17 ¹ Phao-lô, Cloon Si-la, Clăngv quaix Am-phi-bô-li, Cloon A-bô-lô-ni, nzăngđ tauv Ti-sa-lô-ni-ca Stengv. Yămz woa naih Yiu-taih munh ah nomz Huyđ-đăngb.” ² Phao-lô buz muif nomz tingc congz noib nănh stiz năngđ njynh leox nâyx, ninyh woa Huyđ-đăngb pôz jeetb, Nănh nongc Canyx-Stâub nyăngz woac, laiv bux Yiu-thai munh.” ³ Nănh nongc Canyx-Stâub nyăngz gâyf taih lănv coong, “Njâuv Zâu zuc tanyđ zâuđ tauv tayc, Six nănh năngx săngh taih, Nănh coong, “Yê-su six yaz lănv bux phunz nyâuh côx claof pâyz woax tauh Njâuv Zâu.” ⁴ Naih ah po Yiu-tai munh songđ zeen Nănh stiz Phao-lô, Cloon Si-la, songc ah đomc, Cloon đungx lanh Hi-lapc munh canyx bongc Tênb-Hungh, yâuc năngx cloon woax đomc munh nzif naih sting jauđ.” ⁵ Six Yiu-thai munh hănđ Phao-lô buz songđ ninyh woa caiz sangc hox woax đomc manyh yangh huđ nyâuđ jaz nyăngz munh, Căpx dlonf ayx toic pênx ah peob, nănh stiz tyuv taih tauv Gia-sôn nyăngz pyau lov Phao-lô, Cloon Si-la, Nănh stiz hangb đa đănx Phao-lô buz ên ninyh songx munh nyăngz cah đangc.” ⁶ Lov max tuz, Nănh stiz songđ taib Gia-sôn cloon batz lanh zeen Zâu munh, nzâyz ninyh tauv ayx quanz munh nyăngz pyau, “Songx munh hamv coong, “Lâyc đomc ya munh puv maoh nzêux nây gungh đi, Nâyx zanyf zâyf tauv pănh nây nzof gôh.” ⁷ Gia-sôn, Yâuc stipx nănh stiz yămz nănh nyăngz pyau, Nănh stiz ayx nyăngz dlayc aox cloon Sê-sa Hungh nyăngz lanyf, Yâuc coong, “Năngx naih pitc tauh Hungh bux hipđ ayx Yê-su.” ⁸ Songx pec stingx cloon ayx quanz nyăngz munh yămz stengv numđ nâyx đomc woac songđ numđ nhleenx.” ⁹ Woax đomc quanz songđ zoz Gia-sôn woax đomc batz lanh munh seetb nyanh đăpx, songđ pungx nănh stiz muf.” Phao-lô cloon Si-la ninyh Bê-rê ¹⁰ Woax munf, woax đomc zeen Zâu munh stungx Phao-lô cloon Si-la ninyh tauv Bê-rê, Yămz woa nănh stiz iz lanh nzac Yiu-thai munh nyăngz Huyđ-đăngb ninyh.” ¹¹ Six nâyx đomc munh joomz nyâuđ mungv Phao-lô buz lănv gâyf năngx nzongf têx, Ti-sa-lô-ni-ca munh, Nănh stiz muif noib zah Canyx-Stâub mangc jađ toix Phao-lô buz lănv max toix.” ¹² Munh đungx zeen Zâu, Naih manyh yangh gongx nyăngz Hi-lapc munh nzif cloon munh Pha, Zeen Zâu đungx nzongf.” ¹³ Six yămz Ti-sa-lô-ni-ca nyăngz Yiu-thai munh numđ lănv coong Phao-lô buz yămz Bê-rê, lănv gâyf, Nănh stiz năngx tinyh ênz lêpc đangz ninyh hox woax nomz stengv munh lunc nzuf.” ¹⁴ Six woax đomc zeen Zâu nyăngz munh, Lênh dlih stungx Phao-lô, Ninyh woa coiđ synh, Six Si-la, Cloon Ti-mô-thê lauf Năngx yămz woa Bê-rê.” ¹⁵ Six woax đomc munh, Năngx ênz Phao-lô ninyh tauv A-thiên stengv, Nănh stiz nzăngđ phunb đangz lauf, Phao-lô Zăpx êu Si-la, Cloon Ti-mô-thê, Coonx ninyh cloon nănh năngx căn.” Pha-lô yămz A-thên lănv gâyf ¹⁶ Phao-lô, yămz A-thiên Stengv, Zu Si-la, Cloon Ti-mô-thê woax zanyf, “Nănh mangc phătc woax nomz Stengv naih manđ hanyh pong nzuf nănh seenz numđ nhleenx nzongf.” ¹⁷ Yămz woa Huyđ-đăngb, Phao-lô, Cloon woax đomc Yiu-thai munh, cloon Hi-lapc munh, Lănv gâyf, “Cloon congx Tênb-Hungh woax đomc munh lănv woac, Nănh muif noib ninyh woa caiz cloon woax đomc munh ayx đaoc lănv gâyf.” ¹⁸ Naih ah đomc E-pi-cu-liên Stênx Stengb, cloon ah đomc Sa-đô-cikc taih cloon Phao-lô stâyv gâyf, “Nănh Stiz coong, “Ê! Lâyc tauh munh claof max pâyz nănh oix coong lungđ? “Pitc tauh coong, “Mangc cayx năngđ nănh oix nzâyz pitc hungđ manđ taih lănv, wâyc zuc Phao-lô, Cloon Nănh stiz lănv Zâu Yê-su tayc blătc năngx săngh taih woax đomc cuđ jeenx.” ¹⁹ Nănh stiz ênz Phao-lô buz ninyh tauv A-rê-ô-ba, Cun dlayc tync songđ coong bux nănh, Jođ mâyh phanv mâyh yađ nzaox woax đomc săngb gâyf phunz buz mungv.” ²⁰ Mâyh coong nyăngz dlayc seenz săngb nzongf, “Buz songđ oix pâyz năngx đăngb têx tymb! ²¹ (Yămz A-thiên munh, cloon pitc stingx munh Songđ oix njengx săngx huđ congv mungv nzaox săngb gâyf.)” ²² Phao-lô nyoongz quef stâuđ songx munh mungh tongx congv coong, “Yămz A-thiên stengv nyăngz munh lex! âyz yaz phătc nyâuh yâuf pez ayx nyăngz muif hungđ nzuf stymz ayx.” ²³ Yaz ninyh stunb Stengv, tex mangc phătc nyâuh yâuf pez Canyx-bongc woax đomc Miuc hanyh naih đungx hungđ, yaz phătc naih ah nomz miuc hanyh, Phătc zamf đungx hangh đăngc ănz woa coong, (“Congx Zâu max pâyz’) “Nyâuh Yâuf pez Canyx nyâuh max pâyz nyăngz manđ, Six nâyx zanyf yaz lănv bux nyâuh woax tauh.” ²⁴ Tênb-Hungh six zâyx bamh canz cloon muif hungđ, Nănh six zâyx Gungh nib nyăngz Zâu, Nănh max yămz bamh munh nongc puf zâyx taih nyăngz Miuc tync.” ²⁵ Tênb-Hungh six sađ săngh mengc phunz pănh woax tauh, Phunz pănh naih siv tongb cloon muif hungđ phunz pănh, Nănh max sămv zuc mănv stăngc nănh, “Wâyc zuc nănh cănh naih muif hungđ dloih nzuf.” ²⁶ Nănh săngđ coonz Zâyx ah tauh nongc ayx phăn, tăng woax tauh zunx yămz pong nây gungh Đi, Nănh bênc săngh nyăngz Săngx huđ, phunz muif lanh munh yămz.” ²⁷ Tênb-Hungh ayx năngđ nâyx wâyc phunz bamh munh taih lov Nănh, yâuc hayh lov tuz pongh nănh, Nănh max yămz gâyh pănh laiv lanh côz. ²⁸ Pănh yămz nây yangh stâyv ayx nhlync yămz, yămz nănh cah njaf, Seetb ninyh nzac lauf, naih ah phanx munh coong, “Pănh six săngh nănh nyăngz namh nyâuf.” ²⁹ Wâyc năngđ nâyx, Pănh six săngh Tênb-Hungh nyăngz namh nyâuf, Pănh yâuc max nongc nyâyh năngđ munh đungx laic Stăngz Nănh six năngđ pănh nyâyh nongc sămz nongc nyanh, Nongc njauz pyây Zâyx taih nyăngz Miuc hanyh.” ³⁰ Lôx noib munh max zengx pâyz nyăngz săngx huđ, Tênb-Hungh songđ quanyf nănh stiz woax đomc stoif, “Six nâyx zanyf Nănh bux yămz nây Gungh đi nyăngz muif lanh munh pâyz six zuc coi nyâuđ quanyf Stoif.” ³¹ Wâyc zuc Tênb-Hungh tăng lôx bênc săngh ah noib, “Nongc tingc Gungh đi munh nyăngz Stoif lauh nzof gôh, Nănh yâuc nongc nănh sên taih nyăngz munh nongc pengh stymz stămđ, Nâyx lanh munh tayc blătc, Six Tênb-Hungh năngx phunz Nănh tăng tayc nyăngz tync săngh taih, Phunz songx munh pâyz tuz nâyx đomc dlayc.” ³² Nănh stiz numđ lănv coong, “Zâu Yê-su tayc blătc năngx săngh taih, Naih ah po munh jeetx Nănh, “Six naih ah phanx coong, Pitc zanyf, Pănh năngx oix mungv nâyx đomc woac tymb! ³³ Phao-lô songđ seetb ninyh gâyh nănh stiz. ³⁴ Naih ah phanx munh zeen lêpc phao-lô, woax đomc cun dlayc munh, Naih ah lanh bux hipđ ayx Đê-ni, Naih ah lanh munh nzif bux Đa-ma-ri, năngx Cloon đungx lanh tymb.’ Phao-lô yămz Cô-lin-tô