16 ¹ Woax zanyf, Sa-rai, Apv-ram, nyăngz au, lauf max zengx naih sây, six nănh naih ah lanh nâuh sab, Y-yiêpv-tô munh bux hipđ ayx A-ga. ² Sa-rai, bux Apv-ram coong, "Zâu Ye-hô-wa, max phunz yaz naih sây, mâyh bix cloon yaz nyăngz nâuh sab phâyx, sangx đâuc mungc nănh yaz tuz naih sây, Apv-ram, songđ mungv Sa-rai nyăngz woac. ³ Sa-rai, Apv-ram, nyăngz au, songđ zoz nănh nyăngz nâuh sab A-ga, jaoz phunz cloon nănh nyăngz langh songc phâyx, woax zanyf Apv-ram, yămz Ca-na-an tuz săpc nyăngv. ⁴ Apv-ram, songđ ninyh cloon A-ga phâyx, A-ga, songđ naih stynb, A-ga, numđ nănh max cungb stynb, nănh songđ quef coonz mangc stam nănh nyăngz zâu nzif max staox mâyc. ⁵ Sa-rai, bux Apv-ram coong, "Wâyc mâyh yaz zuc A-ga, mangc yaz max staox mâyc six wâyc mâyh, yaz zoz yaz nyăngz nâuh sab phunz cloon mâyh phâyx, nănh numđ nănh max cungb stynb, nănh zâyf mangc yaz stam, Jođ Zâu Ye-hô-wa, stămđ yaz cloon mâyh six laiv lanh ayx longđ." ⁶ Apv-ram, coong bux Sa-rai, mâyh nyăngz nâuh sab yămz mâyh nyăngz puf đi, dluyh mâyh ayx laix ănz nănh bix dluyh stymz geh! Sa-rai, songđ ayx peo ănz A-ga, A-ga songđ zuc tyuv. Ikv-ma-ên six A-ga nyăngz toonz ⁷ Zâu Ye-hô-wa, nyăngz Stynz-munh pongh A-ga, stâyv yămz woa stâyz phangz blănf, Su-rơ stengv woax stynz jau synh naih ah nomz nof womz. ⁸ Stynz-munh songđ naic, A-ga, Sa-rai nyăngz nâuh lex! mâyh cayx ninyh laiv tix? A-ga tauz, yaz tyuv yaz nyăngz Zâu Sa-rai." ⁹ Zâu Ye-hô-wa, nyăngz Stynz-munh bux nănh coong, "Mâyh six zuc phunb đangz muf cloon mâyh nyăngz Zâu nzif yămz, yâuc zuc mungv nănh cun." ¹⁰ Zâu nyăngz Stynz-munh năngx bux nănh, "Yaz six ayx phunz mâyh nyăngz sây stunz phutx đungx staox, tauv zâuv max naih mănv hayh stauđ max nzuf." ¹¹ Zâu Ye-hô-wa, nyăngz Stynz-munh năngx coong bux nănh, "Mâyh naih lâyc stynb tauh sây six toonz, tauv nănh stengb taih, mâyh six oonz bux phunz nănh hipđ ayx Ikv-ma-ên. wâyc zuc Zâu Ye-hô-wa, numđ nzuf mâyh yônx mengc nyăngz zâuđ nanc woac nzof gôh. ¹² Mâyh lâyc tauh sây six năngđ jêmh nyăngz maf-lih, nănh nyăngz puf songđ oix bopc songx munh, nzof songx munh yâuc oix bopc nănh, nănh songđ cloon nănh nyăngz yâuf pez yâuc zuc yămz tinyh gâyh côz." ¹³ A-ga, oonz bux phunz, yâuc coong woac bux nănh woax tauh, nănh coong, "Mâyh six hayh mangc tuz phătc yaz woax tauh six Tênb-Hungh, yaz hănđ yămz nây, mâyh yâuc hayh mangc tuz phătc yaz, yâuc hayh phunz yaz naih mengc săngh woax tauh mah?" ¹⁴ Năngđ naz, yămz Cany-đe, cloon Bê-rêtv, mungh tongx congv woax nomz womz cangz bux six hipđ ayx Bê-e-la-za-roi. ¹⁵ Quaix đangz A-ga, stengb tuz ah tauh toonz taih phunz Apv-ram, Apv-ram, songđ oonz bux phunz woax tauh toonz hipđ ayx ikv-ma-ên. ¹⁶ Apv-ram, yămz tuz pêtz săpc guc nyăngv, A-ga songđ stengb tuz nâyx tauh toonz ikv-ma-ên taih phunz nănh. Quaix catz nyăngz gâyf nongc ayx nyunc woac