24 ¹ Pyaz noib cah đangz, Stayb-munh, A-na-nia, cloon ayx côx munh, Năngx cloon tauh (luâtc-sư) bux hipđ ayx Tetc-tu-lu, ninyh tauv Sê-sa-rê, (Tôngz-đôkv) woa cooux Phao-lô.” ² Phao-lô tuz ênz nzac woa stămđ Stoif tync taih, Tetc-tu-lu, Songđ quef coonz cooux Phao-lô, “Nănh stiz cooux coong, “(Tôngz-đôkv) Phi-litv lex! Wâyc phunz mâyh ayx coonz, Pănh nyăngz côkz songđ tuz taiv pengh lauh nzongf, “Côkz sangc yâuc tuz sađ puv quâyx (Đeoz-neoz) Naih lungđ max săngh nyăngz dlayc, mâyh yâuc zany tuz gongx. ³ Buz hănđ yămz laiv tix tuz sađ laiv hungđ seenz numđ nyađ clo ănz mâyh.” ⁴ Six buz max nzađ sêmc mâyh săngh huđ congv lauh, jođ mâyh nongc stymz nyâuđ mungv yaz coong tix zâux woac.” ⁵ Buz phătc nâyx lanh munh cungb puv maoh jaf Yiu-thai munh yămz nzêux nây Gungh đi lunc nzuf, yâuc zengv Lô-ma nzêuh nyăngz hungh pâu, nzof nănh yâuc ayx ah tauh Na-sa-letv woax đomc munh. ⁶ Nănh ayx wâyx buz nyăngz gâyf paix toongh nzof buz nzăngđ zoz nănh ênz taih cayx ta âyz buz nyăngz gâyf stămđ Stoif. ⁷ Six woax tauh pengz pyây Si-sêtv, taih zab nyeenh mănh zoz nănh seetb gâyh buz nyăngz puf đi. ⁸ Jođ mâyh zah naic nănh songđ pâyz tuz buz cooux nănh nâyx đomc woac, Seenz mah six za.” ⁹ Yiu-thai munh tinyh đoih đôngh ix nâyx đomc dlayc six seenz nyăngz.” Pha-lô coong zay stynb woac ¹⁰ Six (Tôngz đôkv) nuz êu Phao-lô, nănh songđ lănv coong, “(Tôngz đôkv) Phi-litv lex! Yaz pâyz tuz mâyh ayx pob dlayc munh yămz nâyx nomz Stâyz Phangz đungx nyăngv, Six nâyx noib yaz seenz numđ nyađ tuz naih congv taih yămz mâyh nây cah đangc lănv yaz nyăngz dlayc phunz mâyh mungv.” ¹¹ Mâyh cănh hayh zah naic tuz pâyz, Yaz ninyh Ye-lu-sa-lem Stengv canyx paix Zâu nzăngđ nzez săpc nyâyc noib nây.” ¹² Six cooux yaz nâyx đomc munh max zengx tuz phătc yaz cloon munh tinyh nzengz yămz woa gâyf paix toongh, Mah six stengv cah njaf Lou songx munh lunc laoc.” ¹³ Nănh stiz nâyx noib cooux yaz nâyx đomc dlayc nyăngz munh max lov tuz laiv hungđ ayx zanyx manyf.” ¹⁴ Six yaz jođ nhlimc nâyx hungđ phunz nyâuh, “Yaz Canyx pănh côx claof nyăngz Tênb-Hungh, Yaz six ah tauh lêpc đaof Yê-su nyăngz munh, Yiu-thai munh coong, “Yê-su nyăngz Đaof six za Đaof, Yaz zeen nyăngz gâyf six Mô-sê ja nyăngz Đoouc-lif gâyf, Cloon tâuc woac munh ja nyăngz stâub.” ¹⁵ Yaz naih ah cuyb njih mungc tync yămz woa Zâu Tênb-Hungh, Cayx năngđ nănh stiz nâyx, “Yaz zeen coong max jez munh gongx mah six munh huđ, Tayc blătc six năngx zuc săngh phunb stengb taih.” ¹⁶ Wâyc năngđ nâyx, Yaz songđ zuc muif noib yămz Zâu Tênb-Hungh nyăngz cah đangc, Yâuc yămz songx munh nyăngz cah đangc ayx gongx nyăngz dlayc.” ¹⁷ Yaz ninyh gâyh Ye-lu-sa-lem Stengv đungx nyăngv nzof six yaz năngx nzâyz nyanh phunb đangz lauf stăngc cloon yaz songc stingx nyăngz munh, yâuc cloon pungx hođ nyăngz muif hungđ.” ¹⁸ Nănh stiz phătc yaz yămz woa layf paix toongh nzăngđ stav wâyx tuz woax zanyf, Yâuc max lou lunc laiv hungđ, Yâuc max naih mănv cloon yaz căpx dlonf yămz laiv tix.” ¹⁹ Naih batz lanh Yiu-thai munh yămz têuz-av, Six coong nănh stiz năngđ phătc yaz ayx saih toix lungđ dlayc, Nănh stiz six cănh taih nây cooux yaz.” ²⁰ Mah six mâyh phanv naic yămz nây nâyx đomc Yiu-thai munh mangc jađ, yaz Stâuđ yămz Ye-lu-sa-lem Stengv Yiu-thai munh nyăngz gâyf paix pyau yaz ayx saih toix laiv hungđ max.” ²¹ Nâyx noib yaz zuc tingc stoif, Six cungb yônx naih ah hungđ, Yaz stâuđ yămz nănh stiz nyăngz cah đangc hamv coong, “Nâyx noib nyâuh tingc yaz nyăngz Stoif Six wâyc yaz zeen munh tayc bix năngx săngh taih nyăngz gâyf! ²² Phi-litv lauf pâyz tauv Zâu Yê-su nyăngz đaof, Songđ tingc sec, Năngx bux coong, “Zu Viên jiz huy Li-sia taih tauv nây, yaz nzăngđ pob mâyh nyăngz dlayc.” ²³ Phi-litv, bux êu quanz lauf cưv clangđ Phao-lô, Six phunz nănh dluyh stymz ninyh lauf, phunz nănh nyăngz toic nzâyz laiv hungđ nănh sămv zuc nongc nyăngz phănc taih phunz Nănh.” Phi-litv cloon nănh nyăngz au mungv Phao-lô coong ²⁴ Quaix đangz batz lauh, Phi-litv cloon Nănh nyăngz au, Đu-si-ri, Nănh nyăngz au six Yiu-thai munh, Nănh êu Phi-litv ênz Phao-lô taih yămz nănh stiz cah đangc, Lănv tauv zeen Zâu Yê-su seenz stymz nyăngz jau.” ²⁵ Phao-lô lănv tauv ayx gongx nyăngz jau, Yâuc lănv tauv Tênb-Hungh tingc bamh canz nyăngz môtc zapz noib, Phi-litv cumh nzav, Nănh coong dluyh lêc caux nzof gôh tah, Laiv zanyf naih congv yaz mănc zâyf êu mâyh taih tymb.” ²⁶ Phi-litv lauf mungc Phao-lô đăpx nyanh, Nănh songđ njynh leox êu Phao-lô cloon nănh lănv woac.” ²⁷ iz nyăngv quaix đangz, Bôn-si-phêtv-tu, Wănc Phi-litv ayx (Tôngz-đôkv), six Phi-litv oix nongc Yiu-thai munh numđ nyađ nănh, Nănh songđ njynh luz clangđ Phao-lô ănz woa nzauh.” Phao-lô cooux tauv Sê-sa hungh