3 ¹ Yaz nyăngz yâuf pez lex, Nyâuh yâuf pez năngx gâyf oix naih đungx lanh Stênx stengb, wâyc zuc nyâuh pâyz tuz ayx stênx stengb nyăngz munh six zuc tingc stoif năngx niđ têx. Max ayx stênx stengb nyăngz munh. ² Pănh muif lanh munh ayx longđ đungx hungđ dlayc, six laiv lanh njynh leox max coong longđ lungđ, woax lanh songđ cun tuz nănh nyăngz stynb. ³ Pănh zoz maf longh cloon jăkc lopb ănz maf nzeetx sâu. Songđ hayh cun tuz cloon stynb stayđ nzuf, pănh oix ênz nănh ninyh laiv tix yâuc tuz. ⁴ Nyâyh mangc jađ, ah saz đangđ tăng laiv lub, zuc nzaox nyongđ ninyh, pănh cungb nongc stynz đangđ zâyh coi ninyh, max cun stynz đangđ zâyh tăng laiv jeenz, songđ hayh coi tuz săngh saz đangđ mungv âyz pănh nyăngz stymz nyâuđ nyâyh. ⁵ Tauh munh stynz byeetc lauf năngđ ha, max cun nănh hănđ six ah hungđ jeenz quaix yămz pănh nyăngz stynb, yâuc năngx hayh nzeetx blangc coong tuz đungx hungđ seetb taih. Nyâyh mangc jađ, tikx cay tâuf byeetc jeenz, năngx hayh pu sac tuz săngh tungđ jêmh. ⁶ Byeetc six năngđ tâuf nâyx, max cun stynz byeetc six ah hungđ okx nzongf yămz pănh nyăngz stynb, bleetc songđ hayh ênz stynb nzac đic nyokc nyăngz tâuf pu tuz sac pănh nyăngz stynb săngh stâyv munh. ⁷ Muif hungđ stanyb hauđ nangz cloon byauf, đuz noc, nyoongz nib mync songđ zuc mungv bamh munh cun nănh stiz. ⁸ Six max naih mănv hayh cun tuz stynz byeetc, byeetc six okx nzongf max naih mănv hayh cun tuz nănh, naih tôc munh tayc nyăngz njaiz mađ pong nzuf. ⁹ Pănh nongc byeetc tanv Zâu nzangc pha, yâuc nongc byeetc zaux munh, nzangc pha Tênb-Hungh âyz nănh nyăngz hanyh jangx zâyx pănh bamh munh taih. ¹⁰ Tanv nyăngz woac cloon zaux munh nyăngz woac songc ah stynz byeetc coong seetb taih, yaz nyăngz yâuf pez lex, ayx năngđ ha six max săngh gôh. ¹¹ Ah nomz womz sting hayh đunh tuz womz cuđ cloon womz imz tinyh zanđ max? ¹² Yaz nyăngz yâuf pez lex, Vănx tauh njăngx hayh săngh (ô-liu) pyâu max? Tungh cuđ mâyb hayh săngh vănx tauh pyâu max? Womz đaih sting hayh đunh womz cuđ max?” Tăng cah zâyc taih nyăngz tongb manyh ¹³ Yămz nyâuh yâuf pez woa naih laiv lanh tongb manyh munh max? Nănh six nongc nyâuđ dlênc, nongc tongb manyh ayx gongx dlayc phunz nâyx hungđ munh. ¹⁴ Six coong mănv năngđ naih nyâuđ imz, tinyh hănđ tinyh zab, tâuh cănh tuz gongx, năngx gâyf tanv coong cănh naih tongb manyh, max tuz puv maoh aox seenz gâyf. ¹⁵ Woax hungđ tongb manyh max zâyf tăng Tênb-Hungh phunz taih nyăngz tongb manyh, yămz bamh munh nyăngz stymz nyâuđ cănh nyâyh seetb, yâuc yămz manđ nyăngz tongb manyh nyâyh seetb taih. ¹⁶ Laiv nomz tync, naih pâyh siđ tinyh hănđ, tâuh cănh tuz gongx, naih sêu lunc nyăngz dlayc, woax tix six naih caux nzuf muif hungđ okx nzongf nyăngz dlayc. ¹⁷ Tăng Tênb-Hungh taih nyăngz tongb manyh, tah yeetx six đăngb zengh, pengh stymz, nyâuđ dlênc, sting jaođ, woax hungđ tongb manyh six phunz munh lanh stăngz lanh, cungb ayx gongx nyăngz dlayc, max phătc munh stanc, yâuc max ayx pâyh zac nyâuđ ngokx. ¹⁸ Laiv lanh bux tuz iz phanx munh hopđ nyâuđ taih, six songx pengh oonz nyăngz nhlimb, sâub taih yâuc tuz gongx nyăngz phănc. Stungx mengc phunz Tênb-Hungh