39 ¹ ikv-ma-ên, nyăngz stanyb âyx munh nzâyz Yô-sepv, ninyh maic phunz Y-yiêpv-tô, munh Pha-ra-ôn, hungh nyăngz quanz cun hungh tync nyăngz pengz pyây Phô-ti-pha. ² Zâu Yê-hô-wa, cloon Yô-sepv, yămz nănh songđ săngh ah tauh munh ayx lungđ săngh lungđ nyăngz munh, nănh yămz nănh nyăngz zâu pyau Pha-ra-ôn hungh nyăngz pyau. ³ Nănh nyăngz pyau Zâu pâyz tuz Zâu Yê-hô-wa, cloon Yôpv-sepv, yămz, ongx huđ Yô-sepv, ayx lungđ săngh lungđ gongx nzongf. ⁴ Yô-sepv, ayx tuz hođ Phô-ti-pha, nyăngz nyâuđ, Phô-ti-pha, songđ jaoz phunz nănh ayx cumh pâuz lanyc, jaoz phunz nănh ayx cun jax toongx nyăngz munh, songđ zoz nănh nyăngz muif hungđ jax toongx phunz nâyx tauh munh cun nzuf. ⁵ Nâyx tauh nauf Yô-sepv, cun Phô-ti-pha, nyăngz pyau jax toongx muif hangh cloon pyau munh, Zâu Ye-hô-wa, songđ sađ pôz taih phunz nănh nyăngz pyau Zâu Phô-ti-pha nyăngz muif hungđ yămz pyau njaf cloon yămz jêmh đi nyăngz muif hungđ. ⁶ Phô-ti-pha, jaoz muif hungđ phunz Yô-sepv, jămđ nzuf, nănh max zâuđ nyâyh tauv laiv hungđ njynh cloon nhlync hopb nyăngz muif hungđ. Yô-sepv, nyăngz hanyh jangx zoongx yâuc quai tuz gongx nzongf. ⁷ Yô-sepv, yămz lauh, nănh nyăngz pyau Zâu nyăngz au mangc phătc zuc stymz, oix văngf nănh, songđ coong bux nănh, mâyh taih cloon yaz phâyx gôh." ⁸ Six Yô-sepv, max mungv nănh nyăngz Zâu au, nănh coong yaz nyăngz pyau Zâu max zâuđ numđ stauh pyau njaf jax dlaih muif hungđ, nănh jaoz phunz yaz naih gâyf cun nzuf. ⁹ Yămz nâyx siênz pyau max naih mănv năngx tuz ayx năngx lub têx yaz, blătc nzuf mâyh yaz nyăngz Zâu max nzauf laiv hungđ, yaz ayx laix hayh ayx nâyx đomc huđ dlayc pamf stoif cloon Zâu Tênb-Hungh?" ¹⁰ Tăng woax noib tauv pitc noib, nănh nyăngz Zâu au njynh luz hox Yô-sepv, six nâyx tauh nauf jeenz max nyunc cloon nănh phâyx mah six yămz tync lanyc. ¹¹ Naih ah noib Yô-sepv, nzac pyau ninyh ayx nănh nyăngz cumh pâuz, woa pyau njaf yâuc max naih laiv lanh pyau munh yămz woa. ¹² Phô-ti-pha, nyăngz au topz zoz Yô-sepv, zăpc êu văngf nănh, Yô-sepv songđ zangz tuz đutb, quengx gwuyz ănz tauh munh nzif woa puf, tyuv tuz seetb cungh ngwoaic ninyh. ¹³ Nâyx tauh munh nzif phătc Yô-sepv, quengx nănh nyăngz gwuyz ănz woa tyuv seetb cungh ngwoaic ninyh. ¹⁴ Nănh songđ hamv ngatz-ngatz têx, êu yămz woa pyau njaf woax đomc nâuh munh taih bux coong, "mangc geh! tah claof Phô-ti-pha, ênz nâyx lanh Hipc-lu munh taih, nâyx zanyf bix taih zăpc yaz văngf, yaz bix coonx hamv. ¹⁵ Nănh numđ yaz hamv, nănh numđ cumh nzav bix quengx gwuyz ănz nây tyuv seetb cungh ngwoaic ninyh. ¹⁶ Tah bôf songđ zaub woax byeenđ gwuyz ănz woa zu tauv nănh nyăngz langh lauf. ¹⁷ Tah bôf songđ lănv coong, mâyh ênz lâyc tauh Hipc-lu, munh taih pănh nây pyau ayx nâuh, nănh oix ayx peo yaz, yâuc oix cloon yaz phâyx. ¹⁸ Nănh numđ yaz hamv, nănh bix quengx gwuyz ănz nây tyuv seetb cungh ngwoaic ninyh." ¹⁹ Yô-sepv, nyăngz Zâu numđ nănh nyăngz au lănv coong mâyh nyăngz nâuh munh ayx năngđ nâyx ănz yaz, tah claof seenz numđ nhleenx nzongf. ²⁰ Phô-ti-pha, songđ topz zoz Yô-sepv, nzâyz ninyh sukc ănz nzac nzauh ninyh, Yô-sepv songđ zuc clangđ cloon Stoif-munh yămz Hungh tync nyăngz nzauh. ²¹ Six Zâu Ye-hô-wa, Tênb-Hungh cloon Yô-sepv, yămz yâuc ongx huđ nănh, phunz nănh ayx tuz hođ cun nzauh quanz woax tauh nyăngz stymz nyâuđ. ²² Cun nzauh quanz jaoz phunz Yô-sepv, cun nzuf yămz woa nzauh cah njaf woax đomc stoif-munh, nănh stiz ayx nyăngz cumh pâuz. ²³ Cun nzauh quanz, max zâuđ nyâyh tauv lungđ, Zâu Ye-hô-wa, cloon nănh yămz, Ye-hô-wa, songđ ayx phunz Yô-sepv, ayx laiv hungđ yâuc săngh congz." Giô-sepv phanv iz tauh bâyx