¹ Yaz coong nâyx đomc six seenz nyăngz, laiv lanh naih stymz nyâuđ ayx cumh pâuz Munh côx, seenz gongx nzongf nyăngz cumh pâuz. ² Ayx Huyđ-toongh nyăngz Munh côx, yâuc nongx gâyf bây Munh naih tync nzêmh, Cungb nongc ah tauh au, six zuc lemđ hayh pâyz jau nzaox Munh, yeenv gâyf Munh six zuc naih nyâuđ stipx zeb. ³ Nănh max blaz tyu, max cloon Munh tinyh panx, dlênc stymz dlênc âyx, yâuc max mauh stynh nyanh. ⁴ Hayh nzaox tuz gongx nănh nyăngz pyau Munh, nănh nyăngz sây yâuc zuc mungv nănh nyăngz woac. ⁵ Six coong nănh năngđ max hayh yeenv tuz nănh nyăngz pyau Munh, ayx laix hayh jămđ tuz Tênb-Hungh nyăngz Huyđ-toongh? ⁶ Nzăngđ săngđ zeen nyăngz Munh max hopđ zuc phunz nănh ayx Huyđ-toongh nyăngz munh côx, sangx max đanyf nănh hayh zanyb ayx lub, songđ zuc tingc stoif, cayx năngđ manđ Hungh. ⁷ Ayx Huyđ-toongh nyăngz Munh côx, six zuc nongc naih cungh ngwoaic Munh stunx naih manyh tauh gongx, songđ max zuc tuih nzac Manđ Hungh nyăngz ploz lopb. ⁸ Ayx Huyđ-toongh nyăngz zâpv sưc munh, six zuc naih Munh nênf, max tuz coong woac bah camx bah caiz, max tuz blaz tyu, yâuc max tuz mauh stynh nyanh. ⁹ Nănh stiz six zuc nongc đăngb zengh nyăngz seenz stymz nyâuđ zeen wăn, Tênb-Hungh phunz plongx yangh seetb taih nyăngz seenz gâyf. ¹⁰ Six zuc stâyv mangc đangc laiv lanh phătc năngđ max naih tync nzêmh, nzof mănf paiđ nănh stiz ayx toongz puf Munh. ¹¹ Bokc dlic Zâu nyăngz Munh yâuc zuc naih manyh tauh gongx, max coong woac huđ, yămz muif hungđ dlayc six zuc ayx nyâuđ zanyx nyăngz Munh. ¹² Ayx zâpv sưc Munh cungb six zuc nongc ah tauh au cungv, yâuf hayh yeenv nănh nyăngz pyau njaf sây. ¹³ Yoiz ayx zâpv sưc Munh songđ tuz Munh nênf, yâuc tuz pungx stymz lănv Njâuv Zâu Yê-su nyăngz jau. ¹⁴ Yaz nyâyh taih yaz mungc tuz ninyh tayđ sây njâu, yaz songđ ja nâyx zây jeenx ninyh bux bây sây pâyz đangc. ¹⁵ Six coong yaz ninyh tauv zayh sây buz bix cănh pâyz jau săngh yămz Zâu Tênb-Hungh nyăngz pyau cah njaf, wâyc zuc woax sênz pyau Munh six săngh Mengc nyăngz Zâu Tênb-Hungh nyăngz Huyđ-toongh, Huyđ toongh six ayx seenz gâyf nyăngz njâuh wăn nzongf nyăngz coonz tay. ¹⁶ Pănh six zuc nhlimc pănh zeen nyăngz jau plongx yangh seetb taih seenz lub nzongf, Njâuv Zâu nănh tuz hynđ yangh seetb taih pênx pănh bamh Munh, nănh nyăngz stynđ stayđ tuz Singx-lingh ayx zanyx manyf coong, “nănh six jic tuz nyeenh mănh zeen coouv nănh, Stynz-Munh yâuc phătc nănh lănv phunz max zâyf Yiu-thai Munh Mungv, gungh đi manf Côkz tuz naih Munh zeen nănh, nzof nănh yâuc tuz stipx staox muf yămz woa Gwăngz-eng nyăngz tync.