¹ N ta fla ma un erderu inkuantu e sta pikinoti, si kre el e donu di tudu, el e ka diferenti di un skravu. ² N ton, e ten ki obidesi tuturis i kuradoris, ti un ténpu disididu pa se pai. ³ Asi també, kantu nu staba pikinoti, nu staba duminadu pa lei des mundu. ⁴ Ma, na tenpu sertu, Nhordes manda si fidju, nasidu di mudjer baxu lei. ⁵ El fasi kela pa liberta kes ki staba duminadu pa lei, pa ki nu podi ser adotadu komu fidju di Deus. ⁶ I pamodi nhos e fidju , Deus manda Spiritu di si fidju na nos kurason, ki ta txoma "Aba, Pai" ⁷ N ton bu ka skravu mas, ma fidju, si bo e fidju, n ton, tanbe bo e erderu atrabes di Deus. ⁸ Ma, na kel tenpu, kantu nhos ka konxeba Deus, nhos fazedu pa ser skravu di kes ki pa natureza ka e deus. ⁹ Ma, gosi ki nhos konxi Deus, ó midjor, gosi ki Deus dja konxi nhos, pamodi ki nhos kre tonda obidesi regras ki ka ten valor? Nhos kre ser skravu di novu? ¹⁰ Nhos ata guarda dia i lua nobu, stason i anu! ¹¹ N teni medu ki nha trabadju ku hos ka sirbi pa nada. ¹² N ta implora nhos, irmons, nhos bira sima mi, pamodi mi tanbe nbira sima nhos. Nhos ka tratan mal. ¹³ Primeru bes ki n prega nhos ivanjelhu n staba duenti. ¹⁴ Apizar di nha duensa pui nhos na prova, ma nhos ka disprezan i nem rijeitan. N ton nhos reseben sima un anju di Deus, ô sima ki mi e Kristu Jizus. ¹⁵ N ton, undi sta nhos aligria? N ta fla nhos klaru, si pusivel, nhos ta rinkaba nhos odju pa nhos dan. ¹⁶ N ton n fla nhos verdadi, ta fazen nhos inimigu? ¹⁷ Ku kuidadu es ta djubi nhos, ma ka pa dretu. Es kre siparanu, pa nhos podi sigis. ¹⁸ Inton sempri nhos zela pa propositu bon, ma ka so ora ki n sta djuntu ku nhos. ¹⁹ Nha fidjus, n sta ta sufri ku hos sima mudjer ora ki ta pari, ti ki Kristu forma na nhos. ²⁰ N ta gostaba di staba gosi la ku nhos i muda nha manera, pamodi n sta supresu ku nhos. ²¹ Nhos flan manhos diseju e obidesi lei: nhos ka obi kuze ki lei ta fla? ²² Pamodi sta skritu ki Abron tinha dos fidju, un ku mudjer skravu i otu ku mudjer livri. ²³ Ma di skravu nasi sigundu karni, i otu nasi sigundu promesa. ²⁴ Kes kuza li podi ser interpretadu di manera sinboliku, pamodi kes dos mudjer li siginifica dos aliansa. Un des e di Munti Sinai. Kes mininu ke pari e so skravu. El e Agar. ²⁵ Inton, Agar ta riprisenta Munti Sinai na Arabia. I e ta riprizenta Jiruzalén di oji ki sta skravu djuntu ku ses fidjus. ²⁶ Ma, Jirusalén di riba sta livri, el e nos mai. ²⁷ Pamodi sta skrebedu: "Riguzija, bo ki ka ta kunsigi ten fidju, txoma, ixulta ku aligria, pamodi bu ka ta sufri dor di pari. Pamodi fidjus di mudjer sen maridu e mas txeu di kes ki ten maridu". ²⁸ Gosi, sima Izaki, irmons nhos e fidju di promesa. ²⁹ Na kes ténpu, kes ki nasi di karni pirsigi kes ki nasi di Spritu. Gosi e si tanbe. ³⁰ Asi tanbe, skritura ta fla? Bôta pa rua skravu i se fidju. Pamodi fidju di skravu ka ta erda djuntu ku fidju di mudjer livri. ³¹ Di kel manera li, irmons, nu ka fidju di skravu, ma di mudjer livri.