5 ¹ Puv quâyx munh lex, mungv yaz coong bex, oix zuc numđ stauh pungx stingb haoh, wâyc zuc woax đomc staiz nanc, six plongz nzac nyâuh yâuf pez cah zâyc taih. ² Nyâuh nyăngz puv quâyx yâuc zuc jac nzuf, nzof nyâuh nyăngz gwuyz quav yâuc zuz jengz tăpf huđ nzuf. ³ Nyâuh nyăngz sămz nyanh yâuc hayh seetb đingv nzuf, woax đomc đingv yâuc ayx zanyx manyf phunz nyâuh yâuf pez pâyz tuz nyâuh ayx longđ, woax đomc đingv yâuc nhlync nyâuh nyăngz stynb stayđ năngđ tâuf pu nâyx, nyâuh cungb numđ stauh sâub nâyx đomc sămz nyanh phunz tauv môtc zapz nyăngz noib. ⁴ Nyâuh yâuf pez max nyunc coib congz stynh phunz stăngc nyâuh sâub jengz zunb nyăngz munh, nâyx đomc congz stynh êu woax đomc ayx congz nyăngz munh cooux nyâuh, congz munh cooux nyâuh woax đomc woac songđ tongb tauv naih lanyf pengh quaix woax tauh nyăngz Zâu bah noomh. ⁵ Nyâuh yâuf pez yămz nây stâyv sangc, cungb tâuh tuz nhlync cuđ hopb gongx quaix stymz, năngđ munh otx stanyb hauđ cunc, zu tauv bengc săngx huđ zuc tayx. ⁶ Nyâuh tingc yâuf pez nyăngz stoif, yâuc tayx munh gongx munh, nănh stiz yâuc max aox nyâuh. Zuc nongc naih stymz tanyđ ⁷ Yâuf pez lex, six zuc nongc stymz zu năngx tauv pănh nyăngz Zâu taih, mangc geh! Ayx njingh nyăngz munh nănh stiz nongc noic zu tuz tauv săngx huđ sâub nănh stiz nyăngz jengz zongx, nănh stiz yâuc zuc zu zunb dlih bungc, cloon tongz dlih bungc. ⁸ Nyâuh yâuf pez lauf zuc njăpc tingc nyâuđ zu, wâyc Zâu nyăngz noib taih tauv stătx nzof gôh. ⁹ Yâuf pez lex, nyâuh năngx gâyf lanh yônx lanh, wâyc max oix phunz nyâuh zuc stămđ stoif, mangc geh! Stămđ stoif quanz taih tauv lâyc jengh cah đangc nzof gôh!” ¹⁰ Yaz nyăngz yâuf pez lex, nyâuh zuc săngx tauv lôx noib tym Zâu nyăngz bux tâuc Tênb-Hungh nyăngz woac woax đomc munh, nănh stiz nongc noic tanyđ, nyâuh yâuc zuc ayx âyz nănh stiz nyăngz gao. ¹¹ Buz coong woax đomc nongc noic tanyđ tuz tauv tauh, woax tauh six tuz oonz loc gôh, nyâuh yâuc tuz numđ lănv quaix lôx noib, Yôpv, nongc noic tanyđ zâuđ nanc, tauv tauh Zâu songđ hâuđ lênh nănh. Oix zuc buôngh pănh coong nyăngz woac ¹² Yaz nyăngz yâuf pez lex, nongc seen quaix six max nuz gungh nuz nib, mah six nuz laiv hungđ tôn; phanv coong zâyf, six max zâyf tuz gôh, nyâuh songđ max zuc tingc stoif. ayx laix coouv Zâu ¹³ Yămz nyâuh yâuf pez naih laiv lanh pongh zuc zâuđ nanc max? Woax tauh six zuc đoouc coouv, laiv lanh naih pengh oonz, oix zuc ayx nzungz tanv Tênb-Hungh. ¹⁴ Nyâuh năngđ naih laiv lanh yâuf pez săngh gumc, nănh yâuc zuc êu huyđ đăngb nyăngz munh côx taih stăngc đoouc coouv Zâu phunz, tym Zâu nyăngz bux, yâuc zoz yâuh njămh ănz nănh nyăngz stynb. ¹⁵ Nongc seenz stymz đoouc coouv Zâu songđ hayh Njâuv tuz gumc munh, Zâu yâuc oix phunz nănh tuz gumc gongx, six coong nănh năngđ pamf stoif, Tênb-Hungh songđ quanyf stoif phunz nănh. ¹⁶ Năngđ naz, nyâuh songđ zuc lanh nhlimc stoif phunz lanh, yâuc lanh stăngc lanh coouv Zâu, nyâuh nyăngz gumc songđ hayh tuz gongx, munh gongx coouv Zâu, nănh nyăngz đoouc coouv woac songđ lanyh. ¹⁷ (Ê-li) six ah tauh bamh munh, cloon pănh tinyh năngđ, nănh nongc jab coouv Zâu, Jođ Tênb-Hungh max phunz bungc lub, bungc songđ max lub tuz pôz nyăngv. ¹⁸ (Ê-li) năngx coouv Zâu êu gungh ayx bungc lub, gungh phunz bungc tuih nzac nib phunz muif hungđ jengz zunb tuz săngh. Njâuv ah lanh mengc hoonh ¹⁹ Yaz nyăngz yâuf pez lex, six coong yămz nyâuh woa năngđ naih laiv lanh ninyh longđ gâyh seenz gâyf côz, năngx naih laiv lanh hayh ênz phunz nănh phunb đangz lauf. ²⁰ Six zuc săngx laiv lanh jinb longđ jau nyăngz munh lauf, woax tauh six Njâuv stoif munh nyăngz mengc hoonh phunb đangz lauf. Nănh songđ max zuc tayc, max cun nănh naih đungx hungđ stoif, six nănh yâuc tuz Tênb-Hungh tăng omz nănh nyăngz stoif.