¹ Yaz jođ nyâuh yâuf-pez nongc noic mungv yaz lănv ah tix Munh oongx woac. Six naih dlih nyâuh yâuf-pez lauf naih noic tanyđ tuz. ² Yaz nzengz nyâuh yâuf-pez năngđ Zâu Tênb-Hungh nzengz nyâuh yâuf-pez nâyx. nyâuh six năngđ ah tauh Munh sab stav Đăngb zengh, Yaz nyunc pungx nyâuh yâuf-pez căpx phunz tauh Munh baox, langh six Njâuv Zâu. ³ Six Yaz wangb nyâuh yâuf-pez zuc jaf ninyh longđ max lêpc Njâuv Zâu, cayx năngđ cah lof noib Ê-wa zuc nangz nongc cuyx quaiz nyăngz njih phâyz woac jaf Nănh. ⁴ Wâyc zuc naih pitc tauh ninyh tauv nyâuh yâuf-pez woa nzônh pitc tauh Zâu Yê-su max năngđ yaz nzônh woax tauh, nyâuh yâuc numđ nyađ mungv, nzof nyâuh yâuf-pez nyunc stipx pitc tauh Singx-lingh cloon pitc hungđ cuđ jeenx max năngđ Yaz lănv nyănggz cuđ jeenx cloon yaz jaoz phunz nyăngz Singx-lingh. ⁵ Yaz max nyâyh coong yaz bix Năngx jeenz têx pitc đomc cumh pâuz Munh. ⁶ Yaz yâuc max cloon woax đomc hayh coong woac yoiz nyăngz Munh, Six Yaz naih bănh sangz lănv phunz nyâuh yâuf-pez pâyz tuz nâyx đomc jau muif hungđ nzuf, ⁷ Yaz nzônh Zâu Tênb-Hungh nyăngz cuđ jeenx phunz nyâuh yâuf-pez tinyh đoih mungv yâuc max êu nyâuh seetb congz stynh phunz Yaz, Yaz cănh zeetx yaz nzac, pâuh nyâuh yâuf-pez staox njăngb, nyâuh nyâyh taih yaz ayx năngđ nâyx sai max? ⁸ Yaz nyunc pitc nomz Huyđ-toongh nyăngz nyanh lav, nongc nănh stiz nyăngz nyanc ongx huđ nyâuh yâuf-pez. ⁹ Yaz cloon nyâuh yâuf-pez yămz woax zanyf, Yaz sămv zuc toix laiv hungđ yaz yâuc max wâyb laiv lanh, Yaz yêmv nongc muif hungđ yămz Ma-si-đoan nyăngz Yâuf-pez bêc cănh câpx phunz tuz caux yaz nongc, Yaz max ayx phunz nyâuh yâuf-pez laiv lanh đamz niđ, nzof Yaz yâuc max wâyb nyâuh yâuf-pez laiv lanh. ¹⁰ Max naih laiv lanh yămz Miênh-nam-Hi-lapc hayh cangđ tuz yaz Coong Njâuv Zâu nâyx đomc seenz gâyf. ¹¹ Yaz wâyc săngh laix bix coong năngđ nâyx? Yaz max Stăngz nyâuh yâuf-pez mah? Zâu Tênb-Hungh pâyz tuz yaz stăngz nyâuh yâuf-pez lec. ¹² Nâyx zanyf Yaz năngđ laix nâyx ayx wâyc zuc Yaz max oix nongc pitc đomc nzeetx blangc wâyc ayx nănh stiz nzeetx blangc lănv nănh stiz ayx nyăngz cumh pâuz max stâyb laiv lanh cloon yaz tinyh năngđ. ¹³ Woax đomc Munh six max zâyf seenz nyăngz cumh pâuz Munh, nănh stiz cungb ayx za gâyf jaf Munh , Nănh stiz ayx nyăngz congz dlayc năngđ Njâuv Zâu nyăngz Munh ayx nâyx. ¹⁴ Max Naih lungđ njingc đêh. njynh Sax-tanx lauf hayh wav jangx năngđ Gwăngz-eng nyăngz Stynz-Munh. ¹⁵ Yaz songđ max nyâyh ganc Sax-tanx nyăngz pengz jaf ayx năngđ Pengh stymz nyăngz pâuz, six tauv stêtb mâyv âyz nănh stiz ayx nyăngz congz nănh stiz cănh zuc tingc stoif. ¹⁶ Yaz năngx coong bux nyâuh yâuf-pez ah hâyđ tymb, laiv lanh năngx gâyf laic Yaz năngđ Munh oongx, six coong nyâuh năngđ laic yaz six năngđ Munh oongx Munh, yaz songđ hayh nzeetx blangc. ¹⁷ Yaz nâyx zanyf coong nâyx đomc woac six max zâyf Zâu êu Yaz coong, “six năngđ Munh oongx nzeetx blangc. ¹⁸ Wâyc zuc naih Munh đungx âyz bamh Munh nyăngz âyx nzeetx blangc, Yaz nzof nzăngđ oix nzeetx blangc. ¹⁹ Nyâuh yâuf-pez Tongb-manyh nzongf, nzof nzăngđ nongc noic tanyđ tuz Munh oongx Munh. ²⁰ Wâyc zuc laiv tauh yac nyâuh yâuf-pez pâuh nănh, laiv tauh ayx phunz nyâuh zuc dlauc wâyb, laiv tauh paiđ nyâuh pâuh nănh ayx lub, beb nyâuh nyăngz mynb nyâuh yâuc tanyđ tuz. ²¹ Yaz numđ nyayz nzongf, wâyc zuc Yaz lanz nzongf, songđ zuc nhlimc ayx jeenz, songđ max hayh năngđ nâyx ayx cloon nyâuh yâuf-pez! Max cun naih laiv lanh nzađ nzeetx blangc, ( Yaz songđ lauf nzađ nzeetx blangc năngđ Munh oongx.) ²² Nănh stiz ayx Hipc-lu naz? Yaz lauf zâyf, nănh stiz ayx I-sa-la-ên Munh naz? Yaz songđ zâyf, Nănh stiz six ayx Apv-ra-ham nyăngz Sây-stunz naz? Yaz lauf zâyf. ²³ Nănh stiz ayx Njâuv Zâu nyăngz pâuz naz? Yaz lôx ayx năngx gongx têx nănh stiz, Yaz coong năngđ Munh vutx nyăngz woac nâyx, Yaz zuc ayx cumh pâuz năngx zâuđ têx nănh stiz, zuc yămz nzauh, zuc Munh bopc đonf pongh zuc cayx tayc Mengc nyăngz dlayc năngx đungx têx nănh stiz nef. ²⁴ Yaz zuc Yiu-thai Munh nongc pya bopc pyaz hâyđ, muif hâyđ zuc stamx săpc zu đitb đonf. ²⁵ Yaz zuc Lô-ma Munh nongc pya bopc pôz hâyđ, Yaz zuc Munh zoz njauz pyây ôx cayx tayc ah hâyđ, pôz hâyđ zuc Đangđ sêmh, ah hâyđ zuc Đangđ lunc yâuh woa womz mync ah noib ah munf. ²⁶ Yaz muif hâyđ seetb jau pongh zuc hoiđ Mengc nyăngz dlayc đungx nzongf, pongh zuc yămz nzauh, pongh zuc stac Munh zab, pongh zuc pitc stingx Munh hoiđ, yămz Stengv yămz jêmh pongh zâuđ nanc, pongh zuc za yâuf-pez hoiđ Mengc. ²⁷ Yaz zuc ayx congz tanyđ zâuđ nanc đungx nzongf, đungx munf ayx cumh pâuz max tuz phâyx mâyc njoomh, zuc tanyđ nyâuđ sab tanyđ nyâuđ gatb, yâuc zuc tanyđ song max naih gwuyz quav Zuz. ²⁸ Blătc nzuf nâyx đomc zâuđ nanc, Yaz muif noib wâyc songx Huyđ-toongh numđ nyâuđ max hênh năngđ niđ nzongf nyăngz tax’ hungđ đapx nâyx. ²⁹ Naih laiv tauh đoonh Yaz yâuc numđ đoonh, Yaz songđ numđ nhleenx laiv tauh pongh zuc jaf pamf Stoif. ³⁰ Six coong yaz năngđ nzeetx blangc, Yaz cungb nzeetx blangc lănv Yaz ayx nyăngz dlayc. ³¹ Zâu Tênb-Hungh pâyz Yaz max puv maoh, Zâu Tênb-Hungh Nănh six Njâuv Zâu Yê-su nyăngz nzangc Pha. Pănh hopđ zuc Stâyv quâyx Tanv woax tauh. ³² Yaz yămz Đa-makv-Stengv woax zanyf, Tôngz zânx quanz A-rê-ta Hungh oix zoz yaz songđ paiđ pengz zu stâyz zâuv stengv singh jengh. ³³ Six naih ah đomc yaz nyăngz banf zoz longx ănz yaz pungx seetb singh cungh ngwoaic yaz songđ tyuv tuz đutb tah claof nyăngz puf đi.