¹ Yaz Phao-Lô, nongc Njâuv Zâu nyăngz dlênc nyâuđ jođ nyâuh yâuf-pez, naih Munh lănv coong yaz cloon nyâuh yâuf-pez yămz nyăngz săngx huđ, yâuc dlênc nyâuđ cloon nyâuh tinyh zuc, six max cloon nyâuh yămz nyâuh yâuc pungx stymz. ² Nănh stiz lănv coong yaz cungb yămz âyz bamh Munh nyăngz âyx, six yaz coong bux nyâuh yâuf-pez đangc, tauv Yaz ninyh tauv nyâuh yâuf-pez woa, yâuc max nongc phunz yaz zuc pungx stymz lănv phunz nănh phătc yaz cloon nyâuh yâuf-pez lănv lungđ. ³ Yaz songđ zâyf yămz nây bamh canz, six yaz max nongc bamh Munh nyăngz zux ix bopc zax. ⁴ Yaz max zâyf nongc bamh canz tungh zangc bopc zax, six Yaz nongc Tênb-Hungh yongb nzongf nyăngz tungh zangc Mêtc nzuf yônz-zaz wăn nzongf nyăngz tync, six bopc paic Munh nzengz muif hungđ za Gâyf. ⁵ Cloon zanyb ayx lub tăng max phunz Munh pâyz Zâu Tênb-Hungh nyăngz dlayc. yămz nyâuđ nyâyh seetb taih nyăngz zux ix Yaz oix hingh quaix nzuf phunz lêpc Njâuv Zâu nyăngz Gâyf nzuf. ⁶ Yaz sănv sangh bênc nyâuđ zu nyâuh yâuf-pez ayx âyz yaz nyăngz woac. laiv lanh max âyz yaz songđ tingc woax tauh nyăngz Stoif. ⁷ Nyâuh Cungb mangc pâyh sangc cungv, yămz nyâuh yâuf-pez naih laiv lanh nyâyh coong yaz six Njâuv Zâu nyăngz Munh yaz lauf năngđ nănh nâyx. ⁸ Zâu Sađ quyênh phunz Yaz, Yaz songđ nzeetx blangc ah tix, Zâu sađ nyăngz quyênh six wâyc nongc zâyv nyâuh yâuf-pez, max zâyf nongc mêtc nyâuh Yaz songđ max numđ nyayz. ⁹ Yaz max oix nongc nyâuh yâuf-pez nyâyh coong yaz ja nâyx zây jeenx nongc hukb nyâuh yâuf pez. ¹⁰ Naih đomc Munh lănv coong, “Phao-lô ja nyăngz jeeenx Niđ nzongf, six cloon toix mynb Nănh seenz lanz nzongf, Coong woac yâuc max naih laiv hungđ stuyh muc.” ¹¹ Coong nâyx hungđ woac nyăngz Munh six zuc pâyz tuz coong, “Yaz max cloon nyâuh yămz nyăngz săngx huđ, Yaz ja jeenx coong laiv hungđ, Yaz ninyh tauv nyâuh woa, songđ ayx woax hungđ gôh. ¹² Yaz max nzađ zoz Yaz pây cloon woax đomc zanyb lub nyăngz Munh ayx ah peob, yâuc max nzâyz yaz pây nănh stiz, nănh stiz oongx nzongf. nănh stiz zoz pôn stănb nongc ayx tungh gaob. ¹³ Six Yaz max nzeetx blangc pitc hungđ cumh pâuz, Yaz cungb nzeetx blangc Zâu jaoz phunz Yaz nyăngz cumh pâuz. Njynh cloon yaz yămz nyâuh yâuf-pez mungh tongx ayx nyăngz cumh pâuz. ¹⁴ Yaz max zengx ninyh tauv nyâuh yâuf-pez woa, Yaz max nzađ nzeetx blangc quaix đangc, wâyc zuc yaz bêc nzâyz Njâuv Zâu nyăngz cuđ jeenx ninyh lănv phunz nyâuh yâuf-pez mungv quaix nzof gôh. ¹⁵ Yaz cungb nzeetx blangc yaz cănh ayx nyăngz cumh pâuz, max zâyf nzeetx blangc pitc tauh ayx nyăngz cumh pâuz. Six wâyc zuc yaz naih tync mungc, six mungc nyâuh yâuf-pez naih seenz stymz ayx cumh pâuz yongb pâu quăng staox. ¹⁶ Six Yaz oix lănv cuđ jeenx phunz pitc đoif stâyz-phangz nyăngz yâuf-pez jeenb mungv, Yaz max zâyf oix nzeetx blangc lănv pitc tauh Munh ayx nyăngz cumh pâuz. ¹⁷ Six coong laiv tauh năngđ oix nzeetx blangc, bix zanyb Zâu ayx nyăngz cumh pâuz. ¹⁸ Max zâyf woax đomc cănh Tanv nănh six Munh gongx bix nzăngđ tuz stipx pôz đêh, cungb tuz Zâu Tanv woax đomc Munh nzăngđ tuz stipx lêđ đêh.