¹ Yaz oix nzeetx blangc pâu tymb max cun nâyx đomc nzeetx blangc woac max stăngc tuz laiv hungđ, Six Yaz oix lănv Zâu hynđ yangh nyăngz dlayc, Cloon Lauh-yangh nyăngz dlayc. ² Yaz pâyz tuz gâyh nây săpc stâyx nyăngv, naih ah tauh Njâuv Zâu Munh. tuz stipx staox muf tauv tah stamz tab Tênb-Toongh. Max pâyz six njynh stynb Ninyh mah six yaz yâuc max pâyz tuz six cungb Tênb-Hungh pâyz Cungv. ³ Yaz pâyz woax tauh Munh tuz stipx staox tauv Tênb-Toongh, max pâyz six njynh stynb ninyh mah six max zâyf njynh stynb ninyh yaz lauf max pâyz tuz yox, six cungb Zâu Tênb-Hungh pâyz cungv. ⁴ Yămz woa nănh ninyh tauv Ba-ra-đi numđ bamh Munh njynh max naih woac Coong yâuc max phunz phepx laiv lanh coong lungđ. ⁵ Yaz oix wâyc nâyx tauh Munh nzeetx blangc, seetb nzuf nâyx tauh Munh Yaz max zanyb laiv lanh, Yaz cănh zanyb Yaz đoonh nyăngz nyăngz tync. ⁶ Six coong yaz năngđ oix nzeetx blangc, Yaz max zâyf zanyb năngđ Munh oongx Munh. Yaz cungb coong seenz gâyf cungv, six wâyc zuc yaz max oix laiv lanh pâuh yaz ayx lub. Nănh stiz phătc Yaz ayx nyăngz dlayc cloon yaz coong nyăngz woac. ⁷ Wâyc zuc yaz phătc Lauh-yangh nyăngz dlayc đungx hâyđ,* Yaz hayh zanyb lub, Yaz songđ zuc Sax-tanx nyăngz pâuz ayx phunz Yaz săngh sâyh yămz yaz nyăngz stynb, wâyc ayx hoiđ max phunz Yaz hayh nzeetx blangc quax đangx. ⁸ Wâyc nâyx đomc dlayc yaz clo-Zâu pôz hâyđ, jođ Zâu stăngc Yaz zoz nâyx đomc sâyh seetb gâyh Yaz nyăngz stynb. ⁹ Six Zâu tauz yaz nyâuh songđ tuz pôz caux nongc, wâyc zuc nyâuh đoonh nyăngz săngx huđ, Yaz nyăngz jab songđ yongb staox, Wâyc năngđ nâyx Yaz songđ oix nzeetx blangc zanyb yaz đoonh nyăngz tync, Wâyc tuz Njâuv Zâu nyăngz quyênh stăngc Yaz. ¹⁰ Yaz songc Njâuv Zâu tanyđ đoonh, zuc Munh coong peo, zuc Munh wâyb hoiđ, zuc dlauc wâyb, Yaz lauf numđ nyađ. Wâyc zuc Yaz laiv zanyf đoonh, woax zanyf yaz yâuc tuz yongb. ¹¹ Tăng coonz tauv nâyx zanyf, Yaz coong năngđ Munh oongx, six nyâuh yâuf-pez yac yaz ayx năngđ nâyx. six nyâuh hopđ zuc tanv Yaz, max cun yaz pênx laiv hungđ Munh, Yaz lauf max cănh năngx lanz têx pitc tauh. ¹² Yaz yămz nyâuh yâuf-pez mungh tongx Yaz nongc noic ayx muif hungđ Jix-caox njingc nyăngz dlayc. goib yangh yaz ayx cumh pâuz Munh. ¹³ Wâyc zuc nyâuh yâuf-pez tuz stipx caux muif hungđ, cayx năngđ pitc nomz Huyđ-toongh tuz stipx nâyx, Yaz songđ max zengx ayx dlauc wâyb phunz nyâuh yâuf-pez. Jođ nyâuh quanyf Stoif phunz Yaz. ¹⁴ Nâyx zanyf yaz bênc săngh ninyh tayđ nyâuh yâuf-pez tah stamz hâyđ, Yaz ninyh yâuc max wâyb nyâuh yâuf-pez laiv hungđ. Yaz oix nongc six nyâuh yâuf-pez. Max zâyf nyâuh nyăngz nyanh. Wâyc zuc max zâyf sây njâuh nyanh phunz Nzif Pha, six nzif Pha njâuh nyanh phunz sây. ¹⁵ Yaz numđ nyađ yaz naih nyăngz muif hungđ, max cun yaz nongc Mengc tayv nyâuh, Yaz năngđ Stăngz nyâuh yâuf-pez đungx, nyâuh Stăngz yaz stoc max? ¹⁶ Yaz lenf lôx max zengx ayx wâyb nyâuh yâuf-pez laiv hungđ, six nyâuh yâuf-pez yôuc laic Stăngz six yaz nongc cuyx quaiz nyăngz jau jaf nyâuh. ¹⁷ Yaz ayx laix jaf nyâuh yâuf-pez? Yaz paiđ woax đomc Munh ninyh nyâuh yâuf-pez woa wâyb nyâuh mah? ¹⁸ Yaz coouv Titv, Ninyh nyâuh yâuf-pez woa, yâuc năngx paiđ pitc tauh yâuf-pez cloon nănh ninyh. Titv, nănh ayx peo nyâuh yâuf-pez max? naih dlih max đêh! wâyc zuc nyâuh yâuf-pez pâyz tuz yaz cloon Titv, songc nyâuđ songc congz ayx cumh pâuz. ¹⁹ Nyâuh yâuf-pez laic stăngz six Yaz muif dlih cungb cănh coong zay stynb nyăngz woac naz? six Yaz yămz Zâu Tênb-Hungh nyăngz cah đangc coong năngđ Njâuv Zâu oix nyăngz jau. Stăngz nyăngz yâuf-pez lex! Yaz ayx nyăngz muif hungđ dlayc six cungb wâyc zâyv phunz nyâuh yâuf-pez yongb staox. ²⁰ Yaz stauh cungb wangb yaz ninyh nyâuh woa nyăngz săngx huđ zâyf phătc nyâuh njingf, max năngđ yaz mungc nyăngz jau, nzof nyâuh yâuc phătc yaz njingc, Cungb wangb phătc nyâuh yâuf-pez tinyh panx, siv nhleenx, stâyx munz, oix nzengz tuz hingh, ayx guyc, pib Munh coong woac huđ, lou lunc. ²¹ Yaz wangb yaz ninyh tauv nyâuh yâuf-pez woa woax dlih, pănh nyăngz Zâu Tênb-Hungh oix phunz yaz yămz nyâuh nyăngz cah đangc zuc nyayz. Yaz zuc numđ stauh Munh đungx, dlênh noib nănh stiz pamf Stoif yâuc max zengx coi nyâuđ quanyf stoif năngx ayx cah lôh, Văngc Munh ayx pongz lauh nyăngz jau.