¹ Nây six yaz oix ninyh tayđ nyâuh yâuf-pez tah stamz hâyđ, hănđ six laiv hungđ dlayc oix nongc iz pôz lanh ayx zanyx Manyf munh. ² Yaz ninyh tayđ nyâuh yâuf-pez tah nyâyc woax hâyđ, Yaz tôn woax đomc pamf Stoif nyăngz Munh. Nâyx zanyf yaz hănđ max naih mynb cloon nyâuh yâuf-pez yămz, Six yaz năngx tôn nănh stiz cloon pitc đomc Munh ah hâyđ tymb, Six coong yaz năngđ năngx ninyh nyâuh woa yaz songđ max nyangc nănh stiz gôh. ³ Nyâuh yâuf-pez oix phătc Njâuv Zâu nănh nongc yaz lănv nănh nyăngz woac. Njâuv Zâu bênc nyâuh nyăngz dlayc nănh max đoonh, six Nănh seenz yongb nzongf. ⁴ Max cun Njâuv Zâu nănh zuc tingz yămz đăngc zax Tayc nănh seenz đoonh nzongf, six Tênb-Hungh nyăngz quyênh phunz nănh săngh phunb stengb taih. Nzof yaz lauf năngđ nănh nâyx đoonh, Six Yaz wâyc Zâu Tênb-Hungh nyăngz jab tuz cloon Njâuv Zâu songc Mengc săngh . . ⁵ Nyâuh yâuf-pez six zuc zah mangc jađ! Nyâuh yâuf-pez naih seenz stymz max naih? Nyâuh yâuf-pez max pâyz tuz Njâuv Zâu Yê-su săngh yămz nyâuh yâuf-pez cah njaf, six coong nyâuh max coouv tuz wăn têx nyâuh lauf pâyz. ⁶ Yaz zeen coong nyâuh yâuf-pez pâyz tuz yaz coouv tuz wăn. ⁷ Yaz jođ Zâu Tênb-Hungh max oix phunz nyâuh yâuf-pez ayx laiv hungđ huđ dlayc. nây max zâyf wâyc phunz Yaz coouv tuz gongx, six wâyc phunz nyâuh ayx hopđ nyăngz jau, max cun phătc Yaz coouv max tuz wăn. ⁸ Yaz max hayh ayx laiv hungđ zengv cloon seenz gâyf, six cungb canyx bongc seenz gâyf cungđ. ⁹ Yaz laiv zanyf đoonh nyâuh yâuf-pez yongb, six Yaz lauf numđ nyađ, Yaz jođ Zâu phunz nyâuh yâuf-pez pênx Munh njoongh. ¹⁰ Wâyc nâyx yaz max cloon nyâuh yâuf-pez yămz nyăngz săngx huđ, Yaz songđ ja nâyx zây jeenx. zu yaz ninyh tauv nyâuh yâuf-pez woa yaz songđ max zâuđ nongc Zâu phunz Yaz nyăngz quyênh bênc nyâuh nyăngz dlayc. Zâu phunz yaz nyăngz quyênh six nongc zâyv nyâuh, max zâyf tou nyâuh. ¹¹ Nâyx zanyf Yaz jođ zaoh phunz biêtc nyâuh tinyh đoih yâuf-pez. six zuc ayx pênx Clakx-clunh nyăngz Munh. yâuc zuc ayx âyz yaz bux nyăngz woac. six zuc hopđ stymz dlongh âyx pengh oonz yămz. Tênb-Hungh Stăngz nyăngz pengh stymz songđ cloon nyâuh yâuf-pez yămz. ¹² Nyâuh six zuc đăngb zengh nyăngz jau tinyh tomz. ¹³ Zâu Tênb-Hungh nyăngz songx Munh zaoh nyâuh yâuf-pez. ¹⁴ Jođ Njâuv Zâu Yê-su Sađ Pôz phunz nyâuh songx Munh. phunz nyâuh pâyz tuz Tênb-Hungh Stăngz nyâuh. jođ Singx-lingh cloon tinyh tongb nyăngz jau cloon nyâuh yâuf-pez Yămz.