17 ¹ Tauv Apv-ram, yămz tuz zu săpc zu nyăngv woax zanyf, Zâu Ye-hô-wa, nyăngz Stynz-munh hynđ yangh seetb bux nănh coong, "Yaz six dliênc quaix nyăngz Zâu Tênb-Hungh, mâyh six zuc mungv yaz nyăngz woac, ayx max naih tync nzêmh nyăngz munh. ² Yaz six cloon mâyh njăpc nyunc woac, yaz six ayx phunz mâyh nyăngz sây stunz phutx hongđ đungx staox." ³ Apv-ram, pub nzac nib ninyh, Zâu Tênb-Hungh songđ coong bux nănh. ⁴ Nây six yaz cloon mâyh njăpc nyăngz nyunc woac, mâyh six ayx đungx stingx munh nyăngz stung zez tâuh. ⁵ Nâyx zanyf, Mâyh max zâyf hipđ ayx Apv-ram, nzof gôh, mâyh six ayx Apv-ra-ham, lêc đêh. wâyc zuc yaz oix phunz mâyh ayx đungx stingx munh nyăngz stung zez tâuh. ⁶ Yaz oix phunz mâyh nyăngz sây stunz hungđ đungx staox, songđ pênx sax stingx munh, yâuc naih đungx tauh hungh tăng mâyh seetb taih. ⁷ Yaz cloon mâyh, năngx cloon mâyh stâyv stipx stâyv nyăngz sây stunz nyunc woac, pênx stâyv quâyx nyăngz nyunc woac, yaz nyunc ayx mâyh nyăngz Tênb-Hungh, yâuc ayx mâyh đangz phanx sây stunz nyăngz Tênb-Hungh. ⁸ Yaz six phunz mâyh cloon mâyh nyăngz sây stunz stâyv yămz nâyx nomz stâyz phangz six Ca-na-an nyăngz stâyz phangz, phunz mâyh yămz nongc ayx nhlync, stâyv stipx stâyv yaz six ayx nănh stiz nyăngz Tênb-Hungh. ⁹ Zâu Tênb-Hungh coong bux Apv-ra-ham, nây six yaz cloon mâyh stâyv stipx stâyv nyăngz sây stunz nyunc woac, ¹⁰ Nây six yaz cloon mâyh muif stâyv sây stunz njăpc nyunc woac, muif lanh munh toonz six zuc ayx quaix catz nyăngz gâyf. ¹¹ Mâyh six zuc ayx quaix catz nyăngz gâyf, wâyc phunz yaz cloon mâyh njăpc nyunc woac ayx nyăngz njih houđ. ¹² Muif lanh munh toonz, tăng stengb stâyv taih pong yeetc noib woax noib, six zuc ayx quaix catz nyăngz gâyf, njynh nyâuh nyăngz stengb stănb sây, năngx cloon nyâuh nongc nyanh maif taih nyăngz pitc stingx munh sây lauf zuc ayx quaix catz nyăngz gâyf phunz. ¹³ Hănđ six nyâuh nyăngz pyau njaf sây, cloon max zâyf nyâuh stengb stănb sây, nongc nyanh maif lauf nyăngz cungh ngwoaic munh sây, lauf zuc ayx quaix catz nyăngz gâyf, ayx năngđ naz yaz six cloon nyâuh nyăngz stynb ayx ah nomz njih houđ njăpc nyunc woac six năngđ nâyx gôh. ¹⁴ Laiv lanh munh toonz max ayx quaix catz nyăngz gâyf, six zuc paiv quanyf, wâyc nănh ayx longđ yaz njăpc nyăngz nyunc woac." ¹⁵ Zâu Tênb-Hungh coong bux Apv-ra-ham, mâyh nyăngz au Sa-rai, blătc nây ninyh max zâyf hipđ ayx Sa-rai, nzof gôh, six hipđ ayx Sa-ra lêc đêh.* ¹⁶ Yaz six sađ pôz phunz nănh, yâuc sađ phunz nănh naih ah lanh toonz, phunz nănh pênx đungx hungđ pec stingx munh nyăngz nzif, muif hungđ nyăngz Hungh stix six tăng nănh naih seetb taih." ¹⁷ Woax zanyf, Apv-ra-ham, pub nzac mynb tauv nib nănh yămz nyâuđ nyâyh numđ cuyb jeetx, yaz bêc tuz ah pez nyăngv nây nzof bix năngx hayh naih sây naz? Sa-ra, lauf zu săpc nyăngv nzof bix lauf năngx hayh naih sây stengb tuz toonz naz?" ¹⁸ Apv-ra-ham, coong bux Zâu Ye-hô-wa, "ô jođ Zâu sađ pôz phunz Ikv-ma-ên!" ¹⁹ Zâu Tênb-Hungh tauz max zâyf đêh, yaz six cănh sađ phunz mâyh nyăngz au Sa-ra, naih ah lanh toonz, mâyh six zuc oonz bux phunz nănh hipđ ayx Y-sakv, yaz oix cloon nănh njăpc nyunc woac, yâuc năngx cloon nănh đangz stâyv nyăngz sây stunz njăpc nyunc woac. ²⁰ Six yaz numđ mâyh stăngc jođ phunz ikv-ma-ên nyăngz phănc, yaz six sađ pôz phunz nănh zunx hongđ staox, phunz nănh săngh săpc nyâyc stingx munh nyăngz pha, yâuc sađ phunz nănh pênx ah nomz pec stingx côkz lub. ²¹ Yaz njăpc nyăngz nyunc woac, six cloon Y-sakv, Sa-ra, naih nâyx tauh sây toonz six tauv đoomz nyăngv nănh nzăngđ stengb stâyv." ²² Zâu Tênb-Hungh cloon Apv-ra-ham, coong nzuf nâyx đomc woac, Zâu songđ ninyh gâyh nănh. ²³ Toongx sangf woax noib Apv-ra-ham, âyz Zâu Tênb-Hungh bux nyăngz woac ayx, nănh ênz nănh nyăngz toonz ikv-ma-ên, cloon stengb stâyv yămz nănh nyăngz pyau, năngx cloon nongc nyanh maif lauf nyăngz muif lanh munh toonz, ayx quaix catz nyăngz gâyf phunz nănh stiz nzuf." ²⁴ Apv-ra-ham, tuz zu săpc zu nyăngv, nănh songđ ayx quaix catz nyăngz gâyf. ²⁵ Tah claof nyăngz toonz, ikv-ma-ên tuz săpc stamz nyăngv songđ ayx quaix catz nyăngz gâyf. ²⁶ Toongx woax noib, Apv-ra-ham, cloon ikv-ma-ên, songđ nyunc ayx quaix catz nyăngz gâyf, ²⁷ Njynh cloon stengb stâyv yămz woa pyau, cloon nongc nyanh maif tăng cungh ngwoaic côkz lauf songđ nyunc ayx quaix catz nyăngz gâyf nzuf. Tênb-Hungh nyunc phunz tauh toonz Apv-ra-ham, cloon Sa-ra.