25 ¹ Phêtv-tu tuz stipx lanyf ayx (Tôngz-đôkv), Tuz pôz noib, Nănh songđ tăng Sê-sa-rê, ninyh Ye-lu-sa-lem Stengv. ² Stayb-munh Cloon ayx lub nyăngz Yiu-thai munh, Ninyh tauv Phêtv-tu woa cooux Phao-lô.” ³ Nănh stiz êu Phêtv-tu ênz Phao-lô muf Ye-lu-sa-lem Stengv, Nănh stiz cayx ta zux-ix tayx Phao-lô woa bah đămx jau.” ⁴ Six Phêtv-tu tauz coong, “Phao-lô lauf cưv clăngđ ănz Sê-sa-rê, Max lauh yaz lauf năngx muf woa.” ⁵ Phêtv-tu bux coong, “Six coong Phao-lô năngđ ayx pamf toix lungđ Stoif, Six zuc phunz ah đomc munh lêpc yaz ninyh tauv Sê-sa-rê cooux nănh.” ⁶ Phêtv-tu, lauf năngx yămz Ye-lu-sa-lem Stengv cox yeetc tauv săpc noib nâyx. “nzof Nănh nzăngđ phunb đangz lauf Sê-sa-rê. Tauv nyâyc noib, Phêtv-tu stâyv woa stămđ stoif tync, êu pengz ênz Phao-lô taih woa.” ⁷ Phao-lô tuz ênz nzac stămđ Stoif tync taih, Tăng Ye-lu-sa-lem Stengv taih woax đomc Yiu-thai munh stâuđ quib nănh nzêux nzuf, Lov Stoif niđ cooux nănh, Six lov max tuz ah nomz seenz nyăngz zanyx manyf.” ⁸ Six Phao-lô songđ coong zay Stynb nyăngz woac, Nănh coong, “Yaz max pamf Yiu-thai munh nyăngz laiv hungđ gâyf, Yâuc max ayx wâyx gâyf paix toongh, Mah Six zengv Sê-sa.” ⁹ Six Phêtv-tu oix ayx phunz Yiu-thai munh numđ nyađ nănh, “Nănh songđ naic Phao-lô coong, “Mâyh oix ninyh Ye-lu-sa-lem Stengv phunz yaz pob mâyh nyăngz dlayc max? ¹⁰ Phao-lô tauz coong, “Nâyx zanyf yaz Stâuđ nây Sê-sa nyăngz stămđ stoif tync, Six hopđ zuc yămz nây stămđ yaz, yaz max ayx pamf Yiu-thai munh nyăngz laiv hungđ gâyf, Six nyâuh lauf pâyz.” ¹¹ Six coong yaz ayx longđ laiv hungđ jic tuz tayc têx, yaz yâuc max aox, Six coong nâyx đomc Yiu-thai munh taih nây cooux yaz nâyx đomc dlayc max seenz têx, Max naih laiv lanh naih gâyf zoz yaz jaoz phunz Nănh stiz.” Yaz năngx oix cooux tauv Lô-ma nzêuh Hungh pob yaz nyăngz dlayc.” ¹² Phêtv-tu, cloon cun dlayc munh sangv gwoangh nzuf, “Songđ bux nănh coong, “Six coong mâyh năngđ oix cooux tauv Sê-sa hungh, Mâyh six zuc ninyh tauv Sê-sa hungh woa.” Phao-lô cloon A-ripv-ba hungh ¹³ Blătc woa iz pôz noib cah đangz, A-dipv-ba, Cloon Bê-rê-nitv, ninyh tauv Sê-sa, Stengv, Cloon Phêtv-tu ayx đaoc.” ¹⁴ Nănh stiz iz lanh yămz woax nomz Stengv ah dlapc batz lauh, Phêtv-tu, zoz Phao-lô nyăngz dlayc lănv phunz hungh mungv, Phêtv-tu, lănv coong, “Phi-litv clăngđ ah tauh Stoif munh ănz nây.” ¹⁵ Yaz ninyh Ye-lu-sa-lem Stengv woax zanyf, ayx lub nyăngz Yiu-thai munh, Cloon stayb-munh taih nây cooux nănh, Nănh stiz êu yaz tayx nănh!” ¹⁶ Six yaz tauz nănh stiz stiz coong, “Ayx năngđ nâyx Six max hopđ Lô-ma munh nyăngz Gâyf, max cun laiv lanh naih dlayc, Six zuc phunz nănh cloon cooux nănh woax đomc munh cloon nănh toix nzeetx nzuf, nzăngđ hayh zoz nănh jaoz phunz toix laiv tauh hungh.” ¹⁷ Taih nây cooux nănh woax đomc Yiu-thai munh, taih tauv nây Sê-sa-rê, yaz songđ max ngaih, Tauv nyâyc noib, yaz songđ ninyh stâyv woa stămđ stoif stync, êu munh ênz Phao-lô nzac taih.” ¹⁸ Woax đomc Yiu-thai munh nyoongz quef stâuđ woa cooux nănh, “Six yaz max phătc nănh stiz cooux nănh naih toix laiv hungđ Stoif nic âyz yaz zah. ¹⁹ Nănh stiz cungb nzengz tauv nănh stiz Yiu-thai munh nyăngz gâyf cungv, Yâuc năngx nzengz tauv ah tauh đaof daov nyăngz bux hipđ ayx Zâu Yê-su, Nănh tayc nzof, “Six Phao-lô coong nănh Năngx săngh phunb stengb taih." ²⁰ Nănh stiz tinyh nzengz yaz max hayh mungv lêpc laiv lepz, Yaz songđ naic Phao-lô, Tah mâyh oix ninyh Ye-lu-sa-lem Stengv Stămđ Stoif max? ²¹ Six nănh jođ ninyh phunz Lô-ma nzêuh Hungh stămđ, saz songđ seetb lanyf êu pengz ênz nănh ninyh clăngđ ănz nây nzauh, tauv yaz naih congv yaz nzăngđ ênz nănh ninyh Lô-ma nzêuh hungh woa.” ²² A-ripv-ba bux Phêtv-tu coong, “ha yaz lauf oix mungv nănh lănv. “Phêtv-tu tauz, “ha săngx đoomz hungh mănc mungv.” Phao-lô yămz A-ripv-ba hungh cah đangc ²³ Tauv nyâyc noib, A-ripv-ba, Cloon Phêtv-tu bênc dloih, Cloon pengz pyây, ayx lub nyăngz munh, Cloon naih manyh yangh nyăngz munh, Tinyh đoih nzac Hungh tync nyăngz huyđ-toongh taih dloih nzuf, Phêtv-tu, songđ seetb lanyf êu pengz ênz Phao-lô nzac taih.” ²⁴ Phêtv-tu săngđ coonz coong, “A-ripv-ba hungh cloon songx munh lex! muif lanh Yiu-thai munh naih mynb yămz nây, yâuc cloon yămz Ye-lu-sa-lem Stengv taih nyăngz munh, hamv cooux nănh coong, “Nâyx tauh ya munh max jic tuz săngh.” ²⁵ Six yaz zah max phătc nănh longđ toix laiv hungđ jic tuz tayx nănh tayc, Six nănh yâuc cănh jođ phunz Lô-ma nzêuh hungh pob nănh nyăngz dlayc, yaz nzăngđ ênz nănh ninyh tauv (woangh-đev) Sê-sa hungh woa.” ²⁶ Six yaz lov max tuz laiv hungđ dlayc nongc ja jeenx stungx phunz Sê-sa quanz hungh. Nâyx noib yaz songđ ênz nănh taih nyâuh tinyh đoih nây cah đangc, Tah yeetx six A-ripv-ba hungh, yaz mungc nyâuh zah naic nănh yaz nzăngđ naih woac ja jeenx.” ²⁷ Âyz yaz nyâyh taih, Stungx ah tauh Stoif-munh ninyh tauv Hungh pâu, Bix max naih cooux nănh woax đomc woac nzâyz lêpc nănh ninyh, Six max naih gâyf.” Phao-lô năngx coong zay stynb woac