naih toongz syux gwăngz, yâuc max naih săngb bongf, săngb lanh nyăngz stingb yămz mâyh lâyc cah njaf, cah đangc noib mâyh ayx phunz bamh canz stanyb âyx munh lub quaix woax đomc. ayx papz jaf hoiđ manf Côkz pec stingx. ²⁴ Mâyh zuc nyeenc tanyđ stoif, wâyc mâyh tayx tâuc woac munh, cloon Zâu nyăngz pec stingx munh đăngb, samđ yămx nzêux nây nib mync. Tênb-toongh Stynz-munh tanv Tênb-Hungh