40 ¹ Nâyx đomc dlayc quaix blătc, Stăngc Y-yiêpv-tô, stâyz phangz nyăngz Pha-ra-ôn Hungh, pâuh tyu phunz hungh woax tauh quanz, cloon ayx nzu phunz pha-ra-ôn hungh woax tauh quanz, yâuc ayx longđ hungh stix. ² Hungh pâu numđ nhleenx nây iz tauh munh, pâuh tyu cloon quanz ayx nzu woax iz tauh quanz. ³ Hungh songđ zoz nănh stiz iz lanh nzâyz ninyh clăngđ ănz nzauh, six clăngđ ănz cun Hungh tync woax tauh pengz pyây nyăngz nzauh, six clăngđ ănz toix Yô-sepv, yămz woax nomz nzauh. ⁴ Jămđ Hungh tync woax tauh pengz songđ jaoz nănh stiz iz lanh phunz Yô-sepv, cun clăngđ nănh stiz iz lanh munh ah dlapc. ⁵ Naih ah munf nâyx đomc iz tauh quanz yămz woa nzauh njaf quanz pâuh tyu, cloon quanz ayx nzu, nănh stiz iz lanh phâyx mâyc njoomh bâyx lanh tauh bâyx naih âyz gâyf max tinyh năngđ. ⁶ Nyâyc đoomz Yô-sepv, ninyh tex mangc phătc nănh stiz iz lanh numđ stauh nzongf. ⁷ Yô-sepv, naic nănh stiz iz lanh Pha-ra-ôn Hungh quanz zuc yămz nzauh woax đomc munh coong, "săngh laix nâyx noib bix phătc nyâuh numđ stauh tuz nâyx yeh? ⁸ Nănh stiz iz lanh tauz coong, "cumh bâuz buz iz lanh bâyx lanh tauh bâyx, yâuc max naih mănv phanv nâyx đomc bâyx nyăngz âyz gâyf phunz buz mungv, Yô-sepv, bux nănh stiz coong, "phanv bâyx nyăngz dlayc max zâyf Zâu Tênb-Hungh mah? nyâuh lanv nyâuh nyăngz bâyx phunz yaz mungv geh." Pâuh tyu quanz nyăngz bâyx ⁹ Pâuh tyu woax tauh quanz lănv nănh nyăngz bâyx phunz Yô-sepv, mungv, yaz bâyx phătc naih ah stungh tungh cuđ mâyb, yămz yaz nyăngz cah đangc. ¹⁰ Woax stungh tungh cuđ mâyb zav pôz stynz quah, muif stynz quah seetb tunb goib phăngh yâuc săngh pyâu suđ nzof. ¹¹ Yaz nyăngz puf nzauf ah nomz zan, ninyh zoz woax đomc tungh cuđ pyâu taih neng woax đomc tungh cuđ pyâu toongh ănz nzac zan njaf ninyh bix pâuh ninyh tăpx ănz nzac Pha-ra-ôn Hungh nyăngz puf ninyh." ¹² Yô-sepv, coong bux nănh, nâyx đomc bâyx nyăngz âyz gâyf six năngđ nâyx, woa pôz stynz quah six pôz noib. ¹³ Năngx naih pôz noib tymb, Pha-ra-ôn Hungh songđ oix pungx phunz mâyh seetb ninyh tuz dluyh stymz, yâuc năngx phunz mâyh tuz ayx cumh pâuz năngđ mâyh lôx noib ayx woa nâyx, mâyh yâuc năngx tuz pâuh tyu ninyh phunz Pha-ra-ôn hungh. năngđ mâyh lôx noib tuz ayx woax hungđ cumh pâuz nâyx. ¹⁴ Six tauv mâyh tuz pungx goib woax zanyf, jođ săngx tauv yaz yămz nây nzauh, jođ mâyh lănv yaz nyăngz jau phunz Pha-ra-ôn Hungh mungv yâuc Njâuv yaz seetb nây nzauh ninyh. ¹⁵ Yaz yămz Hipc-lu munh nyăngz stâyz phangz yâuc zuc nzâyz taih tauv nây, yămz nây Y-yiêpv-tô nyăngz stâyz phangz max ayx longđ laiv hungđ yâuc zuc zoz nzâyz taih ănz nây nzauh năngđ nâyx." Ayx nzu quanz nyăngz bâyx ¹⁶ Ayx nzu woax tauh quanz phătc Yô-sepv, pob bâyx naih âyz gâyf gongx, nănh songđ lănv bux Yô-sepv, yaz lauf naih ah tauh bâyx, yaz bâyx phătc yaz nyăngz pyây đongx pôz đanz nzu. ¹⁷ Woa muif nomz đanz njaf naih dloih muif hungđ nzu nongc phunz Pha-ra-ôn Hungh, six noc yâuc nzac taih nhlync yaz nyăngz pyây cah zâyc woa đanz njaf woax đomc nzu nzuf." ¹⁸ Yô-sepv, tauz nănh coong, "nâyx tauh bâyx nyăngz âyz gâyf six năngđ nâyx, woa pôz đanz nzu six pôz noib. ¹⁹ Năngx naih pôz noib tymb, Hungh six cumv mâyh nyăngz pyây, yâuc zoz mâyh nyăngz stynb phunz munh nzâyz ninyh đyux ănz woa njăngx đany phunz noc taih nhlync quanz nyăngz a." Giô-sepv zuc munh nyâuđ cob nănh ²⁰ Pôz noib cah đangz, Pha-ra-ôn Hungh nyăngz stengb stâyv noib, nănh bênc nhlync hopb tingđ ayx quanz nyăngz munh taih dloih nănh woa, Hungh songđ pungx iz lanh quanz, pâuh tyu quanz cloon ayx nzu quanz seetb nzauh taih. ²¹ Hungh phunz pâuh tyu woax tauh quanz, năngx tuz ayx năngđ lôx noib nănh tuz pâuh tyu ninyh phunz Hungh nâyx. ²² Six Hungh phunz ayx nzu woax tauh quanz, Hungh songđ êu munh nzâyz ninyh tayx, nzâyz stynb ninyh đyux ănz woa njăngx đany năngđ Yô-sepv pob nănh stiz woax đomc bâyx nâyx. ²³ Six pâuh tyu woax tauh quanz lenf lôx max săngh tauv Yô-sepv. nănh nyâuđ cob nâyx tauh nauf nzof gôh. Hungh nyăngz bâyx