4 ¹ Yămz nyâuh yâuf pez woa cah njaf, naih laiv hungđ ayx phunz nyâuh tinyh nzengz max? Six wâyc nyâuh nyăngz nyâuđ naih hănđ munh nyăngz dlayc, yâuc pâyh siđ nzăngđ ayx hoiđ phunz nyâuh tinyh panx max zâyf mah? ² Nyâuh mauh oix tuz munh nyăngz laiv hungđ, yâuc mauh max hayh tuz, nyâuh songđ ninyh tayx munh, songđ nzengz săngh panx zax, lauf mauh max tuz laiv hungđ, nyâuh oix nongc woax hungđ yâuc max tuz, six wâyc nyâuh max jođ Tênb-Hungh. ³ Nyâuh jođ blătc yâuc max tuz, six wâyc nyâuh jođ longđ, nyâuh cungb oix nongc nzâyz ninyh ayx mynb đupx. ⁴ Stymz yêuz nyăngz munh lex!* nyâuh max zengx pâyz tuz cloon bamh canz ayx toic woax đomc six cloon Tênb-Hungh săngh yônz zaz max? Năngđ naz laiv lanh cloon bamh canz munh sitx toic, woax lanh six cănh ayx phunz nănh pênx Tênb-Hungh nyăngz yônz zaz. ⁵ Nyâuh yâuf pez nyâyh coong Canyx-stâub nyăngz woac max naih âyz gâyf mah? Tênb-Hungh phunz yămz pănh nyăngz nyâuđ njaf woax tauh singx-lingh oix nzengz cun pănh. ⁶ Six nănh oix sađ pôz pâu phunz năngx đungx, wâyc zuc Canyx-stâub coong, “nănh zengv woax đomc ayx lub nyăngz munh, yâuc sađ pôz phunz woax đomc nhlimc ayx jeenz. ⁷ Năngđ naz, oix zuc mungv Tênb-Hungh cun, yâuc aox nhlengc manđ Hungh, Sax-tanx songđ tyuv gâyh nyâuh gôh. ⁸ Oix zuc ninyh yămz stătx Tênb-Hungh, nănh songđ yămz stătx nyâuh yâuf pez, stoif munh lex! seenz zuc đaox nyâuh nyăngz puf năngx dlăngc, iz tyuh nyâuđ nyăngz munh lex, songđ zuc đaox nyâuh nyăngz nyâuđ năngx dlăngc. ⁹ Seenz zuc numđ stauh pungx stingb haoh, coi stauh pênx nyađ, coi jeetx pênx stauh. ¹⁰ Oix zuc nhlimc ayx jeenz yămz Tênb-Hungh nyăngz cah đangc, Nănh songđ hayh pâuh nyâuh staox njangb. nyâuh yâuf pez max zâyf ayx stămđ stoif quanz ¹¹ Yâuf pez lex, nyâuh lanh năngx gâyf coong peo lanh, laiv lanh coong peo nănh nyăngz yâuf pez, mah six tingc nănh yâuf pez nyăngz stoif, woax lanh lauf coong peo Đoouc lif gâyf, yâuc yônx coong Đoouc lif gâyf ayx max pengh, six coong nyâuh yônx Đoouc lif gâyf ayx max hođ, nyâuh six max âyz Đoouc lif gâyf ayx nyăngz munh. ¹² Cungb naih ah tauh Tênb-Hungh njăpc Đoouc lif gâyf taih, yâuc ayx stămđ stoif quanz, six seenz zâyf hayh Njâuv munh, yâuc hayh mêtc munh woax tauh, nyâuh six mănv? bix năngx nzađ tingc nyâuh yâuf pez nyăngz stoif? ¹³ Coong nâyx đomc woac nyăngz munh mungv yaz coong bex, nyâuh coong nâyx noib mah six săngx đoomz, pănh six ninyh nâyx nomz stengv, mah six woax nomz stengv ayx stanyb âyx năngx puv quâyx đangc. ¹⁴ Six nyâuh yâuf pez max pâyz tuz săngx đoomz nyâuh nyăngz mengc six săngh laix? Nyâuh six năngđ ah tungđ bungc đay seetb yangh, ah zanyf gungh yâuc yuc đanv nzuf. ¹⁵ Six nyâuh yâuf pez hopđ zuc coong, “Zâu nyăngz zux ix nzăngđ phunz buz tuz săngh, buz bix hayh ayx tuz nâyx hungđ woax hungđ. ¹⁶ Six coong nyâuh yâuf pez năngđ nzeetx lub, six ah hungđ okx nyăngz dlayc. ¹⁷ Six coong laiv lanh năngđ pâyz tuz nănh hopđ zuc ayx laiv hungđ gongx nyăngz dlayc, yâuc max ayx, woax lanh songđ naih stoif. Bux puv quâyx munh