41
1
Iz nyăngv quaix đangz, Pha-ra-ôn hungh, bâyx phătc nănh yămz woa coiđ Nin, cah synh.
2
Nănh mangc phătc naih nhlic tauh ngoongh wăngh janx, cunc njeenf tăng woa coiđ seetb taih stâuđ woa nhlync mađ.
3
Yâuc năngx naih nhlic tauh ngoongh wăngh janx jayf njemf huđ matc, tăng coiđ Nin, seetb taih ninyh stâuđ woa nhlic tauh nhlic ngoongh cunc cah synh.
4
Woax đomc nhlic tauh ngoongh wăngh jayf njemf, naz woax đomc nhlic tauh ngoongh wăngh cun nzuf, Hungh songđ nyakb tyub.
5
Nănh phâyx yâuc năngx bâyx nyâyc hâyđ, mangc phătc ah comđ blauh stynx nhlic stynz pongx seetb taih jauh quaix nzongf.
6
Yâuc năngx naih ah comđ blauh stynx nhlic stynz yâuc zuc tongz puôngz nzaox sâyb max jauh seetb taih luiđ lêpc woax đomc blauh jauh cah đangz.
7
Woax đomc nhlic stynz blauh blaof naz woax đomc nhlic stynz blauh jauh nzuf, Hungh nyakb đyub taih songđ pâyz tuz nănh bâyx phătc.
8
Nyâyc đoomz quef taih nănh nyâyh nganc yâuc numđ stauh, songđ êu yămz Y-yiêpv-tô stâyz phangz phanv bâyx nyăngz stênx stengb, năngx cloon quaix sâuz stênx stengb taih, Pha-ra-ôn, Hungh songđ lănv nănh nyăngz bâyx bux bây nănh stiz mungv, six max naih mănv hayh phanv tuz toix nâyx đomc bâyx nyăngz âyz gâyf phunz Pha-ra-ôn Hungh.
9
Woax zanyf, stăngc pâuh tyu phunz Pha-ra-ôn Hungh woax tauh quanz nzăngđ săngx tauv lănv bux Hungh stix coong, "Nâyx noib yaz săngx tauv yaz ayx longđ nyăngz dlayc woax hâyđ.
10
Naih ah hâyđ Hungh stix siv nhleenx nănh nyăngz pâuz, songđ zoz yaz cloon ayx nzu woax tauh quanz nzâyz ninyh clăngđ ănz jămđ Hungh tync woax tauh pengz pyây nyăngz nzauh.
11
Naih ah munf buz iz lanh songđ bâyx lanh tauh bâyx naih âyz gâyf max tinyh năngđ.
12
Naih ah tauh Hipc-lu, gunx munh, cloon buz zuc clăngđ yămz cun Hungh tync woax tauh pengz pyây nyăngz nzauh, nănh yâuc ayx woax tauh pengz pyây nyăngz nâuh munh, buz lănv buz nyăngz bâyx phunz nănh mungv, nănh songđ hayh phanv tuz toix buz săngh lanh nyăngz bâyx woax đomc âyz gâyf.
13
Songđ naih dlayc seetb taih toix nzuf nănh phanv buz nyăngz bâyx, nănh phanv yaz nyăngz bâyx coong, "mâyh năngx tuz Hungh phunz mâyh tuz ayx cumh pâuz năngđ cah đangc dlih, six ayx nzu woax tauh quanz six zuc munh nzâyz ninyh đyux."
14
Pha-ra-ôn Hungh songđ êu munh ênz Yô-sepv, taih, nănh stiz songđ coonx ninyh ênz Yô-sepv, seetb nzauh taih, tâyv pyây wănc gwuyz quav săngb phunz nănh, songđ ênz ninyh tauv Pha-ra-ôn Hungh nyăngz cah đangc.
15
Hungh stix coong bux Yô-sepv, yaz naih ah tauh bâyx, yâuc max naih mănv hayh phanv tuz yaz nyăngz bâyx, yaz numđ munh lănv coong, "mâyh numđ munh lănv nănh stiz nyăngz bâyx, mâyh yâuc hayh phanv tuz seetb bâyx nyăngz âyz gâyf."
16
Yô-sepv, tauz Pha-ra-ôn Hungh, max zâyf yaz cănh hayh phanv đêh, six Tênb-Hungh hayh phanv tuz Hungh nyăngz bâyx."
17
Pha-ra-ôn Hungh songđ lănv nănh nyăngz bâyx bux Yô-sepv, yaz bâyx phătc yaz yămz woa coiđ Nin, cah synh.
18
Yaz mangc phătc naih nhlic tauh ngoongh wăngh janx cunc njeenf, tăng woa coiđ seetb taih yămz woa nhlync lauđ tic noomh.
19
Yâuc năngx phătc naih ah peob nhlic tauh ngoongh wăngh janx jayf njeemf, ninyh lêpc woax peob cah đangz, yămz nâyx nomz Y-yiêpv-tô stâyz phangz yâuc max zengx phătc naih laiv peob ngoongh wăngh jayf yâuc huđ tuz năngđ woax peob ngoongh đêh.
20
Woax đomc ngoongh săngh gumc đoonh jayf njemf naz nzuf seetb taih đangc woax đomc nhlic tauh ngoangh wăngh cunc.
21
Nănh stiz naz nzuf yâuc phătc năngđ nănh stiz max zengx tuz nhlync laiv hungđ nâyx, yaz songđ đyub.
22
Yaz năngx bâyx phătc naih ah stungh blauh stynx nhlic stynz seetb taih jauh quai nzongf.
23
Yâuc năngx naih ah stungh stynx nhlic stynz seetb max jauh tiny stăngv, zuc tongz puôngz nzaox sâyb, luiđ lêpc woax đomc blauh jauh cah đangz.
24
Woax đomc nhlic stynz blauh blaof, yâuc naz nzuf woax đomc nhlic stynz blauh jauh. yaz lănv nâyx đomc bâyx bux phunz woax đomc stênx stengb mungv, six yâuc max naih mănv phanv tuz nâyx đomc bâyx phunz yaz." Giô-sepv phanv bâyx phunz hungh
25
Yô-sepv, coong bux Pha-ra-ôn, hungh, nâyx đomc iz tauh bâyx, six Zâu Tênb-Hungh bux bây mâyh pâyz quaix đangc Nănh cayx ayx laiv hungđ seetb taih.
26
Woax đomc nhlic tauh ngoongh wăngh janx cunc njeenf six nhlic nyăngv, nzof woax đomc nhlic stynz blauh jauh six lauf nhlic nyăngv. nây iz tauh bâyx âyz gâyf six tinyh năngđ.
27
Woax đomc nhlic tauh ngoongh wăngh janx jayf njemf, seetb taih đangz, cloon woa nhlic stynz blauh blaof zuc tongz puôngz nzaox sâyb max jauh six nhlic nyăngv nyâuđ sab.
28
Nây six seenz năngđ yaz bux Hungh stix nâyx, Tênb-Hungh oix pooux phunz Hungh stix pâyz tuz Nănh cayx ayx laiv hungđ dlayc seetb taih.
29
Yămz nâyx nomz Y-yiêpv-tô stâyz phangz six tuz nhlic nyăngv jengz zunb gongx.
30
Nâyx đomc nhlic nyăngv tuz zunb gongx, năngx naih nhlic nyăngv nyâuđ sab lêpc đangz taih. munh six max zâuđ săngx tauv songx zunb jengz, yămz nâyx nomz Y-yiêpv-tô stâyz phangz six zuc huđ nzuf.
31
Nâyx đomc nyâuđ sab nyăngz săngx huđ, songx munh songđ nyâuđ cob nzuf ayx zunb nyăngz dlih.
32
Hungh stix nây iz tauh bâyx six Tênb-Hungh goib yangh Nănh oix ayx nyăngz dlayc, Nănh bênc nănh săngh songđ oix ayx căn.
33
Năngđ naz, jođ Hungh stix sên ah tauh munh lemđ naih tongb manyh, oonz nănh cun Y-yiêpv-tô stâyz phangz.
34
Hungh năngx zuc oonz ah lanh munh ayx quanz cun nzêux nâyx nomz Y-yiêpv-tô stâyz phangz, sâub nây nhlic nyăngv tuz jengz zunb pyaz phănc, ah phănc blauh mâyđ ănz nzac njămf ninyh.
35
Nâyx đomc nyăngv tuz zunb jengz blauh mâyđ gongx nyăngz nyăngv cayx tauv, nănh stiz muif nomz stengv six zuc ayx âyz Hungh stix nyăngz lanyf, sâub blauh mâyđ ănz nzac Hungh pâu nyăngz njămf ninyh jămđ woax đomc blauh mâyđ năngx gongx.
36
Nâyx đomc blauh mâyđ six njâuh nongc buôngh phunz Y-yiêpv-tô stâyz phangz nyăngz sâu pâuz, zu tauv nyâuđ sab nyăngz săngx huđ, max zâuđ zuc phunz nâyx nomz Y-yiêpv-tô nzêuh munh zuc tanyđ nyâuđ sab tayc nzuf." Giô-sepv tuz ayx quanz cun Y-yiêpv-tô stâyz phangz
37
Nâyx đomc sangv gwoangh nyăngz woac, Pha-ra-ôn Hungh cloon nănh nyăngz quanz pâu numđ naih gâyf songđ đôngh ix.
38
Pha-ra-ôn Hungh coong ănz nănh nyăngz quanz zayb, pănh hayh tuz ah lanh munh naih Tênb-Hungh nyăngz singx lingh năngđ lâyc tauh ya munh max?"
39
Pha-ra-ôn Hungh coong ănz Yô-sepv, Wâyc zuc Tênb-Hungh phunz mâyh pâyz tuz nâyx đomc dlayc, max mănv naih tongb manyh lemđ tuz cayx năngđ mâyh.
40
Yaz six phunz mâyh cun nzuf yaz nyăngz Hungh tync, nzof yaz nyăngz pec stingx yâuc zuc mungv ayx âyz mâyh nyăngz woac, cungb cănh yaz ah lanh naih lanyf năngx lub têx mâyh.
41
Pha-ra-ôn Hungh năngx coong bux Yô-sepv, nâyx zanyf yaz phunz mâyh naih lanyf cun nzuf Y-yiêpv-tô stâyz phangz."
42
Pha-ra-ôn Hungh mutx nănh naih hungh yeenx woax nomz bah đoz quinb, gâyh Hungh nyăngz puf, nzâyz ninyh tăngh ănz Yô-sepv, nyăngz bah đoz, phunz nănh zuz đôc buyx mynh nyăngz gwuyz đao, yâuc tăngh sămz langb ănz nănh nyăngz clangz.
43
Pha-ra-ôn Hungh phunz nănh stâyv cah đangz nyâyc saz maf sex, năngx naih munh ninyh đangc nănh hamv coong, "quâyc nzac paix gôh, Pha-ra-ôn Hungh phunz nâyx tauh munh cun Y-yiêpv-tô stâyz phangz.
44
Pha-ra-ôn Hungh năngx coong bux Yô-sepv, yaz six Pha-ra-ôn Hungh, nâyx nomz Y-yiêpv-tô stâyz phangz năngđ coong max naih mâyh six naih mănv hayh zaub tuz puf staux quef.
45
Pha-ra-ôn Hungh oonz ah nomz bux phunz Yô-sepv, six hipđ ayx Sa-phơ-natv Pha-nê-akv." Hungh yâuc năngx jaoz ah tauh ôn stengv stayb-munh nyăngz sab, nâyx tauh sab nyăngz bux hipđ ayx A-sê-natv, six Phô-ti-pha-ra, nyăngz sab, phunz Yô-sepv, nongc ayx au, nzof Yô-sepv, songđ seetb ninyh tayđ nzêux Y-yiêpv-tô munh nyăngz stâyz phangz.
46
Yô-sepv, tuz stamx săpc nyăngv woax zanyf, nănh ayx Y-yiêpv-tô stâyz phangz Pha-ra-ôn Hungh nyăngz cumh pâuz, nănh songđ tăng Hungh tync seetb ninyh yâuh nzêux Y-yiêpv-tô stâyz phangz.
47
Yămz woax đomc stâyz phangz tuz nhlic nyăngv cah njaf ayx tuz jengz zunb jauh gongx nzongf yâuc naih nhlync yăngc.
48
Yô-sepv, ninyh sâub dlonf Y-yiêpv-tô stâyz phangz nzêux iz pôz nganc yămz woa nhlic nyăngv cah njaf ayx tuz woax đomc blauh mâyđ sâub dlonf nzâyz lauf dlonf ănz ah nomz stengv.
49
Yô-sepv, sâub tuz taih nyăngz blauh mâyđ tuz đungx nzongf dluyh tongh năngđ coiđ synh njauz staiz, nănh max hayh stauđ tuz tongf, wâyc zuc đungx yongb songđ max hayh stunx tuz nzuf.
50
Woax đomc nyâuđ sab nyăngz nyăngv max zengx tauv, Ô stengv nyăngz stayb-munh Phô-ti-phê-ra, nyăngz sab Akv-natv, stengb tuz iz lanh toonz phunz Yô-sepv.
51
Yô-sepv, oonz bux phunz nâyx tauh toonz coonz hipđ ayx Ma-na-se, nănh coong, "wâyc zuc Tênb-Hungh stăngc yaz zay stauh, phunz yaz nyâuđ cob nzuf yaz nyăngz zâuđ nanc, cloon yaz nyăngz pyau njaf nzif pha pyau munh.
52
Nănh oonz bux phunz nyâyc lanh toonz, hipđ ayx Epv-ma-im, nănh coong, "Max cun yaz yămz nâyx nomz stâyz phangz pongh zuc zâuđ nanc, Tênb-Hungh yâuc năngx sađ pôz phunz yaz naih sây." Săngđ coonz gungh hanv
53
Nây nhlic nyăngv tuz zunb jengz sâub dlonf quaix nzuf.
54
Woa nhlic nyăngv nyâuđ sab quef coonz seetb taih, dluyh tongh cayx năngđ Yô-sepv, coong nâyx, yămz woax nomz Y-yiêpv-tô stâyz phangz muif đoif naih năngv mâyđ caux nhlync.
55
Seenz tauv Y-yiêpv-tô stâyz phangz nyăngz munh nyâuđ sab, pec stingx songđ ninyh lov Pha-ra-ôn Hungh, jođ phunz blauh mâyđ nhync, Pha-ra-ôn Hungh songđ bux nănh stiz coong, "nyâuh six zuc ninyh lov woax tauh Yô-sepv, nănh coong laiv hungđ nyâuh six zuc ayx âyz nănh coong nyăngz woac.
56
Tauv nyâuđ sab nzêux nzuf Y-yiêpv-tô stâyz phangz woax zanyf, Yô-sepv, nzăngđ coib muif nomz zub coh maic blauh mâyđ phunz pec stingx.
57
Nzêux nây gungh đi muif nomz côkz đâuf munh tinyh đoih ninyh lov Yô-sepv, maif blauh mâyđ, wâyc zuc gungh hanv nyâuđ sab nzêux nây gungh đi muif đoif nib mync nzuf." Giô-sepv nyăngz yâuf pez ninyh Y-yiêpv-tô maif blauh