¹ Sây lex yaz zăpx mâyh đangc, mâyh six zuc Clo Zâu phunz muif lanh Munh, Jođ Tênb-Hungh sađ phunz nănh stiz yêmv nongc nyăngz tax hungđ, muif dlih hâuđ Zâu phunz nănh stiz. ² Yâuc zuc wâyc songx Hungh stix, cloon ayx quanz nyăngz Munh Clo-Zâu, phunz pănh taiv pengh yămz max naih dlayc, coouv Tênb-Hungh bix Canyx bongc nănh. ³ Nây six hopđ pănh Njâuv Zâu Tênb-Hungh nyăngz stymz nyâuđ. ⁴ Nănh oix nongc muif lanh Munh tuz Njâuv, yâuc pâyz tuz seenz Gâyf. ⁵ Cungb naih ah tauh Zâu Tênb-Hungh, yâuc hayh ênz bamh Munh ninyh tauv cloon nănh yămz, six Yê-su Jix-tuz pênx bamh Munh woax tauh. ⁶ Nănh sez nănh nyăngz Mengc wâyc suc nyeenh mănh gâyh đutb stoif, Clao muif lanh Munh nyăngz stoif zaix, Njâuv Zâu Zâu Yê-su nzac taih toix săngx huđ ayx zanyx Manyf phunz Munh phătc Tênb-Hungh oix Njâuv pănh. ⁷ Wâyc nâyx hungđ lyv do, Yaz tuz sên paiđ ayx nzônh cub jeenx nyăngz Munh, yâuc ayx cumh pâuz Munh, Yaz coong seenz, max zâyf jaf, Yaz tuz sên taih nzaox phunz max zâyf Yiu-thai Munh, bây nănh stiz pâyz tuz seenz gâyf. ⁸ Yaz oix nongc yămz muif nomz tync nyăngz Munh toonz stungđ puf staox gungh đăngb zengh Clo-Zâu, max siv nhleenx, yâuc max tinyh panx. ⁹ Yaz oix Munh nzif sab zoongz zuz năngx tongh yangc, max bynf đongz đyux zanb sămz nyanh pou zâuz, max zoongz zuz gwuyz quav nyanh saix. ¹⁰ Munh nzif six zuc ayx gongx dlayc, nzăngđ payh tuz Canyx Zâu Tênb-Hungh nyăngz Munh nzif. ¹¹ Hođ gâyf nyăngz săngx huđ, Munh nzif six zuc stingb njâuh mungv. ¹² Yaz max phunz quyênh Munh nzif nzaox gâyf, mah six nzauf quyênh cun Munh Pha, Munh nzif six zuc payx nzeetx Mungv. ¹³ Wâyc zuc A-đam, tuz zâyx taih đangc nzăngđ tauv Ê-wa. ¹⁴ Yâuf max zâyf A-đam, zuc jaf pamc stoif, six Ê-wa, zuc jaf pamf stoif. ¹⁵ Munh nzif tuz Njâuv six wâyc nănh stiz yungf sây, six Coong muif dlih naih seenz stymz zeen gongx, yâuc stăngz Munh, songđ cun tuz Mengc săngh.