¹ Singx-lingh coong manyh pec, đangz phanx naih đomc Munh quanyf nănh stiz zeen nyăngz jau, Nănh stiz mungv manđ jaf nănh stiz ninyh lêpc manđ nzaox nyăngz jau. ² Pâyh zac nyâuđ ngokx nyăngz Munh nongc bah camx baiz woac jaf Munh, wâyc zuc nănh stiz nyăngz stymz nyâuđ six năngđ joomz plaz Munh nâyx. ³ Nănh stiz câmx max phunz ah phanx Munh zoongz pyau, yâuc zuc njif nhlync hopb, nâyx đomc nhlync hopb Zâu Tênb-Hungh zâyx phunz zeen nyăngz Munh pâyz tuz seenz gâyf, nongc stymz nyâuđ hâuđ Zâu nzuf songđ nhlync tuz. ⁴ Zâu Tênb-Hungh zâyx taih nyăngz muif hungđ six gongx nzongf, max naih laiv hungđ năngx zuc nzêmh, tinyh phanv hâuđ zâu nzuf six nhlync tuz. ⁵ Wâyc zuc coouv Zâu Tênb-Hungh nyăngz woac, cloon Clo Zâu woac stav phunz muif hungđ dlăngc taih. ⁶ Six coong Sây năngđ zoz nâyx đomc jau taih nzaox pănh nyăngz yâuf pez, mâyh songđ săngh Njâuv Zâu Yê-su nyăngz pâuz gongx. Nâyx đomc seenz stymz cloon nzaox gâyf nyăngz woac gongx songđ yungf tuz nyâuh nyăngz Mengc zeen yongb staox. ⁷ Nyâuh six zuc pyeenv goib max zeen Tênb-Hungh woax đomc Munh nyăngz (plix-plaiz woac) six zuc jâuz yâuc canyx bongc Zâu. ⁸ Jâuz pănh nyăngz stynb songđ hayh stăngc tuz pănh ah phănc, Six jâuz stymz ongx huđ Zâu Tênb-Hungh songđ hayh stăngc tuz pănh muif tyuh jau, tăng yămz nây stâyv sangc, cloon đangz phanx woax stâyv tymb. ⁹ Yaz coong nâyx đomc woac six seenz nyăngz, jic tuz muif lanh Munh zeen tingc. ¹⁰ Wâyc zuc yaz ayx nâyx đomc cumh pâuz zâuđ, six wâyc yaz tăpx nâyx đomc njih mungc yămz săngh Mengc nyăngz Zâu Tênb-Hungh, ayx muif lanh Munh nyăngz Njâuv Zâu, tah yeetx six lanyc ayx zeen Zâu Munh nyăngz Njâuv Zâu. ¹¹ Mâyh zuc zăpx Munh nzaox Munh nâyx đomc dlayc. ¹² Nongx gâyf bây laiv lanh nyăngv tauh gunx nyăngz Munh mangc mâyh stam, six zuc ayx caox gao gongx phunz zeen Zâu nyăngz Munh hođ, Coong nyăngz woac, cloon seenz stymz six zuc stăngz Munh đăngb zengh. ¹³ Six zuc nongc nyâuđ tođ Canyx-Stâub quynb nzaox phunz songx Munh mungv, zu yaz ninyh tauv nyâuh woa. ¹⁴ Nongx gâyf pungx loc mâyh stipx Stênx-stengb nyăngz woac, Munh côx tăpx puf ănz mâyh woax đomc sâuđ nyâyc. ¹⁵ Mâyh six zuc nzuf stymz nyâuđ ayx năngx songf nâyx đomc cumh pâuz, phunz muif lanh phătc mâyh ayx cumh pâuz yongb staox. ¹⁶ Mâyh six zuc năngđ Cayđ yămz năngx hopđ, buôngh cloon mâyh nzaox nyăngz gâyf, mâyh năngđ yămz tuz hopđ têx, mungv mâyh nyăngz woac woax đomc Munh songđ tuz Njâuv.